އަހުމަދިއްޔާ ސްކޫލުގެ އެންމެ މޮޅު ދަރިވަރުންނަށް ސަނީ އަދި ރަސަލް
ޖަލްސާ ޝަރަފުވެރިކޮށްދެއްވީ ކުރީގެ ރައީސް ނަޝީދު
އަހުމަދިއްޔާ ސްކޫލްގެ އިނާމު ދިނުމުގެ ޖަލްސާގެ ތެރެއިން
އަހުމަދިއްޔާ އިންޓަނޭޝަނަލް ސްކޫލުން މިދިޔަ އަހަރު ހުރިހާ ގޮތަކުން ސެކަންޑްރީ އިން އެންމެ މޮޅު ދަރިވަރަކަށް އަހުމަދު ރަސަލް ތަސްލީމް އަދި ހަޔަރ ސެކަންޑްރީ އިން އެންމެ މޮޅު ދަރިވަރަކަށް ހުސައިން ސަނީ ހޮވިއްޖެއެވެ.
ދަރުބާރުގޭ ރަންނަ ބަނޑޭރިމާލަމުގައި ހޮނިހިރު ދުވަހުގެ ރޭ ބޭއްވި އަހުމަދިއްޔާ ސްކޫލްގެ މިދިޔަ އަހަރުގެ އިނާމު ދިނުމުގެ ޖަލްސާގައި ރަސަލް އަދި ސަނީ އަށް އެވޯޑްތައް ހަވާލުކޮށްދެއްވީ ޖަލްސާގެ ޝަރަފުވެރި މެހެމާނު ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް އަލްފާޟިލް މުހައްމަދު ނަޝީދުއެވެ.
ހޮނިހިރު ދުވަހުގެ ރޭ ދަރުބާރުގޭ ގައި ބޭއްވި އެ ޖަލްސާގައި ރައީސުލްޖުމްހޫރިއްޔާ ދެއްވާ ޚާއްސަ އިނާމާއި އެޑިއުކޭޝަން މިނިސްޓްރީން ދޭ ޓްރޮފީއާއި، އަހުމަދިއްޔާ ސްކޫލް އުފެދުމުގެ ބާނީ އަލްމާރުހޫމް ޑރ. އަހުމަދު ދީދީގެ އާއިލާއިން ދޭ ހާއްސަ އިނާމާއި ޑރ. އަހުމަދު ދީދީ އެވޯޑާއި، ހަނދާނީ ފިލާއާއި އަހުމަދިއްޔާ ސްކޫލުން ދޭ އިނާމާއި މެޑެއްޔާއި ޓްރޮފީ ރަސަލް އާއި ސަނީ އަށް ހޮނިހިރު ދުވަހުގެ ރޭ ބޭއްވި ޖަލްސާގައި ވަނީ އަރުވާފައެވެ.
އެ ޖަލްސާ ޝަރަފްވެރި ކޮށްދެއްވައި ވާހަކަފުޅު ދައްކަވަމުން ނަޝީދު ވިދާޅުވީ، ބުއްދިވެރިކަމާއެކު ވަރަށް ވިސްނުންތެރިކަމާއެކު ކަންކަން ކުރިޔަށް ނުގެންގޮސްފި ނަމަ މާލެ ސުންނާފަތިވެފައިވާ ގައުމުތަކުގެ ލިސްޓަށް ވެއްޓިދާނެ ކަމަށެވެ.
އިތުރަށް ނަޝީދު ވިދާޅުވީ، ރަނގަޅާއި ނުބައިގެ ހިޔާލު ތަފާތުފުން މިހާރު އިންތިހާއަށް ގޮސްފައިވާ ކަމަށާއި އެންމެންގެ ހިޔާލު އެއްގޮތް ނުވި ނަމަވެސް އެ ހިޔާލު ތަފާތުވުންތަކާއެކީ ވެސް އެންމެން ގުޅިގެން އުޅެން ޖެހޭނެ ކަމަށެވެ.
ނަޝީދު ވަނީ އަހުމަދިއްޔާ ސްކޫލުން އިނާމު ހާސިލްކުރި ހުރިހާ ކުދިންނަށް މަރުހަބާ ކިޔައި އެ ސްކޫލްގައި ކިޔަވައި ހުރިހާ ކުދިންނަށް އުފާ ފާގަތި ދުވަސްތަކަކަށް އެދިފައެވެ.
