ވިސްނުންތެރިކަމާއެކު ކަންކަން ނުކޮށްފިނަމަ ރާއްޖެ ހަނގުރާމައިގެ ތެރެއަށް ވެއްޓިދާނެކަމަށް ރައީސް ނަޝީދު ވިދާޅުވެއްޖެ
ސަލާމަތުގެ އައްސޭރިއަކަށް މި ގައުމު ގެންގޮސްދިނުން އެއީ ފަރުދީ ޒިންމާއެއްކަމަށް ވިދާޅުވި
ރައީސް މުހައްމަދު ނަޝީދު އަހުމަދިއްޔާ ސްކޫލްގެ ދަރިވަރުންނާއި އިނާމް ހަވާލުކޮށްދެއްވަނީ
ވިސްނުންތެރިކަމާއި އެކު ކަންކަން ނުކޮށްފިނަމަ ދިވެހިރާއްޖެ ހަނގުރާމައިގެ ތެރެއަށް ވެއްޓިދާނެކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހޮނިހިރު ދުވަހުގެރޭ އަހުމަދިއްޔާ ސްކޫލްގެ އިނާމުދިނުމުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ޓީވީތަކުން ފެންނަ ފަދައިން މި މާލެ ހަނގުރާމައިގެ ތެރެއަށް ވެއްޓިދާ މަންޒަރު ނުފެންނާނެ ކަމަށް ހީކޮށްގެން ނުވާނެ ކަމަށެވެ.
ބުއްދިވެރި ކަމާއި، ވިސްނުންތެރިކަމާއި އެކުގައި ކަންކަން ނުގެންގޮސްފިނަމަ ޚަރާބުގެ އައްސޭރިއަށް މި ޖީލު ގޮސްދާނެ ކަމަށް ފެނިވަޑާއިގަންނަވާ ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ މި ގައުމު އޮތީ ހަތަރު އަނގޮޅިއެއްގެ ކަންމަތީގައި ކަމަށާއި ސަލާމަތުގެ އައްސޭރިއަކަށް މި ގައުމު ގެންގޮސްދިނުން އެއީ ފަރުދީ ޒިންމާއެއް ކަމަށެވެ.
ގައުމުގެ މިސްރާބު މިއަދު އޮތީ އަޅުގަނޑުމެން ނިންމާ ނިންމުންތަކެއްގެ މައްޗަށް ކަމަށާއި އެގޮތުން ރަނގަޅާއި ނުބައި ބުނެދޭން އެތައް ބަޔަކު ނުކުންނާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ނަޝީދު ވިދާޅުވީ އަޅުގަނޑުމެންގެ ތެރޭގައި އެއްބަޔަކު އަނެއްބަޔަކަށް ވަރަށް އަނިޔާވެރި ވާހަކަ ދައްކަން ފަށާފައިވާ ކަމަށެވެ.
ނަމަވެސް އެ ޚިޔާލު ތަފާތުވުން ތަކާއި އެކުގައި އެންމެނަށް އެކުގައި އުޅެވެން ޖެހޭނެކަމަށް ވިދާޅުވިއެވެ.
އެގޮތުން ހިޔާލު ތަފާތުވިއަސް އެކުގައި އުޅެވެން ޖެހޭނެކަމަށް ވިދާޅުވެ އެމަނިކުފާނު ވަނީ އަހުމަދިއްޔާގެ ދަރިވަރުންނަށް ނަސޭހްވެސް ދެއްވާފައެވެ.
