ނިއު ޔޯކް ކޮންވެންޝަންގައި ރާއްޖެއިން ބައިވެރިވެއްޖެ
18 ސެޕްޓެމްބަރު 2019 | ބުދަ 05:42ކޮންވެންޝަންގައި ބައިވެރިވުމަކީ ރާއްޖެއަށް ލިބުނު ވަރަށް ބޮޑު ކުރިއެރުމެއް
އެޓާރނީ ޖެނެރަލް
ދިވެހިރާއްޖެއިން ނިއު ޔޯކް ކޮންވެޝަންގައި ބައިވެރިވެއްޖެއެވެ.
"ކޮންވެންޝަން އޮން ރިކޮގްނިޝަން އެންޑް އެންފޯސްމަންޓް އޮފް ފޮރިން އާބިޓްރަލް އެވޯޑްސް" މުއާހަދާއަކީ ގައުމުން ބޭރުގައި ނިންމާ އަރބިޓްރޭޝަންގެ މައްސަލަތައް ނުވަތަ އޮލްޓަރނޭޓް ޑިސްޕިއުޓް ރިޒޮލިއުޝަން ގެ މައްސަލަތައް ބަލައިގަނެ، ތަންފީޒުކުރުމުގެ ގޮތުން ހަދާފައިވާ މުއާހަދާއެކެވެ.
މިކަން ފާހަގަކޮށް އެޓަރނީ ޖެނެރަލްގެ ރަސްމީ ޓްވިޓަރ އެކައުންޓުން އަންގާރަ ދުވަހުގެ ރޭ ކޮށްފައިވާ ޓުވީޓެއްގައި ބުނެފައިވަނީ ރާއްޖެއިން މި ކޮންވެންޝަންގައި ބައިވެރިވުމަކީ ވަރަށް ބޮޑު ކުރިއެރުމެއްކަމަށާއި، މިކަމުން ރާއްޖޭގައި ވިޔާފާރި ކުރިއެރުވުމާއި، ވިޔަފާރީގެ ދާއިރާއަށް އިންވެސްޓް ކުރަން ބޭނުންވާ ފަރާތްތަކަށް އިތުރު ފުރުސަތުތަކެއް ހޯދައިދިނުމަށް ސަރުކާރުން މަސަތްކަތް ކުރައްވަމުން ގެންދަވާކަން ހާމަވެގެންދާކަމަށެވެ.
އެޓާރނީ ޖެނެރަލް އިބްރާހިމް ރިފްއަތު މިހާރު ހުންނެވީ ރަސްމީ ދަތުރުފުޅެއްގައި އެމެރިކާގައެވެ.
ނިއު ޔޯކް މުއާހަދާއަކީ ގައުމުތަކުން ނިންމާ އާބިޓްރޭޝަންގެ މައްސަލަތައް ބަލައިގަނެ، އެ މައްސަލަތައް ރައްދުވާ ފަރާތްތަކުގެ ގައުމުތަކުގައި އެ ނިންމުންތައް ތަންފީޒުކުރުމާ ގުޅޭގޮތުން 1958 ގައި އދ ގެ ޑިޕްލޮމެޓިކް ކޮންފަރަންސަކުން ފާސްކޮށް، ތަންފީޒުކުރަން ފެށި މުއާހަދާއެކެވެ. ރާއްޖެ ވެގެން ގޮސްފައިވަނީ މި މުއާހަދާގައި ބައިވެރިވި 161 ގައުމަށެވެ.
މިއަހަރުގެ މެދު ތެރޭގައި ރާއްޖެއިން ވަނީ ސިންގަޕޯރ ކޮންވެންޝަން އޮން މީޑިއޭޝަން އެންޑް އަރބިޓްރޭޝަންގައިވެސް ސޮއިކޮށްފައެވެ. އަދި ރައީސް އިބްރާހިމް މުހައްމަދު ސޯލިހު ވަނީ މޯލްޑިވްސް އިންޓަރނޭޝަނަލް އަރބިޓްރޭޝަން ސެންޓަރުގެ ނަމުގައި އަރބިޓްރޭޝަން ސެންޓަރެއްވެސް މިއަހަރުގެ ތެރޭގައި އުފައްދަވާފައެވެ.
