ހަތިޔާރާއެކު ސިފައިން މާލޭގައި ހާއްސަ އޮޕަރޭޝަނެއް ހިންގަނީ

އެމްއެންޑީއެފް އިން ހަތިޔާރާ އެކު މާލޭގައި ހާއްސަ އޮޕަރޭޝަނެއް ހިންގަން ފަށައިފިއެވެ.

އެކަމާއި ގުޅޭ ގޮތުން އިތުރު މައުލޫމާތެއް އެމްއެންޑީއެފް އިން ހާމައެއްް ނުކުރެއެވެ. އެހެން ނަމަވެސް މައުލޫމާތު ލިބިފައިވާ ގޮތުން އެމްއެންޑީއެފްގެ އެ އޮޕަރޭޝަނަކީ ފުލުހުން މާލެތެރޭގައި ހިންގަމުންދާ އޮޕަރޭޝަނަށް އެހީތެރިވުމުގެ ގޮތުން ހިންގާ ހަރަކާތެކެވެ.

މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަނުން ތަހްގީގު ކުރަމުންދާ މައްސަލަތަކާ ގުޅިގެން ފުލުހުން ވަނީ އަންގާރަ ދުވަހު ހާއްސަ އޮޕަރޭޝަނެއް ފަށައިފިއެވެ.

ފުލުހުން ބުނެފައިވަނީ އެ އޮޕަރޭޝަނަކީ ތަހުގީގު ކުރަމުންދާ މައްސަލަތަކާއި ގުޅިގެން ކޮމިޝަނުން ބަލާފާސްކުރަން ބޭނުންވާ ތަންތަނާއި މީހުން ބާލާފާސްކުރުމަށް ކުރިއަށް ގެންދާ އޮޕަރޭޝަނެއް ކަމުގައެވެ. އަދި މި ތަންތަނާ މީހުން ބަލާފާސްކުރަނީ ކޮމިޝަނުގެ އެދުމަށް ކޯޓުން ނެރިފައިވާ އަމުރުތައް ތަންފީޒުކުރުމަށް ކަމަށް ފުލުހުން ބުންޏެވެ.

އެ އޮޕަރޭޝަނުގައި މާލޭގެ ފަސްތަނެއް ފުލުހުން ވަނީ ބަލާފާސްކޮށްފައެވެ. އެހެން ނަމަވެސް މިހާތަނަށް ފުލުހުންގެ ބެލުމުގެ ދަށަށް މީހަކު ގެންގޮސްފައެއް ނުވެއެވެ.