ޖީއެމް ފޯރަމް އަންނަ އަހަރުގެ އޭޕްރިލް މަހު

ހޮޓެލިއަރ މޯލްޑިވްސް އިން އިންތިޒާމްކޮށްގެން ކޮންމެ އަހަރަކު ބާއްވާ ޖީއެމް ފޯރަމް އަންނަ އަހަރުގެ އޭޕްރިލް މަހުގެ 3 ވަނަ ދުވަހު ކްރޮސްރޯޑްސް މޯލްޑިވްސްގައި ބާއްވަން ނިންމައިފިއެވެ.

ޖީއެމް ފޯރަމްގައި ފަތުރުވެރިކަމުގެ ސިނާއަތާއި ގުޅުން ހުރި ކަންތައްތަކާއި ސިނާއަތަށް ކުރިމަތިވެފައިވާ ގޮންޖެހުންތަކާއި އެ ގޮންޖެހުންތައް ހައްލުކުރާނެ ގޮތްތަކާ މެދު މަޝްވަރާ ކުރެވޭނެއެވެ.

މި އަހަރުގެ 4 ވަނަ ފޯރަމްގައި 100 އަށް ވުރެ ގިނަ ބައިވެރިން ބައިވެރިވެ، 30 އަށް ވުރެ ގިނަ ބްރޭންޑް ވަނީ ތަމްސީލު ކޮށްފައެވެ.

ފަތުރުވެރިކަމުގެ ދާއިރާގައި ހަރަކާތްތެރިވާ އިސް ފަރާތްތަކުގެ އިތުރުން ދާއިރާއާ ގުޅުންހުރި ދިރާސާތައް ހިންގާ ފަރާތްތަކަށް ވެސް ޖީއެމް ފޯރަމްގައި ބައިވެރިވެވޭނެ ކަމަށާއި ޕްރެޒެންޓޭޝަންތަކާއި ޕެނަލް ޑިސްކަޝަންތަކުގައި ބައިވެރިވުމުގެ ފުރުސަތު ހުޅުވާލާފައިވާ ކަމަށް ހޮޓެލިއަރ މޯލްޑިވްސް އިން ބުނެއެވެ.

2016 ވަނަ އަހަރުން ފެށިގެން ބާއްވަމުން އަންނަ ޖީއެމް ފޯރަމް އެންމެ ފުރަތަމަ ބާއްވާފައިވަނީ ހުޅުލޭ އައިލެންޑް ހޮޓެލް (އެޗްއައިއެޗް) ގައެވެ. އެއަށްފަހު ކުރުނބާ މޯލްޑިވްސް އާއި ބަނޑޮސް މޯލްޑިވްސްގައި ވެސް މި ފޯރަމް ބާއްވާފައިވެއެވެ.