އަނެއްކާވެސް ސްޓެލްކޯއިން ގޭގެޔަށް ލެޑް ބޮކި ހަވާލުކުރަނީ

ސަރުކާރުން ހަވާލުކޮށްފައިވާ ލެޑް ބޮކިތައް ސްޓެލްކޯއިން މީހުން ދިރުއުޅޭ ގޭބިސީތަކަށް ހަވާލު ކުރަން ޕްރޮގްރާމެއް ފަށައިފިއެވެ.

އެ ޕްރޮގްރާމް ފަށައި މީޑިއާ ތަކަށް މައުލޫމާތު ދެއްވަމުން ސްޓެލްކޯގެ އެޑްމިނިސްޓްރޭޓިވް ސްޕަވައިޒަރ މުހައްމަދު ވަހީދު ވިދާޅުވީ، ދެ ފަހަރެއްގެ މަތިން މިހާރުވެސް ލެޑް ބޮކޮތައް ބެހިފައިވާނެ ކަމަށާއި އަނެއްކާވެސް އެ ޕްރޮގްރާމް ފެށީ ބޮކިތަކަށް ހަވާލު ނުވެ ހުރި ގެތަކަށް އެ ބޮކިތައް ހަވާލުކުރުމަށް ކަމަށެވެ.

އޭނާ އިތުރަށް ވިދާޅުވީ، ބޮކިތައް ހަވާލުކުރަނީ މީހުން ދިރިއުޅޭ ގެތަކަށް ކަމަށާއި ސަރުކާރު ކުންފުނިތަކަށް ބޮކި ހަވާލު ނުކުރާ ކަމަށެވެ. އަދި މީހުން ދިރިއުޅޭ ގެތަކުގައި ބޭނުން ކުރާ ކޮންމެ މީޓަރަކަށް ދެ ބޮކި ހަވާލު ކުރާނެ ކަމަށާއި މިވަގުތު ހަމައެކަނި ބޮކި ދޫކުރާނީ ސްޓެލްކޯއިން އެކަނި ކަމަށެވެ. އޭނާ ވަނީ ބޮކި ނުލިބިހުރި ގޭބިސީތަކުން އަވަހަށް ބޮކިތަކަށް ހަވާލުވުމަށް އެދިފައެވެ.

ވަހީދު އިތުރަށް ވިދާޅުވީ، ބޮކި ހަވާލުކުރުމުގެ އިތުރުން ސްޓެލްކޯގެ މޯބައިލް އެޕްލިކޭޝަން އާ ބެހޭގޮތުން މައުލޫމާތު ދެއްވާނެ ކަމަށާއި އެޕްލިކޭޝަންގެ ސަބަބުން ރައްޔިތުންނަށް ލިބިގެންދާނެ ލުއިތައް ބޮކި ހަވާލު ކުރާ ސްޓޯލަށް އައުމުން ކިޔައިދެއްވާނެ ކަމަށެވެ.

2018 ވަނަ އަހަރުގެ އެޕްރީލް މަހު ލޯންޗު ކުރި ސްޓެލްކޯގެ މޯބައިލް އެޕްލިކޭޝަން އާ ބެހޭގޮތުން ވަހީދު ވުދާޅުވީ، ފަސޭހަ ކަމާއެކު ބިލް ދައްކާލެވޭނެ ކަމަށާއި ގޭގައި ހުރެގެން ބިލަށް އަރާ ވަރު ކޮންމެ މަހަކުވެސް ބަލާލެވޭނެ ކަމަށެވެ. އަދި ކަރަންޓް ބޭނުން ކުރި ހިސްޓްރީ ވެސް ފަސޭހަ ކަމާއެކު ބަލާލެވޭނެ ކަމަށް ވެސް އޭނާ ވިދާޅުވިއެވެ.