އަލިފާނުގެ ހާދިސާގައި ހާލުގައި ޖެހުނު ފަރާތްތަކަށް އެހީވުމަށް ރާއްޖެޓީވީއިން ޓެލެތޯންއެއް ފަށަނީ
ޓެލެތޯން ފަށާނީ މިރޭ 9:00 ގައި
ރޭގައި ހިނގައިދިޔަ އަލިފާނުގެ ހާދިސާގެ ތެރެއިން
ހުކުރު ދުވަހުގެރޭ މާލޭގައި ހިނގި އަލިފާނުގެ ހާދިސާއާއި ގުޅިގެން ހާލުގައި ޖެހުނު ފަރާތްތަކަށް އެހީވުމަށް ރާއްޖެޓީވީއިން ޚާއްސަ ޓެލެތޯން އެއް ބޭއްވުމަށް ތައްޔާރު ވެއްޖެއެވެ.
ރާއްޖެޓީވީގެ އެގްޒެކެޓިވް ޑިރެކްޓަރ ނާޒްމީ ސައީދު ވިދާޅުވީ މި ޓެލެތޯންއަކީ ކެމިކަލް ގުދަނުގައި ހިނގާދިޔަ އަލިފާނުގެ ހާދިސާއާއި ގުޅިގެން ރާއްޖެޓީވީއިން ހާލުގައި ޖެހުނު ފަރާތްތަކަށް އެހީވުމަށް ގެންދާ ޓެލެތޯން އެއް ކަމަށެވެ.
މިޓެލެތޯން 24 ގަޑިއިރަށް ކުރިއަށް ގެންދިޔުމަށް ހަމަޖެހިފައިވާއިރު ޓެލެތޯން ފަށާނީ މިރޭ 9:00 ޖަހާއިރުއެވެ.
އެހީވާން ބޭނުންވާ ފަރާތްތަކުން ފަންޑު ފޮއްޓަށް ފައިސާ އެޅޭއިރު އެކައުންޓް މެދުވެރިކޮށް އޮންލައިންކޮށް ވެސް ފައިސާ ޖަމާކުރެވެނެއެވެ. ރާއްޖެޓީވީގައި ބަހައްޓާފައި ހުންނަ ފޮއްޓަށް ފައިސާ ލެވޭނެ އިންތިޒާމް މިރޭގެ 9 އިން ފެށިގެން ހަމަޖެހޭނެ ކަމަށް ނާޒްމީ ވިދާޅުވިއެވެ.
މި ޓެލެތޯންގައި ރާއްޖެޓީވީއަށް ލިބޭ ފައިސާ ހަވާލު ކުރަން ހަމަޖެހިފައިވަނީ ރެޑްކްރޮސެންޓާއެވެ.
ރޭ ހިނގި އަލިފާނުގެ ހާދިސާގައި ހަ ގެއަށާއި ހަތަރު ގުދަނަށް ގެއްލުން ވެފައިވާއިރު އެ ހާދިސާގައި އެކަކު ވަނީ ނިޔާވެފައެވެ. ގެއްލުންވި ގޭތައް ވަނީ ބޭނުން ނުކުރެވޭ ވަރަށް ހަލާކުވެފައެވެ. އެ ގޭތަކުގައި ދިރިއުޅުނު މީހުންނަށް ސަރުކާރުން ވަގުތީ ބޯހިޔާވަހިކަން ދީފައިވާއިރު އަލުން އަނބުރާ ދިރިއުޅުން އިޔާދަވާން ދުވަސްކޮޅެއް ނަގާނެއެވެ.
ރާއްޖެޓީވީއިން އެފަރާތްތަކަށް އެހީވާން ނިންމިއިރު އެ ޓީވީއިން ދަނީ ރައްޔިތުންނަށް ދިމާވާ މިކަހަލަ އެކި ކަންތައްތަކުގައި އެހީވަމުންނެވެ. މީގެ ކުރިން ރާއްޖެޓީވީއިން ވަނީ ރޮހިންޖާ މުސްލިމުންނަށް އެހީވުމަށް ޓެލެތޯންއެއް ބާއްވާފައެވެ. އެ ޓެލެތޯންގައި ލިބުނު ފައިސާ ހަވާލުކޮށްފައިވަނީ ރެޑްކްރޮސެންޓާއެވެ.
