އަބޫ ހަނީފް އާއި އެމްޑީ ޝަފީގުލް އިސްލާމް ޑީޕޯޓު ކުރެވުނީ އިމިގްރޭޝަން ގާނޫނު ތަންފީޒު ކުރަން

އަބޫ ހަނީފް އާއި އެމްޑީ ޝަފީގުލް އިސްލާމް ޑީޕޯޓު ކުރެވުނީ އިމިގްރޭޝަން ގާނޫނު ތަންފީޒު ކުރުމަށް ކަމަށް އިމިގްރޭޝަން ބުނެފިއެވެ.

އިމިގްރޭޝަން އިން ބުނީ އެމީހުން ޑީޕޯޓު ކުރެވުނު އިރު އެމީހުންގެ މައްޗަށް ކުރެވިފައިވާ ތުހުމަތުތަކުގެ މައުލޫމާތު ލިބިފައި ނުވާ ކަމަށެވެ.

މިހެން ދެންނެވުމުން ވިލިމާލޭ ދާއިރާގެ މެމްބަރު އަހްމަދު އުޝާމް ވަނީ އެމީހުންގެ މައްޗަށް ކުރެވިފައިވާ ތުހުމަތުގެ މައުލޫމާތު ޓްވިޓަރގައި އިމިގްރޭޝަން އިން އާންމު ކުރި ކަމަށާއި އިމިގްރޭޝަންގެ ބޭފުޅުން ކޮމެޓީ ބައްދަލުވުމުގައި އިތުރުފުޅު ހައްދަވާކަމަށް ތުހުމަތުކުރައްވާފައެވެ.

މި ސުވާލަށް ޖަވާބުދެމުން އިމިގްރޭޝަނުން ބުނީ ޝަފީގުލް އިސްލާމް ފޮނުވާލުމާއި ގުޅިގެން އިމިގްރޭޝަންގެ ޓްވިޓަރ މެދުވެރިކޮށް އާއްމު ކުރި މައުލޫމާތުގައި ވަނީ އޭނާއަކީ ގަވާއިދާއި ޚިލާފަށް ވިޔަފާރި ކުރުމާއި "ފްރޮޑިއުލެންޓްރީ" ރެކްރޫޓްމެންޓާއި އިމިގްރޭޝަންގެ ގަވާއިދާ ޚިލާފްވެފައިވާ މީހެއް ކަމެވެ. އިމިގްރޭޝަން އިން ބުނީ އެ ޓްވީޓުގައި ބޭނުންކޮށްފައިވާ ބަހަކުން އޮޅުން އެރުން އެކަށިގެންވާ ކަމަށެވެ. "ފްރޮޑިއުލެންޓް ރިކްރޫޓްމެންޓް" ގައި މާނަ ކޮށްފައިވަނީ ގަވާއިދާ ޚިލާފަށް ވަޒީފާ ހަމަޖައްސައިދިނުން ކަމަށެވެ. އަދި އެއްގޮތަކަށް ވެސް އެއީ ހިއުމަން ޓްރެފިކިންގް ގޮތުގައި މާނައެއް ނުކުރެވޭނެ ކަމަށެވެ.

އެމީހުން ޑީޕޯޓްކުރުމުން ތަހުގީގަށް ދިމާވާ ދަތިތަކާއި ގުޅިގެން ސުވާލުކުރުމުން ފުލުހުން ބުނީ މިހާރު ހުރި ތުހުމަތުތަކަށް ބަލާލާއިރު އަބޫ ހަނީފް ރާއްޖެއިން ބޭރުގައި ހުރުމުން، އޭނާއާ ސުވާލު ކުރެވޭނެ ކަމަކަށް ގަބޫލު ނުކުރާ ކަމަށެވެ.

ފުލުހުން ބުނީ އަބޫ ހަނީފްގެ މައްސަލަ ތަހުގީގު ކުރަން ފަށާފައިވަނީ އޭނާ ޑީޕޯޓު ކުރެވުނު ފަހުން، ސޯޝަލް މީޑީއާއިންނާއި އެހެނިހެން ގޮތްގޮތުން ލިބިފައިވާ މައުލޫމާތުގެ މައްޗަށް ކަމަށެވެ. އަދި ތަހުގީގު ދާވަރަކުން، އޭނާގެ މައުލޫމާތު މުހިއްމުވަނީ ކިހާވަރަކަށްތޯ ބެލުމަށް ފަހު އިންޓަޕޯލްގެ އެހީތެރިކަންވެސް ހޯދާނެކަމަށެވެ.

ކޮމެޓީ ބައްދަލުވުމުގައި އިމިގްރޭޝަނުން ބުނީ ބިދޭސީންގެ ކަންކަމަކީ ހަމައެކަނި އިމިގްރޭޝަން އަށް ކުރެވޭ ވަރަށް ވުރެ މާބޮޑު ކަމެއް ކަމަށެވެ. އެގޮތުން މިޙާރު މަސައްކަތް ކުރަމުން ގެންދަނީ ކަމާއިބެހޭ ހުރިހާ ފަރާތްތަކާއި ގުޅިގެން ކަމަށެވެ. އަދި ފުލުހުންގެ ފަރާތުން ލިބެމުންދާ އެއްބާރުލުން އިމިގްރޭޝަން އިން ވަނީ ފާހަގަކޮށްފައެވެ.