މި ދައުރުގެ ތެރޭގައި ސަރުކާރުން 30 ބިލް ފޮނުވަނީ
ޖުމްލަ 48 ބިލެއްގެ މަސައްކަތް މި ދައުރުގެ ތެރޭގައި ކުރެވިގެންދާނެ
ރައްޔިތުންގެ މަޖިލިސް
ރައްޔިތުންގެ މަޖިލީހުގެ ތިން ވަނަ ދައުރަށް, ސަރުކާރުން 30 ބިލް ފޮނުވާނެ ކަމުގެ އިޝާރާތެއް ކޮށްފައިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ދައުރު ފަށާ ޖަލްސާގެ ރިޔާސަތު ބަލަހައްޓަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ މި ދައުރަށް ސަރުކާރުގެ ފަރާތުން 30 ބިލް ފޮނުވާނެ ކަމުގެ އިޝާރާތެއް ކުރައްވާފައިވާ ކަމަށާއި، އޭގެ ތެރެއިން އެޖެންޑާ 19 އިގެ ތެރެއިން އެމްޑީޕީގެ ފަރާތުން 18 ބިލެއް، މި ދައުރަށް ފޮނުވާނެ ކަމަށެވެ.
ރައީސް ނަޝީދު ވިދާޅުވީ އެ ބިލްތަކުގެ މަސައްކަތުގެ ތެރެއިން، ދައުރުގައި ދެން ޚާއްސަ ކަމެއްގެ ގޮތުގައި މަސައްކަތް ކުރިއަށް ގެންދާނީ އަންނަ އަހަރަށް ލަފާކޮށް ދައުލަތުން ހުށަހަޅާ ބަޖެޓް ދިރާސާކުރުމުގެ މަސައްކަތް ކަމަށެވެ. ބަޖެޓަށް މަޖިލިސް ތައްޔާރުވުމަށްޓަކާ ބަޖެޓް ދިރާސާކުރާ ކޮމިޓީތަކުން ބަޖެޓް މުތާލިއާކޮށް ހަދާ، އަދި މެމްބަރުންވެސް ބަޖެޓަށް އަހުލުވެރިވެ ބަޖެޓް ލިބިގަތުމަށް ތައްޔާރުވުމަކީ ބޭނުންތެރި ކަމެއް ކަމަށް ނަޝީދު ވިދާޅުވިއެވެ. އެ މަނިކުފާނު ވިދާޅުވީ މަޖިލީހުގެ ބަޖެޓާއި ގުޅޭ ދާއިރާތަކުގެ ކޮމިޓީތަކުން އެކަމަށް ތައްޔާރުވަމުން އަންނަ ކަމަށެވެ. އަދި ބަޖެޓް ދިރާސާ ކުރުމަށް ބޭނުންވާ އެހީތެރިކަން މެމްބަރުންނަށްވެސް ލިބިވަޑައިގަންނަވާނެ ކަމަށެވެ.
ރައީސް ނަޝީދު ވިދާޅުވީ ފާއިތުވި ތިން އަހަރުގެ ތެރޭގައި، ބަޖެޓް ހުށަހަޅާފައިވަނީ އެއްވެސް ތަފްސީލެއް ނެތި، ވަރަށް އާދައިގެ ގޮތަކަށް ކަމަށެވެ. ނަމަވެސް ގާނޫނު އަސާސީގައި ބަޖެޓް އޮންނާނެ ގޮތް ވަރަށް ތަފްސީލްކޮށް ބަޔާންކޮށްފައި އޮންނަ ކަމަށާއި، އެކަމުގައި މަޖިލީހުން ކަން ކުރަންވީ ގޮތްވެސް ވަރަށް ސާފުކޮށް ބަޔާންކޮށްފައި އެބައޮތް ކަމަށް އެމަނިކުފާނު ފާހަގަކުރެއްވިއެވެ.
މި ދައުރުގައި މަޖިލިސް ބޮޑަށް ތައްޔާރުވަމުންދާނީ ބަޖެޓަށްކަމަށް އިޝާރާތްކުރައްވަމުން ރައީސް ނަޝީދު ވިދާޅުވީ ބަޖެޓް މަޖިލީހަށް ގެނެސް "ޑޮކް" ކުރެވޭނެ ގޮތަކަށް މަޖިލީހުގެ ކޮމިޓީތައް ތައްޔާރުވުމަށް އަމީން އާންމާއި ކައުންސެލަރ ޖެނެރަލް އަރިހުން އެ މަނިކުފާނު އެދިވަޑައިގެންފައިވާ ކަމަށެވެ. މަޖިލީހުގެ ހުރިހާ މުވައްޒަފުންވެސް އެ މަގަށް މަސައްކަތް ކުރާނެ ކަމަށް އެ ރައީސް ނަޝީދު ވިދާޅުވިއެވެ.
މި އަހަރަށް ލަފާކޮށް 30.2 ބިލިޔަން ރުފިޔާގެ ބަޖެޓެއް، މަޖިލީހުން ފާސްކޮށްފައިވަނީ 29 ނޮވެމްބަރު 2018 ގައި އޮތް މަޖިލިސް ޖަލްސާގައެވެ. އެއީ މިހާތަނަށް ފާސްކޮށްފައިވާ އެންމެ ބޮޑު ބަޖެޓެއެވެ. އެ ބަޖެޓަށް 1.7 އިތުރުކުރަން ފިނޭންސް މިނިސްޓްރީން އެދިފައިވާތީ، މަޖިލީހުން ވަނީ އެ އަދަދު ބަޖެޓަށް އިތުރުކުރަން ފާސްކޮށްފައެވެ.
މަޖިލީހުގެ ތިންވަނަ ދައުރުގެ ފުރަތަމަ ޖަލްސާ ބާއްވާފައިވަނީ ބުރާސްފަތިދުވަހުއެވެ. މަޖިލީހުގެ އާ ޤަވާއިދު ބުނާ ގޮތުން މަޖިލީހުގެ ދައުރު ފަށާ ޖަލްސާ ބާއްވަންޖެހެނީ ހޯމަ ނުވަތަ ބުރާސްފަތިދުވަހުއެވެ.
