2015 ގައި ނެރިފައިވަނީ ތަފާތު ރިޕޯޓެއް
ޕީޕީއެމް ޕީއެންސީގެ މަޖިލިސް މެންބަރުން ނޫސްވެރިންނާ ބައްދަލުކުރައްވަނީ
މޯލްޑިވްސް ޑިމޮކްރަޓިކް ނެޓްވޯކްއިން ނެރުނު އިސްލާމްދީނާ ހިލާފް ވާހަކަތައް ހިމެނޭ ރިޕޯޓާއި ގުޅިގެން، އެ ޖަމިއްޔާގެ މެންބަރުންނާ މެދު ފިޔަވަޅު ނޭޅުމަކީ ރައީސް އިބްރާހިމް މުހައްމަދު ސޯލިހު ޒިންމާއަދާ ނުކުރެއްވުން ކަމަށް އިދިކޮޅު ޕީޕީއެމްގެ ނައިބް ލީޑަރު އަހުމަދު ޝިޔާމް ވިދާޅުވެއްޖެއެވެ.
ނައިފަރު ދާއިރާގެ މެންބަރުކަން ވެސް ކުރައްވާ ޝިޔާމް ބުދަ ދުވަހު މަޖިލިސްކުރާ ގޭގެ ކުރިމަތީގައި ހުންވައިގެން މީޑިއާއާ ބައްދަލުކުރައްވާ ވިދާޅުވީ ރައީސް ސޯލިހުގެ ބާނުގައި 2015 ވަނަ އަހަރު ނެރުނު އެސެސްމަންޓް ރިޕޯޓެއްކަމަށް ފާހަގަކުރެއްވި ރިޕޯޓަކީ އެއީ މުޅިން ނުބައި މައުލޫމާތެއް ކަމަށެވެ. އަދި 2015 ވަނަ އަހަރު އެމްޑީއެންއިން ޕަބްލިޝްކޮށްފައި ވަނީ "ލަވް އޮފް އިސްލާމް ވާސަސް ހޯލީ ވަރ" ނަމަކަށް ކޔާ ރިޕޯޓެއް ކަމަށާއި، އެއީ މިހާރު ފެންމަތިވެގެން އުޅޭ ރިޕޯޓެއް ނޫން ކަމަށެވެ.
މިހާރު ފެންމަތިވެގެން މިއުޅޭ ރިޕޯޓަކީ މި ފަހުން ޕަބްލިޝްކޮށްގެން އުޅޭ ރިޕޯޓެއް ކަމަށާއި، މި ރިޕޯޓުގައި ދިވެހި ރައްޔިތުން ކަންބޮޑުވާ އެތައް ކަމެއް އެބަހުރި ކަމަށް ޝިޔާމް ވިދާޅުވިއެވެ. އަދި ދިވެހި ރައްޔިތުންގެ ކަންބޮޑުވުން އެތައް ދުވަހެއް ވަންދެން ފާޅުކުރަމުން އައިސް އެކިއެކި ޕްލެޓްފޯމްތަކުގައާއި، ސޯޝަލް މީޑިއާގައާއި އަދި އެކި ޒަރިއްޔާތަކުން ސަރުކާރަށް އެވާހަކަތައް އިއްވަން މަސައްކަތް ކޮށް އެންމެފަހުން ދީނީ އިލްމުވެރިންނާ ބައްދަލުކުރެއްވީ ރައީސަށް މަޖުބޫރުވެގެން ކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ އެމްޑީއެން އުވާލި ނަމަވެސް އެ ޖަމިއްޔާގެ މެންބަރުން ސަރުކާރުގެ ތެރޭގައި އެބަތިބި ކަމަށެވެ. އެގޮތުން ރައީސް އޮފީހުގައި ޓެރަރިޒަމް ކޮންސަލްޓެންޓުންގެ ގޮތުގައި ބޮޑެތި މުސާރަ ދީފައި ތިބި މީހުން އެ ޖަމިއްޔާއަށް ނިސްބަތްވާ ކަމަށެވެ. އަދި އޭގެ އިތުރުން ދައުލަތުގެ އެހެން މުއައްސަސާތަކުގައި އިސްވެރިންގެ ގޮތުގައި އެ ބޭބޭފުޅުން އެބަތިއްބެވި ކަމަށެވެ.
މި މައްސަލައިގައި ހަރުދަނާ ޒިންމާދާރު ފިޔަވަޅެއް އެޅުއްވިކަމަށްވާނީ އަދި ރައީސަށް ލާޒިމްކުރާ ކަންތައްތަކުގެ ޒިންމާ ނެގުނު ކަމަށްވާނީ އެ ޖަމިއްޔާއަށް ނިސްބަތްވާ ބޭފުޅުންނަށް ފިޔަވަޅު އަޅުއްވައިގެން ކަމަށް ޝިޔާމް ވިދާޅުވިއެވެ.
ރައީސް ނެރުއްވި ބަޔާނަކީ އިލްމުވެރިންނަށް މަލާމާތް ކުރައްވާ ނެރުއްވި ބަޔާނެއް ކަމަށާއި، ފެނިގެން ދިޔައީ ޒިންމާދާރުކަން ކުޑަ ސަރުކާރެއްގެ ރައީސަކު ކަންތައްކުރެއްވިތަން ކަމަށް ޝިޔމް ވިދާޅުވިއެވެ.
މަހިބަދޫ ދާއިރާގެ މެންބަރު އަހުމަދު ތޯރިގު ވިދާޅުވީ 2014 ވަނަ އަހަރުގެ ޑިސެމްބަރު މަހުން ފެށިގެން 2015 ވަނަ އަހަރުގެ މާޗް މަހާ ހިސާބަށް އެމްއެންޑީ އިން ނެރެފައިވާ ރިޕޯޓަކީ "ލަވް ފޮރ އިސްލާމް ވާސެސް ހޯލީ ވަރ" ކަމަށެވެ. އަދި އެއީ މިހާރު އާންމުވެގެން އުޅޭ ރިޕޯޓް ނޫން ކަމަށެވެ.
އެމްޑީއެންގެ ރިޕޯޓެއްގައި އިސްލާމްދީނާ ހިލާފް ވާހަކަތަކެއް ހިމެނި މައްސަލައެއް ދާދި ފަހަކުން ފެންމަތިވިއިރު، އޭރު އެ ޖަމިއްޔާގައި މަސައްކަތް ކުރެއްވި ބައެއް ބޭފުޅުން ސަރުކާރުގެ އިސް މަގާމުތަކުގައި ތިއްބެވުމުން އެ މަގާމުތަކުން އެ ބޭފުޅުން ވަކިކުރުމަށް ގޮވާލައި މަޖިލީހަށް މިއަދު ހުށަހެޅިއެވެ. ނަމަވެސް ބަލައިނުގަނެ މަޖިލީހުން ވަނީ އެ މައްސަލަ ބޭރުކޮށްލާފައެވެ.
