އެފްއޭއެމް އާއި ގުޅިގެން ހީނަރުވެފައިވާ ފުޓުބޯޅަ ކުރިއަރުވާނަން: މަހްލޫފް

ބޭނުންވަނީ އެފްއޭއެމް އާއި ގުޅިގެން ހީނަރުވެފައިވާ ކުޅިވަރު ކުރިއެރުވުމަށް ކަމަށް ކުޅިވަރާ ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.

ގައުމީ ފުޓުބޯޅަ ޓީމުގެ ކަންތައްތަކުގައި އެފްއޭއެމްގެ އެގްޒެކްޓިވް ކޮމެޓީއަށް ލަފާދިނުމަށް އެކުލަވާލި ކޮމެޓީގައި ހިމެނިވަޑައިގަންނަވާ ކުޅިވަރާ ބެހޭ ވަޒީރު ވިދާޅުވީ އެފްއޭއެމްގެ ލީޑަރޝިޕް ބަދަލުކުރަން އެމަނިކުފާނު ކުރި މަސައްކަތް ބައެއް ކުލަބްތަކާ ހެދި ކާމިޔާބު ވާގޮތް ނުވިކަމަށާއި އެކަމާއި ރުޅިވެރިކަން ބާއްވައިފައި އޮތުމުގެ މާނައެއް ނެތް ކަމަށާއި އެމަނިކުފާނުގެ ހަމައެކަނި ބޭނުމަކީ އެފްއޭއެމް އާއި ގުޅިގެން ހީނަރުވަމުންދާ ފުޓުބޯޅަ އަދި ފުޓުބޯޅަ އަށް ދިމާވެފައިވާ މައްސަލަތަކަށް ހައްލެއް ގެނައުން ކަމަށެވެ.

މީގެ ކުރިން ގައުމީ ޓީމުގެ މެނޭޖަރުކަން ވެސް ކޮށްފައިވާ މަހްލޫފާއި އެފްއޭއެމްގެ ރައީސް ބައްސާމް އާއި ދެމެދު މައްސަލަ ތަކެއް ޖެހިގެން އުޅޭ ކަމުގެ އަޑު ވަނީ މީޑިއާގައި ފެތުރިފައެވެ. ނަމަވެސް ދާދި ފަހުން މިނިސްޓަރ މަހްލޫފާއި އެފްއޭއެމްގެ ރައީސް ބައްސާމާ ބައްދަލުކޮށްފައިވެއެވެ. މި ބައްދަލު ވުމަށް ފަހު އެފްއޭއެމްގެ ރައީސް ބައްސާމް ބުނީ ސަރުކާރުން ރާއްޖޭގައި ފުޓުބޯޅަ ކުރިއެރުވުމަށް ދޭންޖެހޭ އެއްބާރުލުން ދޭނެ ކަމުގެ ޔަގީން ކަން އެބައޮތް ކަމަށެވެ.

މީގެ އިތުރުން ބައްސާމް ވިދާޅުވީ، އެފްއޭއެމަކީ އެ އިރެއްގައި އޮންނަ ސަރުކާރަކާ އެކު ގުޅިގެން މަސައްކަތް ކުރާނެ ތަނެއް ކަމަށާއި، އެގޮތުން އެފްއޭއެމް އޮތީ ޔޫތު މިނިސްޓަރު ނުވަތަ ޔޫތު މިނިސްޓްރީއާ ޖެހިގަނެގެން މަސައްކަތް ކުރަން ނޫން ކަމަށެވެ. އަދި މިނިސްޓަރު މަހުލޫފާ ގުޅުން ރަނގަޅު ކަމަށް ވެސް ބައްސާމް ވަނީ ވިދާޅުވެފައެވެ.