އެމްއާރުއެމް އުފެއްދުމުގެ ޖަލްސާ އަންނަ މަހުގެ 7 ގައި ބާއްވަނީ
ޖަލްސާ ބޭއްވުމަށް ހަމަޖެހިފައިވަނީ ނޮވެމްބަރު 7 ގައި ދަރުބާރުގޭގައި
އެމްއާރުއެމް އުފެއްދުމުގެ ހުއްދަ މިނިސްޓަރ ޔުމްނާ މައުމޫނާ ހަވާލުކުރަނީ
މޯލްޑިވްސް ރީފޯމް މޫވްމަންޓް (އެމްއާރްއެމް)ގެ ނަމުގައި ކުރީގެ ރައީސް މައުމޫން އަބްދުލް ގައްޔޫމް އިސްކޮށް ހުންނަވައި ސިޔާސީ ޕާޓީއެއްގެ ގޮތުގައި އުފެއްދުމަށް ބާއްވަން ޖެހޭ ޖަލްސާ ނުވެމްބަރު މަހުގެ 7 ވަނަ ދުވަހު ބާއްވަން ނިންމައިފިއެވެ.
ރާއްޖެއެމްވީއަށް މައުލޫމާތު ދެއްވަމުން އެމްއާރުއެމްގެ ސެކްރެޓަރީ ޖެނެރަލް އަބްދުﷲ އަލީމް ވިދާޅުވީ 300 މެމްބަރުންނާއެކު އަންނަ މަހުގެ 7 ވަނަ ދުވަހު ދަރުބާރުގޭގައި ބޭއްވުމަށް ހަމަޖެހިފައިވާ ޖަލްސާގައި ޕާޓީގެ އަސާސީ ގަވާއިދު ފާސްކުރުމުގެ އިތުރުން، ޖަލްސާއަށް ވަޑައިގަންނަވާ މެމްބަރުންގެ ތެރެއިން ޕާޓީ ހިންގުމަށްޓަކައި ވަގުތީ ކައުންސިލެއް އެކުލަވައިލާނެ ކަމަށެވެ. މީގެ އިތުރުން އެ ޖަލްސާގައި ޕާޓީގެ ދިދަ އާއި ލޯގޯ ފާސްކުރާނެ ކަމަށް އަލީމް ވަނީ ވިދާޅުވެފައެވެ.
އެމްއާރުއެމް އުފެއްދުމަށް ހުއްދަ ދޫކޮށްފައިވަނީ އެޕާޓީ އުފެދުމަށް ހުއްދައަށް އެދިވަޑައިގެންނެވި މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖު ޔުމްނާ މައުމޫނަށެވެ. ޔުމްނާގެ ބައްޕާފުޅު އަދި ކުރީގެ ރައީސް މައުމޫން އަބްދުލްގައްޔޫމް އިސްވެ ހުންނަވައިގެން އުފައްދަވާ ޕާޓީ، އެމްއާރުއެމް އުފެއްދުމަށް ފުރަތަމަ ހުއްދައަށްއެދިލެއްވީ ހަޔަ އެޑިޔުކޭޝަން މިނިސްޓަރު ޑރ އިބްރާހީމް ހަސަން (ޗަބީ) ނަމުގައެވެ. އެއީ މިއަހަރުގެ ފެބްރުއަރީ މަހުގެ 19 ވަނަ ދުވަހުއެވެ. ޕާޓީ އުފެއްދުމަށް އިލެކްޝަންސް ކަމިޝަނުން ދިން މުއްދަތު ހަމަވާން ކައިރި ވެފައިވަނިކޮށް ޑރ. އިބްރާހީމް ހަސަން ޕާޓީ އުފެއްދުމަށް އެދުނު ހުއްދަ ބާތިލްކުރުމަށް ހުށައެޅިއެވެ.
އޭގެ ފަހުން އެމްއާރުއެމްގެ ނަމުގައި ޕާޓީގެ ރެޖިސްޓްރީކުރުމުގެ ދެ ވަނަ ފަހަރަށް ހުއްދައަށް މެއި މަހުގެ 27 ގައި އެދިލެއްވީ ޔުމްނާއެވެ. ޕާޓީ އުފައްދަން ބޭނުންވާ އަދަދު ހަމަކޮށް، އެ ޕާޓީ އިން އިލެކްޝަންސް ކޮމިޝަނަށް ފޯމް ހުށަހަޅާފައިވަނީ އޮގަސްޓް 22 ވަނަ ދުވަހު 3313 މެމްބަރޝިޕް ފޯމާއެކުއެވެ.
ޔުމްނާ ވެގެންދާނީ ޕާޓީ އުފެއްދުމުގެ ހުއްދަ ލިބިވަޑައިގެންނެވި ފުރަތަމަ އަންހެން ބޭފުޅާއަށެވެ.
ސިޔާސީ ޕާޓީތަކުގެ ގަވައިދު ބުނާ ގޮތުން އިލެކްޝަންސް ކޮމިޝަނުގެ ދަފްތަރުގައި ރެޖިސްޓްރީ ކުރާ ނަމަ ސައްހަ 3،000 މީހުންގެ ސޮޔާއެކު ފޯމް ހުށަހަޅަންޖެހެއެވެ. އަދި އެ އަދަދު ހަމަވުމުން ޕާޓީ އުފެއްދުމުގެ ޖަލްސާ ބާއްވާ ޕާޓީގެ އިސް މަގާމުތައް ކަނޑައަޅާ މެމްބަރުން އައްޔަންކުރުމުން ޕާޓީ ރަޖިސްޓްރީ ވެގެންދާނެ ކަމަށް ވަނީ ބުނެފައެވެ.
