މަޤާމުން އިސްތިއުފާދެއްވިނަމަވެސް، ކޮމިޝަންތަކުގައި ތިއްބަވައި ކުރެއްވި ކަންތައްތަކަށް އަދަބު ލިބޭނެ ނިޒާމެއް ޤާއިމްކުރަންޖެހޭކަމަށާއި، ޤާނޫނާއި ހިލާފުވި ފަރާތްތައް އިސްތިއުފާދެއްވުމުން ސަލާމަތްވުމުގެ ފުރުސަތު ލިބިގެން ނުވާނެކަމަށް ގަމު ދާއިރާގެ މެމްބަރު މުހައްމަދު ވިސާމް ވިދާޅުވެއްޖެ އެވެ.
ބްރޯޑްކާސްޓިންގ ކޮމިޝަންގެ ނައިބް ރައީސާގެ އިތުބާރު ނެތްކަމުގެ މައްސަލާގައި ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަދައްކަވަމުން ވިސާމް ވިދާޅުވީ މިނިވަން މުއައްސަސާތަކަށް އައްޔަންކުރައްވާ ބޭފުޅުންނާއި ހަވާލުކުރެވޭ މަސްއޫލިއްޔަތުތައް އެންމެ ރަނގަޅަށް އަދާކުރައްވާ މަންޒަރު ނުފެންނަ ކަމަށެވެ. އެގޮތުން ސަބް ކޮމެޓީން މައްސަލަ ތަހުޤީޤްކުރިއިރު ކަންބޮޑުވާ މިންވަރަށް އެބޭފުޅުން، ރައީސް އަބްދުﷲ ޔާމީންގެ ސަރުކާރުގައި ކަންތައްތައްކޮށްފައިވާކަން ހާމަވާކަމަށެވެ.
އިތުބާރުނެތްކަމުގެ މައްސަލަ ހުށަހެޅުމާއެކު ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބް އިސްތިއުފާދެއްވިކަން ފާހަގަކޮށް ވިސާމް ވިދާޅުވީ މަޤާމުން އިސްތިއުފާ ދެއްވުމަކީ ކުރެއްވި ކުށްތަކުން ސަލާމަތްވެވޭނެކަމެއް ނޫން ކަމަށެވެ. އަދި މިހާރަށްވުރެ ރަނގަޅަށް އެބޭފުޅުން ކުރައްވާ ކުށްތަކަށް ޒިންމާވާންޖެހޭނެގޮތަކަށް ޤާނޫނުތަކަށް ބަދަލުގެންނަންޖެހޭކަމަށް ވިސާމް ވިދާޅުވި އެވެ.
މިވަގުތު އޭރު ބްރޯޑްކާސްޓިންގ ކޮމިޝަންގެ ރައީސް ޝަހީބް އިސްތިއުފާ ދެއްވިނަމަވެސް، ޝަހީބް ޤާނޫނާއި، ގަވަިއދައި ހިލާފަށް އޭރު، ކަނޑައެޅިގެން އަޅުގަނޑުމެންނަށް ލޮލަށް ފެންނަން ހުއްޓަ ކޮށްފަ ހުރި ކަންކަން އެބަޖެހޭ ބެލެން.ގަމު ދާއިރާގެ މެމްބަރު މުހައްމަދު ވިސާމް
ވިސާމް ވިދާޅުވީ ހަމައެގޮތަށް އޭސީސީގެ ރައީސް ކަމުގައި ހުއްޓަ، މައްސަލަ ބަލަން ފެށުމާއެކު އިސްތިއުފާދެއްވި އޭރުގެ އެ ކޮމިޝަންގެ ރައީސް ހަސަން ލުތުފީ ފަދަ މެމްބަރުންގެ މައްސަލަތައްވެސް ބެލޭނެ ގޮތެއް ހޯދަންޖެހޭކަމަށެވެ. އަދި މަޤާމުން އިސްތިއުފާ ދެއްވުން އެއީ ހިންގެވި ޖަރީމާތަކަށް އިންސާފު ލިބުން ނޫންކަމަށްވެސް ވިސާމް ވިދާޅުވި އެވެ.
ވިސާމް ވިދާޅުވީ އެ ބޭފުޅުންނަކީ ރައީސް ޔާމީންގެ ވެރިކަމުގައި ކަނޑައެޅިގެން ގަދަ ބަސް ބުނުމަށްފަހު، ކަނޑައެޅިފައިވާ ޤާނޫނުތަކާއި، ގަވައިދުތަކާއި ހިލާފަށް ރައްޔިތުންނަށް އަނިޔާދިން ފަރާތްތައް ކަމަށެވެ. އަދި މިނިވަން މުއައްސަސާތަކުގައި ތިއްބެވި ފަރާތްތައް 18 ވަނަ ރައްޔިތުންގެ މަޖިލީހުގެ މެމްބަރުން ވިދާޅުވިގޮތަށް ނިންމުންތައް ނިންމާފައިވާކަމަށްވެސް އިއުތިރާފްވެފައިވާކަމަށް ވިސާމް ވިދާޅުވި އެވެ.
19 ވަނަ ރައްޔިތުންގެ މަޖިލީހުން މައްސަލަ ބަލަން ފެށުމާއެކު ގިނަ މެމްބަރުންތަކެއް ވަނީ އަމިއްލަފުޅަށް މަޤާމުން އިސްތިއުފާދެއްވާފަ އެވެ. އެގޮތުން އޭސީސީގެ ކުރީގެ ރައީސް ހަސަން ލުތުފީ އާއި، ބްރޯޑްކާސްޓިން ކޮމިޝަންގެ ކުރީގެ ރައީސް މުހައްމަދު ޝަހީބާއި، ބްރޯޑްކާސްޓިންގ ކޮމިޝަންގެ ކުރީގެ ނައިބް ރައީސް އިިސްމާއިލް ސޮފްވާންވެސް އިސްތިއުފާދެއްާފައިވެއެވެ.
