އަލިފާނުގެ ހާދިސާއާއި ގުޅިގެން 443 މީހަކަށް އެހީތެރިކަން ފޯރުކޮށްދީފައިވޭ: ހިސާން
21 ސެޕްޓެމްބަރު 2019 | ހޮނިހިރު 08:3413 އާއިލާއެއްގެ 83 މީހަކަށް ވަގުތީ ބޯހިޔާވަހިކަން ފޯރުކޮށްދީފައި
ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން
އަލިފާނުގެ ހާދިސާއާއި ގުޅިގެން 443 މީހަކަށް އެހީތެރިކަން ފޯރުކޮށްދީފައިވާ ކަމަށް ޑިޒާސްޓަރ މެނޭޖްމަންޓް އޮތޯރިޓީން ބުނެފިއެވެ.
އަލިފާނުގެ ހާދިސާއާ ގުޅޭގޮތުން އެންމެ ފަހުގެ މާއުލޫމާތު ދިނުމަށް އެމްއެންޑީއެފްގެ ހެޑް ކުއާޓަރު، ބަނޑޭރި ކޮށީގައި ބޭއްވި ނޫސްވެރިންގެ ބައްދަލުވުމުގައި ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވީ އޮތޯރިޓީން އަދިވެސްދަނީ ހާލުގައި ޖެހުނު މީހުންނަށް ވަގުތީ ހިޔާތަކުގައި އެހީތެރިކަން ފޯރުކޮށްދެއްވަމުން ކަމަށެވެ.
އެގޮތުން މިހާތަނަށް 443 މީހަކަށް އެހީތެރިކަން ފޯރުކޮށްދީފައިވާ ކަމަށާއި، 13 އާއިލާއެއްގެ 83 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ހިސާން ވިދާޅުވިއެވެ. އަދި ވިދާޅުވީ ކާބޯތަކެތީގެ އިތުރުން ޒަރޫރީ ބޭނުންތަކަށް ބޭނުންވާ އެންމެހައި ސާމާނު ފޯރުކޮށްދީފައިވާ ކަމަށެވެ.
މީގެ އިތުރުން ހިސާން ވިދާޅުވީ ދިވެހިންގެ އިތުރުން ބިދޭސީންނަށް ވެސް އެހީތެރިކަން ފޯރުކޮށްދެމުންދާ ކަމަށެވެ.
ހިސާން ވިދާޅުވީ ރޭގެ ފަތިހާ ހަމައަށް އޭޑީކޭއިން 50 މީހަކަށް ފަރުވާ ދީފައިވާފައިވާ ކަމަށާއި، އެހީދޭ މަރުކަޒުތަކުން ވެސް ސިއްހީ ފަރުވާ ބޭނުންވާ މީހުންނަށް އެޚިދުމަތްތައް ފޯރުކޮށްދެމުން އަންނަ ކަމަށެވެ.
ހެންވޭރު އަބަދަށްފެހި މަގުގައި ހުންނަ ކެމިކަލް ގުދަނެއްގައި ރޯވި އަލިފާންގަނޑުގެ ސަބަބުން ހަތަރު ގުދަނާއި، ގުދަނަކާއި، ހަތް ގެއެއް އަނދައި ހުލިވި އެވެ. އަދި މިހާދިސާގައި އެކަކު ނިޔާވެފައިވާއިރު އޭގެ އަސަރު ވަނީ އާންމުންގެ ގިނަ ބަޔަކަށް ކޮށްފައެވެ.
