ދީނީ ހަރުކަށި ފިކުރާ ދެކޮޅަށް ތަމްރީނު ކޮށްފައިވާ ޓީޗަރުން ސްކޫލުތަކުގައި ބަހައްޓަން ލާޒިމް ކުރަނީ
3 އޮކްޓޯބަރު 2019 | ބުރާސްފަތި 08:06މިސްކިތްތަކުގައި އިމާމުން ތިބި އަދަދު 2018 އާއި އަޅާބަލާއިރު 40 ޕަސެންޓް އިތުރު ކުރުން
މާލޭގެ ސްކޫލެއްގެ ގޯތިތެރެ
ދީނީ ހަރުކަށި ފިކުރާއި ދެކޮޅަށް ތަމްރީނު ކޮށްފައިވާ ޓީޗަރުން ކޮންމެ ސްކޫލެއްގައި ތިބުމަށް ސަރުކާރުގެ އެކްޝަން ޕްލޭންގައި ހިމަނައިފިއެވެ.
ރައީސް އިބްރާޙިމް މުހައްމަދު ސޯލިހު ބުދަ ދުވަހުގެރޭ އިފްތިތާހުކޮށްދެއްވި އެކްޝަން ޕްލޭން ހަދާފައިވަނީ ސަރުކާރުގެ މެނިފެސްޓޯގެ މައިގަނޑު ފަސް ވައުދު ކަމަށްވާ ނޫ އިގްތިސާދާއި އޯގާތެރި ސަރުކާރާއި ފަހުރުވެރި އާއިލާ އާއި ޖަޒީރާ ދިރިއުޅުމުގެ އިތުރުން ހެޔޮ ވެރިކަމަށެވެ.
އެ ޕްލޭނުގައި އިސްލާމީ އަގީދާ ކުރިއެރުވުމަށް މިސަރުކާރުން ހިމަނާފައިވާ ކަންތައްތަކުގެ ތެރޭގައި ދައުރު ނިމުމުގެ ކުރިން ރާއްޖޭގެ ކޮންމެ ސްކޫލެއްގައި ދީނީ ހަރުކަށި ފިކުރާއި ދެކޮޅަށް ތަމްރީނު ކޮށްފައިވާ ޓީޗަރުން ކޮންމެ ސްކޫލެއްގައި ތިބުމަށާއި، މަދުވެގެން އެއް ހައުސް ވިޒްޑަމް (ބައިތުލް ހިކްމާ) ޕަބްލިކް އެކަޑަމީ އެންޑް އިންޓެލެކްޗުއަލް ސެންޓަރ ގާއިމްކޮށް ޚިދުމަތްދޭން ފެށުން ވަނީ ހިމަނާފައެވެ. އަދި މިސްކިތްތަކުގައި އިމާމުން ތިބި އަދަދު 2018 އާއި އަޅާބަލާއިރު 40 ޕަސެންޓް އިތުރު ކުރުމާއި މަދުވެގެން 80 ޕަސެންޓް މިސްކިތެއްގައި އޭސީ ކުރެވިފައި ބެހެއްޓުމަށް ވެސް ވަނީ ޕްލޭން ކޮށްފައެވެ.
ދިވެހި ރާއްޖެއަކީ އިސްލާމީ އުސޫލުތަކުގެ މައްޗަށް ބިނާވެފައިވާ އަމިއްލަވަންތަ، މިނިވަން އަދި ޑިމޮކްރެޓިކް ރިޔާސީ ނިޒާމެއް އޮންނަ ގައުމަކަށް ވާތީ ރާއްޖޭގައި އޮތް ދީނީ އެއްބައި ވަންތަކަން ކުރި އެރުވުމަށާއި އިސްލާމީ އަގީދާ ވަރުގަދަކުރުމަށް ވަނީ އެ ޕްލޭނުގައި ޚާއްސަ އިސްކަމެއް ދީފައެވެ. މިގޮތުން ކުރުމަށް ކަނޑައަޅައި ފައިވާ ބައެއް ކަންތައްތަކުގެ ތެރޭގައި ހޭލުންތެރިކަން އިތުރުކުރުމާއި އިސްލާމީ ރިވެތި އުޞޫލުތައް ކުރި އެރުވުމާއި ތަޢުލީމާއި ދިރާސާ ކުރުމުގެ ތެރެއިން އިސްލާމީ ޢަޤީދާ ވަރުގަދަކުރުން ހިމެނެއެވެ. އަދި މި ދާއިރާގެ ޤާބިލުކަން އިތުރުކުރުމާއި ބޭނުންވާ އެކިއެކި އިންފްރާސްޓްރަކްޗަރ ޤާއިމު ކުރުމާއި، ހަލާލް ސެޓްފިކެޓް ދޫކުރުމުގެ ނިޒާމު ވަރުގަދަކުރުމާއި، ޒަކާތުގެ ފައިސާ ބޭނުންކުރުން ހަރުދަނާކޮށް އިސްލާމީ އުޞޫލުތަކުގެ މަތިން ހިންގޭ ވެލްފެއަރ ޕްރޮގްރާމްތައް ހިންގުން އަދި ޙައްޖާއި ޢުމްރާގެ ކަންކަން ހަރުދަނާކުރުން ހިމެނެއެވެ.
ދީނީ ހަރުކަށި ފިކުރާ ދެކޮޅަށް ތަމްރީނު ކޮށްފައިވާ ޓީޗަރުން ސްކޫލުތަކުގައި ބަހައްޓަން ލާޒިމް ކުރާއިރު ދީނީ ހައްދުފަހަނައަޅައި ދިއުމާއި ދެކޮޅަށް ސަރުކާރުން ވަނީ ޓެރަރިޒަމްގެ ގާނޫނަށް އިސްލާހު ގެނެސްފައެވެ. އެބިލް ސަރުކާރުން ގެނައި ގޮތަށް އިސްލާހު ގެނެސްފައިވާއިރު އަދި ރައީސް ތަސްދީގު ކުރައްވާފައެއް ނުވެއެވެ.
