ފްރާންސް ގައުމީ ޓީމާއެކު ހަދާފައިވާ އެއްބަސްވުން ކޯޗު ޑިޑިއޭ ޑިޝޯމްޕްސް އާކުރަން އުޅޭ ކަމަށް ރިޕޯޓްތައް ބުނެފިއެވެ.
ފްރާންސްގެ ނޫސްތަކުން ބުނީ، ފްރާންސްއާއެކު ޑިޝޯމްޕްސް ހަދާފައިވާ އެއްބަސްވުން އަންނަ އަހަރު ހަމަވާއިރު، އާ އެއްބަސްވުމުގެ ދަށުން 2022 ގެ ނިޔަލަށް އޭނާ ޓީމުގައި މަޑުކުރަން ޖެހޭނެ ކަމަށެވެ.
ފްރާންސް ގައުމީ ޓިމާ 2012 ވަނަ އަހަރު ހަވާލުވި ޑިޝޯމްޕްސްގެ އިރުޝާދާއެކު މިހާތަނަށް ފްރާންސް 97 މެޗު ކުޅެފައިވާއިރު، އޭގެ ތެރެއިން 63 މެޗުން އެޓީމު ވަނީ މޮޅުވެފައެވެ. ބާކީ 17 މެޗުން އެޓީމު ބަލިވިއިރު، އަނެއް 17 މެޗު ނިމުނީ އެއްވަރުވެގެންނެވެ.
ޑިޝޯމްޕްސްގެ އިރުޝާދުގެ ދަށުން 2016 ވަނަ އަހަރުގެ ޔޫރޯގެ ދެވަނަ ފްރާންސް ހޯދާފައިވާއިރު، މިދިޔަ އަހަރު ރަޝިއާގައި ބޭއްވި ފީފާ ވޯލްޑް ކަޕްގެ ޗެމްޕިއަންކަން އެޓީމުން ވަނީ ހޯދާފައެވެ.
ކުޅުންތެރިޔެއްގެ ގޮތުގައި ޔުވެންޓަސް އާއި މާސޭ އާއި ޗެލްސީ އަދި ވެލެންސިއާއާއެކު ކާމިޔާބީ ހޯދާފައިވާ ޑިޝޯމްޕްސް ވަނީ މޮނާކޯ އާއި ޔުވެންޓަސް އަދި މާސޭއަށް ކޯޗުކަން ކޮށްދީފައެވެ.
މީގެއިތުރުން ޑިޝޯމްޕްސް ވަނީ 2004 ވަނަ އަހަރު ފްރާންސް ލީގުގެ އެންމެ މޮޅު ކޯޗު ހޯދުމުގެ އިތުރުން 2018 ވަނަ އަހަރު ފީފާއިން ހޮވި އެންމެ މޮޅު ކޯޗުގެ މަގާމު ހޯދާފައެވެ.
