ދިވެހި ރާއްޖޭގެ ފަތުރުވެރިކަން ހުރިހާ ފަންތިއެއްގެ މީހުންގެ އަތްފޯރާފަށަށް ގެނެސްދިނީ މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ގެ ސަރުކާރެއްގައި ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ އަދާރަން ސެލެކްޓް ހުދުރަންފުށީގައި އެފްޓީއައި ޓޫރިޒަމް ޓްރެވަލް އެޖެންޓް ވިޒިޓް 2019 އިފްތިތާހު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ، 2009 ވަނަ އަހަރު އެމްޑީޕީގެ ސަރުކާރުން ލޯކަލް ޓޫރިޒަމް ތައާރަފްކުރުމާއި އެކު، ރާއްޖޭގެ ފަތުރުވެރިކަން ހުރިހާ ފަންތިއެއްގެ މީހުންނަށް ވެސް އެކަށީގެންވާ އަގުތަކެއްގައި ލިބިގެންދިޔަކަމުގައެވެ.

ރައީސް ނަޝީދު ވިދާޅުވީ މިކަމުގެ ސަބަބުން، ހަމައެކަނި މުއްސަދިންނަށް ހާއްސަ މަންޒިލެއްގެ ގޮތުގައި ރާއްޖެ އޮތްއޮތުން ނިމުމަކަށް ގެނެވިފައިވާ ކަމަށެވެ. އަދި އެ ސިނާއަތާ އެކު ދަތުރުފަތުރުގެ ނިޒާމް ފުޅާވެ، ރާއްޖޭގެ ރަށްތައް އެއް ރަށް އަނެއް ރަށާއި ގުޅުވާލުމުގެ މަގުފަހި ވެގެން ދިޔަކަން ވެސް ރައީސް ނަޝީދު ފާހަގަކުރެއްވިއެވެ.

އިތުރަށް ރައީސް ނަޝީދު ވިދާޅުވީ، ފާއިތުވި ފަސް އަހަރުގެ ތެރޭގައި ރާއްޖޭގައި އޮތް ސިޔާސީ ހަމަނުޖެހުންތަކުގެ އަސަރު ފަތުރުވެރިކަމަށް ވެސް ކޮށްފައިވާކަމަށެވެ. އެހެން ނަމަވެސް 2018 ވަނަ އަހަރު އަނެއްކާވެސް އެމްޑީޕީ އިން ރާއްޖޭގެ ވެރިކަމާ ހަވާލުވުމާއެކު ފަތުރުވެރިކަން އަލުން އާރާސްތުވަން ފަށައިފިކަމަށް ރައީސް ނަޝީދު ފާހަގަކުރެއްވިއެވެ.

ރާއްޖެ އަކީ ހުރިހާ އެންމެންނަށް ވެސް ހަމަޖެހުމާއި އުފާވެރިކަމާއި އެކު ޗުއްޓީ ހޭދަކޮށްލުމުގެ ފުރުސަތު އޮތް ގައުމެއްކަމަށާއި ރާއްޖޭގައި ރިސޯޓް ހޮލިޑޭސް އަދި ސީސައިޑް ހޮލިޑޭސް އޭގެ އެންމެ ފުރިހަމަ ގޮތުގައި ތަޖުރިބާ ކޮށްލަން ލިބިގެން ދާ ކަމަށް ރައީސް ނަޝީދު ވިދާޅުވިއެވެ. އަދި ދިވެހި ރައްޔިތުންގެ މެހެމާންދާރީ އާކީ ފާހަގަކޮށްލެވޭ ފެންވަރުގެ މެހެމާންދާރީއެއް ކަމަށާއި ރާއްޖެ ވަޑައިގަންނަވާ ކޮންމެ ފަރާތަކަށްވެސް އެންމެ ފުރިހަމަ ހިދުމަތްތައް ފޯރުކޮށްދޭނެކަމަށް ރައީސް ނަޝީދު ވިދާޅުވިއެވެ.

ރާއްޖޭގެ ހިތްފަސޭހަ ކަމަކީ ކޮންމެ ބޭފުޅަކަށްވެސް ތަޖުރިބާކޮށްލުމުގެ ފުރުސަތު މިހާރު އެބައޮތްކަމަށާއި ރާއްޖެއިން އަބަދުވެސް ފަތުރުވެރިންނަށް އެންމެ ފުރިހަމަ ގޮތުގައި މަރުހަބާ ކިޔާނެކަމަށް ވިދާޅުވެ ރައީސް ނަޝީދު ވަނީ ހުރިހާ ފަތުރުވެރިންވެސް ރާއްޖެ އައުމަށް ދައުވަތު އަރުވާފައެވެ.

އެފްޓީއައި އަދި އަދާރަނަ އިން އިސްނަގައިގެން ކުރިއަށް ގެންދާ މި ޓްރެވަލް އެޖެންޓް ވިޒިޓް އަކީ އަމިއްލަ ފަރާތަކުން އިސްނަގައިގެން މިހާ ފުޅާދައިރާއެއްގައި ރާއްޖޭގައި ކުރިއަށް ގެންދާ ފުރަތަމަ އިވެންޓެވެ. މި އިވެންޓްގައި ޖަރުމަނު، އޮސްޓްރިއާ އަދި ސްލޮވޭކިއާގެ 100 އެއްހާ ޓްރެވަލް އެޖެންޓުން ބައިވެރިވެއެވެ.

ރާއްޖޭގެ ފަތުރުވެރިކަން ތަރައްގީކޮށް ފުޅާކުރުމަށް ސަރުކާރުންދަނީ ގިނަ މަސައްކަތްތަކެއް ކުރަމުންނެވެ. އެގޮތުން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންސް (އެމްއެމްޕީއާރސީ)ގެ ފަރާތުން ރާއްޖޭގެ ފަތުރުވެރިކަން ބޭރުގެ މާކެޓުތަކަށް އިޝްތިހާރުކުރުމުގެ ގޮތުން ކުރިއަށް ގެންދާ ފެމިލިއަރައިޒޭޝަން ޓްރިޕްގެ ދަށުން އޭޝިއާ އަދި ޔޫރަޕްގެ ގައުމުތަކުގެ ނޫސްވެރިންނާއި އެމެރިކާގެ ނޫސްވެރިން ވަނީ ރާއްޖެ އައިސް ރާއްޖޭގެ ފަތުރުވެރިކަން ތަޖުރިބާކޮށްފައެވެ.