އަލިފާނުގެ ހާދިސާ: ގެތަކުގެ އިންސްޕެކްޝަން ދަނީ ކުރިއަށް!
28 ސެޕްޓެމްބަރު 2019 | ހޮނިހިރު 14:0204 ގެއެއްގެ ކްލިއަރެންސް ވަނީ ލިބިފައި
ހެންވޭރު އަބަދަށްފެހި މަގުގައި ހިނގި އަލިފާނުގެ ހާދިސާއާ ގުޅިގެން ވަގުތީ ބޯހިޔާވަހިކަން ފޯރުކޮށްދިން މީހުންނަށް ދާއިމީ ބޯހިޔާވަހިކަން ފޯރުކޮށްދިނުމަށް މަސައްކަތްކުރާ ކަމަށާއި، އެސަރަހައްދުގެ ގެތަކުގެ އިންސްޕެކްޝަން ހަދަމުންދާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން ރާއްޖެއެމްވީއަށް ވިދާޅުވީ އަލިފާނުގެ ހާދިސާއާ ގުޅިގެން ހޮނިހިރު ދުވަހުގެ ނިޔަލަށް ގޭބިސީގެ 326 ފަރާތެއްގެ 136 ކޮޓަރި ބަލަހައްޓަމުންދާ ކަމަށެވެ.
ހިސާން ވިދާޅުވީ މިހާރު މަސައްކަތް ކުރަމުންދަނީ ވަގުތީ ބޯހިޔާވަހިކަމުގައި ތިބި އާއިލާގެ ތެރެއިން ބައެއް އާއިލާތަކުގެ ގެތަކަށް ވަނުމަށްޓަކައި އެގެތަކުގެ އިންސްޕެކްޝަން ހެދުމުގެ މަސައްކަތް ކަމަށެވެ. އަދި 04 ގެއެއްގެ ކްލިއަރެންސް ލިބިފައިވާ ކަމަށް އޭނާ ވިދާޅުވިއެވެ. މިމަސައްކަތް ކުރަމުންދަނީ އެންޑީއެމްއޭގެ އިތުރުން ހެލްތް މިނިސްޓްރީ، ރެޑް ކްރެސެންޓް، މާލެ ސިޓީ ކައުންސިލް އަދި ޕްލޭނިން މިނިސްޓްރީ ގުޅިގެން ކަމަށް ހިސާން ވިދާޅުވިއެވެ.
މީގެ އިތުރުން ހިސާން ވިދާޅުވީ އަލިފާނުގެ ހާދިސާ ހިނގި ސަރަހައްދުގައި މީހުންނަށް ނުރައްކާތެރިވެދާނެ ގޮތްގޮތަށް ހުރި ކުޑަދޮރު ނުވަތަ އަލިފާނުގެ ސަބަބުން ގެއްލުންވެފައިވާ އެއްޗެހިތައް އުސްއިމާރާތްތަކުން ނެގުމުގެ މަސައްކަތް ކުރާ ކަމަށެވެ. އަދި އެސަރަހައްދުގެ މަސައްކަތްތައް ހުއްޓުމެއްނެތި ކުރާކަން ހިސާން ފާހަގަކުރެއްވިއެވެ.
އަލިފާނުގެ ހާދިސާގައި ހާލުގައި ޖެހުނު ބިދޭސީންނާއި ބެހޭ ގޮތުން ހިސާން ވިދާޅުވީ ޑިޒާސްޓަރ މެނޭޖްމެންޓް އޮތޯރިޓީގެ ބެލުމުގެ ދަށުގައި މިހާރު އެއްވެސް ބިދޭސީއެއް ނެތް ކަމަށާއި، ނަމަވެސް ބިދޭސީންނަށް އެމީހުންނަށް ބޭނުންވާ ހުރިހާ އެހީތެރިކަމެއް ފޯރުކޮށްދީފައިވާ ކަމަށެވެ.
