ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުގައި ރައްޔިތުންގެ ސުލުހަވެރިކަމާއި އެކުވެރިކަން ހިފެހެއްޓުމަށްޓަކައި ގިނަ މަސައްކަތްތަކެއް ކުރަމުންދާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

ތ.ވިލުފުށި ޕޮލިސް ސްޓޭޝަންގެ އާ އިމާރާތް ހުޅުއްވައިދެއްވުމަށްފަހު މިނިސްޓަރު އިމްރާން ވިދާޅުވީ މަސައްކަތް ކުރައްވަނީ ކޮންމެ ރަށަކަށް އަދި މުޅި ޤައުމަށް ހިތްހަމަޖެހުމާއި އުފަލާ ކުރިއެރުން ގެނެސްދިނުމަށް ކަމަށެވެ.

މިނިސްޓަރު އިމްރާން ވިދާޅުވީ ދިރިއުޅޭ މުޖުތަމައުގައި އަމާންކަމާއި ރައްކާތެރިކަމާއެކު ހަޔާތް ވޭތުކުރުމުގެ ފުރުސަތު ލިބެންޖެހޭ ކަމަށާއި، މިފުރުސަތު ހޯދުމަށް ގިނަ މަސައްކަތްތައް ކުރަންޖެހޭ ކަމަށެވެ. އަދި ސުލްހަމަސަލަސް ކަމަކީ އެރަށެއްގެ ތަރައްގީއާ ގުޅިފައިވާ ކަމެއް ކަމަށް ވެސް މިނިސްޓަރު ފާހަގަކުރެއްވިއެވެ.

މީގެ އިތުރުން މިނިސްޓަރު އިމްރާން ވިދާޅުވީ މުޖުތަމައުއެއް ކުރިއަރާ ތަރައްގީވެގެން ދިއުމުގެ އެންމެ މުހިންމު އެއް ބަހާއަކީ އެބައެއްގެ މެދުގައި އޮންނަ ސުލުހަވެރިކަމާއި، އެކުވެރިކަމާއި، އެއްބައިވަންތަކަން ކަމަށެވެ. ކޮންމެ ސަބަބަކާހުރެ ނަމަވެސް އެ މުޖުތަމައެއްގެ އެކުވެރިކަމާއި އެއްބައިވަންތަކަން ގެއްލި މުޖުމަތަމައެއްގެ ތެރޭގައި ސުލުހަވެރިކަމާއި ސުލުހަމަސަލަސްކަން ގެއްލި ނާމާންކަމާއި ބައިބައިވުން އުފެދިއްޖެ ހިނދެއްގައި އެ މުޖުތަމައު އަކީ ކުރިއަރާދެވޭނެ މުޖުތަމައުއެއް ނޫން ކަމަށް މިނިސްޓަރު ވިދާޅުވިއެވެ.

މިނިސްޓަރު އިމްރާން ވިދާޅުވީ ފުލުހުންގެ މުއައްސަސާއަކީ ހަމައެކަނި ކުށްކުރާ މީހުން ހިފަހައްޓާ ނުވަތަ ކުށްކުރާ މީހުން ކޮންޓްރޯލްކުރާ މުއައްސަސާއަކަށްވުމުގެ ބަދަލުގައި މުޅި މުޖުތަމައުގެ ފާގަތިކަމާއި އުފަލަށް މުޅި މުޖުތަމައުގެ ހަމަޖެހުމާއި، ތަރައްގީއަށް މަސައްކަތްކުރާ މުޅި މުޖުތަމައުގެ ކުރިއެރުމަށް މަސައްކަތްކުރާ މަރުކަޒަކަށް ނުވަތަ ސްޓޭޝަނަކަށް ވެގެންދިއުން ކަމަށެވެ.

ފުލުހުންގެ މުއައްސަސާ މިއަދު ބައްޓަންކުރަމުން ދަނީ އެ ބީދައިން ކަމަށް މިނިސްޓަރު ވިދާޅުވިއެވެ.

ވިލުފުށި އަދި މަޑިފުށި ޕޮލިސް ސްޓޭޝަން ހުޅުވުމުގެ ރަސްމިއްޔާތުގައި ކޮމިޝަނަރ އޮފް ޕޮލިސް މުޙައްމަދު ހަމީދުވެސް ބައިވެރިވެވަޑައިގެންނެވިއެވެ.