5 ރަށެއްގެ ގޮނޑުދޮށް ހިމާޔަތްކުރުމުގެ މަޝްރޫއު ރިޔަން ޕްރައިވެޓް ލިމިޓެޑް އާއި ހަވާލުކޮށްފި

5 ރަށެއްގެ ގޮނޑުދޮށް ހިމާޔަތް ކުރުމުގެ މަޝްރޫއު ރިޔަން ޕްރައިވެޓް ލިމިޓެޑް، އިން އެސޯސިއޭޝަން ވިތް ލަމެއަރ ގުރޫޕް އެންޑް ނިރާސް އޭ.އެސް (ޑެންމާކް) އާއި ހަވާލުކޮށްފިއެވެ.

އެ ކުންފުންޏައި ހަވާލުކޮށްފައިވަނީ މ. މުލައް، މ. ދިއްގަރު، މ. ކޮޅުފުށި، ތ. ބުރުނީ އަދި ތ. ވަންދޫގެ ގޮނޑުދޮށް ހިމާޔަތްކުރުމުގެ މަޝްރޫޢުގެ ޑިޒައިން އަދި އީ.އައި.އޭގެ މަސައްކަތް ކުރުމަށެވެ.

ޕްލޭނިންގް މިނިސްޓްރީއިން ބުނީ މި މަޝްރޫއު ކުރިއަށް ގެންދެވެނީ ދެ ޕެކޭޖަކަށް ބަހާލެވިގެން ކަމަށެވެ. އެގޮތުން ފުރަތަމަ ޕެކޭޖްގައި ހިމެނެނީ މ. މުލައް، މ. ދިއްގަރު، މ. ކޮޅުފުށީގެ ގޮނޑުދޮށް ހިމާޔަތްކުރުމުގެ މަޝްރޫޢުގެ ޑިޒައިން އަދި އީ.އައި.އޭގެ މަސައްކަތް ކަމަށެވެ. އެގޮތުން މ،ި މަޝްރޫއު ހަވާލުކޮށްފައިވަނީ 1,917,700.59 ރުފިޔާ އަށެވެ.

ދެވަނަ ޕެކޭޖްގައި ހިމެނެނީ ތ. ބުރުނީ އަދި ތ. ވަންދޫގެ ގޮނޑުދޮށް ހިމާޔަތްކުރުމެވެ. މި މަޝްރޫޢުގެ ޑިޒައިން އަދި އީ.އައި.އޭގެ މަސައްކަތް ހަވާލުކޮށްފައިވަނީ 1,624,712.88 ރުފިޔާ އަށެވެ. މި މަސައްކަތް ހަވާލުކުރެވިފައިވަނީ 12 ހަފްތާގެ ތެރޭގައި ނިންމުމަށެވެ.