އަރިއަޅަފައިވާ އިމާރާތް ރޫޅާލުމަށް ދަނީ ތައްޔާރުވަމުން : އެމްއެންޑީއެފް
23 ސެޕްޓެމްބަރު 2019 | ހޯމަ 08:44މިއަދުގެ ވަގުތެއްގައި އެ އިމާރާތް ރޫޅާލާނެ
އަރިއަޅާފައިވާ އިމާރާތް
ހުކުރު ދުވަހުގައި ހިނގި އަލިފާނުގެ ހާދިސާގައި އަލިފާން ހިފި އިމާރާތުގެ ތެރެއިން އަރިއަޅާފައިވާ އިމާރާތް ރޫޅާލުމަށް ތައްޔާރުވަމުންދާކަމަށް އެމްއެންޑީއެފުން ބުނެފިއެވެ.
ރާއްޖެޓީވީއަށް މައުލޫމަތު ދެއްވމުން އެމްއެންޑީއެފްގެ މީޑިއާ އޮފިޝަލް ވިދާޅުވީ އަރިއަޅާފައިވާ އިމާރާތް ހަދާފައިވަނީ ދަނގަޑުން ކަމަށާއި ގިނަ އިރުތަކެއް ވަންދެން އަލިފާން ނުނިވި ހުރުމާއެކު، ނިއްވާލަން އުޅުމުގެ ތެރޭގައި ޕްރެޝަރުގައި ފެން ދޫކުރުމުގެ ސަބަބުން އިމާރާތް އަރިއަޅާފައިވާކަމަށެވެ. އަދި މިހާރު އެ އިމާރާތް ރޫޅާލުމަށް ތައްޔާރުވަމުން އަންނަކަމަށާއި އެ ސަރަހައްދު ސާފުކުރުމަށް ކެނޑިނޭޅި މަސަތްކަތް ކުރަމުންދާކަމަށް އެމްއެންޑީއެފުން ވަނީ ބުނެފައެވެ. އެ ސަރަހައްދު މޮނިޓަރ ކުރުމަށް އެމްއެންޑީއެފްގެ އިތުރުން ފުލުހުން ދަނީ ހަރަކާތްތެރިވަމުންނެވެ.
ހުކުރު ދުވަހުގެރޭ ހެންވޭރު އަބަދަށްފެހިމަގުގައި ހުންނަ ހ. ތިލަފުށީ ގޭގައި ހުރި ހަތަރު ކެމިކަލް ގުދަނެއްގައި އަލިފާން ރޯވެ ހަ ގެއެއް ވަނީ އަނދައި އަޅިއަށް ވެފައެވެ. އެ ހާދިސާގައި އެކަކު މަރުވެ 400 ގިނަ މީހުން ގެދޮރު ވަނީ ގެއްލިފައެވެ.
އަލިފާނުގެ ހާދިސާ ހިނގަން މެދުވެެރިވި ސަބަބު މިހާތަނަށް އެއްވެސް ފަރާތަކުން ބުނެފައިނުވާއިރު، ހާދިސާގައި ލިބުނު ގެއްލުން އަންދާޒާ ކުރުމުގެ މަސައްކަތް ކުރަމުންދާ ކަމަށް އެމްއެންޑީއެފުން ވަނީ ބުނެފައެވެ. އަލިފާނުގެ ހާދިސާ އަށް ފަހު ހާލުގައި ޖެހުނު ފަރާތްތަކަށް ނެޝަނަލް ޑިޒާސްޓާ މެނޭޖްމެންޓުގެ އިތުުރުން ދިވެހި ރެޑް ކްރެސެންޓުން ދަނީ ހަރަކާތްތެރިވަމުންނެވެ. އެގޮތުން ބައެއް މީހުން މިހާރު ވަގުތީ ހިޔާތަކަށް ވަނީ ބަދަލުކޮށްފައެވެ. އޭގެ ތެރޭގައި ބިދޭސީންވެސް ހިމެނޭއެވެ.
