މިފަހަރު ބުޅާ މެރީމަ ރިވޯޑް ދެނީ: ގިނަ ބައެއް ރަތަށް!
ބުޅާ މެރުމުގެ މައްސަލަ އަކީ "ދައުލަތުގެ ނިޒާމުގެ ތެރެއިން ހައްލު ހޯދަންޖެހޭ ކަމެއް" ކަމަށް ހޯމް މިނިސްޓަރ އިމްރާން ވަނީ ވިދާޅުވެފައި
ތިން ބުޅާ މެރުމުން 100 ރުފިޔާ ދޭން އުނގޫފާރު ކައުންސިލުން ވަނީ ނިންމާފައި
ރ. އުނގޫފާރު ކައުންސިލުން ތިން ބުޅާ މެރުމުން 100 ރުފިޔާ ދޭން ނިންމި މައްސަލައެއް ހޫނުވެއްޖެއެވެ.
ކައުންސިލުން މި ފަދައިން ނިންމާފައިވާކަން ރާއްޖެއެމްވީއަށް ވަނީ ކަށަވަރުވެފައެވެ. އަދި މިހެން ނިންމީ ބުޅަލުގެ "އުނދަގޫ ބޮޑުވެގެން" ކަމަށް ކައުންސިލުން ބުނެފައިވެއެވެ.
ތިން ބުޅާ މެރުމުން 100 ރުފިޔާ ދޭއިރު، މި ފައިސާ ލިބޭނީ ބުޅާ މަރާލުމަށްފަހު ކައުންސިލާ ހަވާލުކުރުމުންނެވެ. އަދި ކޮންމެ ދުވަހެއްގެ ހެނދުނު 8:30 އިން މެންދުރު 11:00 އަށް ކައުންސިލުން އިދާރާއިން މަރާ ބުޅާތައް ބަލައިގަންނާނެކަމަށް ކައުންސިލްގެ އިއުލާންގައި ބުނެފައިވެއެވެ. އަދި މި ގަޑިތައް ފިޔަވާ އެހެން ގަޑި ތަކުގައި ގެންނަ ބުޅަލާއި "ކުނިވެފައިވާ" ބުޅާ ބަލައި ނުގަންނާނެކަމަށްވެސް ބުނެފައިވެއެވެ.
އުނގޫފާރު ކައުންސިލްގެ މި ނިންމުމާ ގުޅިގެން ގިނަ ބައެއް ދަނީ ސޯޝަލް މީޑިއާގައި ނުރުހުން ފާޅުކުރަމުންނެވެ.
މޯލްޑިވްސް އެނިމަލް ވެލްފެއަރ އިން ބުނީ ބުޅާ މެރުމުން ރިވޯޑް ދިނުން ބަލައިނުގަންނަކަމަށާއި "މަޑުން ނުތިބޭނަން" ކަމަށެވެ. އަދި މި ކަންތައް މާލެ ސިޓީ ކައުންސިލް އާއި ފިޝަރީޒް މިނިސްޓްރީއަށް އަންގާފައިވާކަމަށް މޯލްޑިވްސް އެނިމަލް ވެލްފެއަރ ބުންޏެވެ.
މީގެ އިތުރުން، ގިނަ ފަރާތްތަކެއް ވަނީ މިކަން ހުއްޓުވުމަށް ފުހުލުންނަށާއި ރައީސް އޮފީހަށާއި ފިޝަރީޒް މިނިސްޓްރީއަށާއި އެހެނިހެން ކަމާބެހޭ ފަރާތްތަކަށް ގޮވާލާފައެވެ.
ރާއްޖެއެމްވީއަށް އެނގިފައިވާ ގޮތުގައި ލޯކަލް ގަވަނަނަސް އޮތޯރިޓީ (އެލްޖީއޭ) އާއި އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އިން ވެސް ދަނީ މި ކަންތައް ހުއްޓުވުމަށް މަސައްކަތް ކުރަމުންނެވެ.
މާލޭގައިވެސް ބުޅާ ދަންޖައްސާ މަރާ މައްސަލަ ވަނީ ބޮޑުވެފައެވެ. މި މައްސަލަ އެންމެ ފުރަތަމަ ފުލުހުންނަށް ހުށަހަޅާފައިވަނީ މި އަހަރުގެ ޖެނުއަރީ މަހު، އަދި އެ މުއައްސަސާއިން ބުނެފައިވަނީ އެ ކަން ސީރިއަސް މައްސަލައެއް ގޮތުގައި ބަލާކަމަށެވެ.
މިކަން ހޯމް މިނިސްޓްރ އިމްރާން އަބްދުﷲގެ ސަމާލުކަމަށް ގެނެސްފައިވާއިރު، އެ މަނިކުފާނު މިދިޔަ ޖެނުއަރީ މަހުގެ ތެރޭގައި ވިދާޅުވެފައިވަނީ އިސްލާމީ މުޖުތަމައުގައި ދިރޭ ތަކެތީގެ ރައްކާތެރިކަން ކަށަވަރުވެފައި އޮންނަންޖެހޭ ކަމަށާއި މިއީ ދީނުގައި ވަރަށް ބޮޑަށް ބާރު އަޅުއްވާފައިވާ ކަމެއް ކަމަށެވެ.
އުނގޫފާރު ކައުންސިލްގެ މި ނިންމުމާ ގުޅިގެން އަދި މިނިސްޓަރު އިމްރާން އެއްޗެއް ވިދާޅުވެފައި ނުވާއިރު، ގިނަ ފަރާތެއް ދަނީ މިކަމާ ގުޅިގެން ސަރުކާރަށްވެސް ފާޑު ކިޔަމުންނެވެ. އަދި މިއީ ބޭނުންވި "އޯގާތެރި، އިންސާނިއްޔަތަށް އަހައްމިައްޔަތުކަން ދޭ" ސަރުކާރުން ކޮށްގެން ހެޔޮވާވަރުގެ ކަމެއް ނޫންކަމަށް ބައެއް ފަރާތްތަކުން ބުނެފައިވެއެވެ.
އުނގޫފާރު ކައުންސިލްގެ މި ނުންމަކީ ގާނޫނުލް އުގޫބާތުގެ ދަށުން ޖިނާއީ ކުށެއްކަން ބައެއް ވަކީލުން ފާހަގަކޮށްފައިވެއެވެ. ގާނޫނުލް އުގޫބާތުގެ 625 ވަނަ ބާބު ގައި ބުނާ ގޮތުން، ޖަނަވާރަކަށް އަނިޔާ ކުރުމަކީ ޖުނަހްގެ ތިން ވަނަ ދަރަޖައިގެ ކުށެކެވެ.
