އެމްޑީއެންގެ ރިޕޯޓާއި ގުޅިގެން އެއްވުމެއް ބާއްވަން އުޅޭ ކަމެއް އެނގިފައެއް ނެތް: ފުލުހުން

ހުކުރު ދުވަހު މާލެ ސިޓީގައި އެއްވުމެއް ބާއްވަން އުޅޭކަމެއް އެނގިފައިނުވާ ކަމަށް ފުލުހުން ބުނެފިއެވެ.

މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) އިން ނެރެފައިވާ ރިޕޯޓުގައި އިސްލާމްދީނާއި ރަސޫލާއަށް ނިޞްބަތްކޮށް ފުރައްސާރަ ކޮށްފައިވާކަމަށް ބުނެ ދީނީ ޢިލްމުވެރިން އިސްނަގައިގެން އެއްވުމެއް ބާއްވަން އުޅޭ ކަމަށް ޓްވިޓަރގައި ވަނީ އަޑުފެތުރިފައެވެ.

އެކަމާއި ގުޅޭގޮތުން ފުލުހުން ބުނީ، އެފަދަ އެއްވުމެއް ބާއްވަން އުޅޭ ކަމުގެ މައުލޫމާތު މިހާތަނަށް ލިބިފައިނުވާ ކަމަށެވެ. އެހެން ނަމަވެސް، އެއްވުމެއް ބާއްވާނަމަ ޞުލްޙަވެރިކަމާއެކު ޤާނޫނާ އެއްގޮތަށް އެއްވުން ކުރިޔަށް ގެންދިޔުމަށް ފުލުހުން ވަނީ އިލްތިމާސް ކޮށްފައެވެ.

އެމްޑީއެންގެ ރިޕޯޓާގުޅިގެން ޢާއްމުންގެ ފާޑު ކިޔުންތައް ޢަމާޒުވުމުން އެ ރިޕޯޓް ނެގުމަށް ފަހު އެ ޖަމިއްޔާއިން ވަނީ މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ. އެ ރިޕޯޓުގެ މައްސަލަ އިސްލާމިކް މިނިސްޓްރީން ބުރާސްފަތި ދުވަހު ވަނީ ފުލުހުންނަށް ހުށަހަޅާފައެވެ. އަދި ފުލުހުން ވެސް ވަނީ އެ މައްސަލަ ހުށަހަޅާފައިވާކަން ކަށަވަރުކޮށްދީފައެވެ.

މީގެ އިތުރުން، އެ ޖަމިއްޔާގެ މެންބަރުންނަށް ބިރު ދެއްކި މައްސަލަ އެއްވެސް ފުލުހަށް ވަނީ ހުށައަޅާފައެވެ.