އެގްރީމަންތައް ބާތިލްކޮށްގެން ދައުލަތަށް ގެއްލުންދިން މީހުންނާ ސުވާލު ކުރަންޖެހޭ: އަލީ ވަހީދު
ރާއްޖޭގައި އިންވެސްޓްކުރަން ރިކޮމެންޑް ނުކުރާނެ ކަމަށް ވިލާ ރިސޯޓްގެ ވެރިޔާ ވިދާޅުވެފައިވޭ
ޓޫރިޒަމް މިނިސްޓަރު އަލީ ވަހީދު، މިއަދު ބޭއްވި މާލިއްޔަތު ކޮމެޓީގެ ބައްދަލުވުމުގައި
ދައުލަތުން އެކިއެކި ފަރާތްތަކާއެކުވެފައިވާ އެއްބަސްވުންތައް ބާތިލްކުރުމާ ގުޅިގެން ދައުލަތަށް ލިބެމުންދާ ގެއްލުންތައް ޒިންމާވާންޖެހޭ ފަރާތެއް ހުންނަންޖެހޭނެ ކަމަށާއި އެފަދަ ގެއްލުންތައް ދިން ފަރާތްތަކާ ސުވާލުކޮށް، ޖަވާބުދާރީކޮށް، އިންސާފުގެ ކުރިމައްޗަށް ހާޒިރު ކުރުމަށް ޓޫރިޒަމް މިނިސްޓަރު އަލީ ވަހީދު ގޮވާލައްވައިފި އެވެ.
ދައުލަތުން އެކި ފަރާތްތަކާއެކުވާ އެއްބަސްވުންތަކުގެ ދަށުން އަދާކުރަންޖެހޭ މާލީ އިލްތިޒާމްތަކާމެދު ގެންގުޅޭ އުސޫލުތައް މުރާޖައާކޮށް، ދައުލަތަށް ބުރަނުވާނޭ އުސޫލެއް ގާއިމުކުރުމަށް ގޮވާލާ ތުޅާދޫ ދާއިރާގެ މެމްބަރު ހިސާން ހުސައިން ހުށަހަޅުއްވާފައިވާ ގަރާރާ ގުޅޭގޮތުން، ޓޫރިޒަމް މިނިސްޓަރު އަލީ ވަހީދުއާއި އެމިނިސްޓްރީގެ އިސްވެރިންނާއެކު އަންގާރަ ދުވަހު ރައްޔިތުންގެ މަޖިލީހުގެ މާލިއްޔަތު ކޮމެޓީން ބޭއްވި ބައްދަލުވުމުގައި އަލީ ވަހީދު ވަނީ އެކިއެކި ފަރާތްތަކާއެކު ދައުލަތުން ވެފައިވާ އެއްބަސްވުންތައް ބާތިލް ކުރުމުގެ ސަބަބުން ދައުލަތަށް ވަރަށް ބޮޑެތި ގެއްލުންތަކެއް ވަމުންދާ ކަމަށާއި އެކަަންކުރި ފަރާތްތައް ކޮމެޓީއަށް ހާޒިރުކޮށް ޖަވާބުދާރީ ކުރެއްވުމަށް އަލީ ވަހީދު އެދިވަޑައިގެންނެވި އެވެ.
އަލީ ވަހީދު ވިދާޅުވީ ބޭރުގެ އިންވެސްޓަރުންގެ އެންމެ ބޮޑު ކަންބޮޑުވުން އޮތީ ރާއްޖޭގެ ޖުޑިޝަރީއާމެދު ކަމަށާއި އެހެންކަމުން ބައެއް އިންވެސްޓަރުން ރާއްޖޭގައި އިންވެސްޓް ކުރަން ދެކޮޅު ހަދަމުންދާ ކަމަށެވެ.
އަލީ ވަހީދު ވަނީ ދާދިފަހުން ވެލާ ރިސޯޓުގެ މައްސަލައެއް ފެންމަތިވެ، އެކުންފުނީގެ ވެރިޔާގެ ވާހަކަވެސް ކޮމެޓީގައި ހިއްސާކޮށްދެއްވާފަ އެވެ.
އަލީ ވަހީދު ވިދާޅުވީ ޓޫރިޒަމްގެ ދާއިރާއިން މިހާރު ތަރައްގީކުރަން ނިންމާފައިވާ 70 ރަށް ތަރައްގީ ކުރަންފެށުމާއި، އަދި އިންވެސްޓަރުންނަށާއި ރާއްޖޭގެ ރައްޔިތުންނަށް ރާއްޖޭގެ ޖުޑިޝަރީއަކީ އިތުބާރު ކުރެވޭ ތަނެއްގެ ގޮތުގައި ވީހާވެސް އަވަހަކަށް ދެއްކުމަށް މަޖިލީހުން އަވަސް ފިޔަވަޅުތަކެއް އަޅުއްވާ ދެއްވުމަށް ވެސް އަލީ ވަހީދު އެދިލެއްވި އެވެ.
