އައްޑޫގެ ޓޫރިޒަމްއާ ގުޅޭ ބައްދަލުވުންތަކެއް ބާއްވަނީ
ބައްދަލުވުން އޮންނާނީ 15 އިން 17 އަށް
އައްޑޫ މޭޔަރު އަބްދުﷲ ސޯދިގު އާއި ޓޫރިޒަމް މިނިސްޓަރު އަލީ ވަހީދު
އައްޑު އަތޮޅުގެ ޓޫރިޒަމް ތަރައްގީ ކުރުމާއި ގުޅޭގޮތުން މަޝްވަރާ ބައްދަލުވުންތަކެއް ބާއްވަން ނިންމާފައިވާ ކަމަށް އައްޑޫ ކައުންސިލުން ބުނެފިއެވެ.
އަންގާރަ ދުވަހު އައްޑޫ ކައުންސިލުން ކޮށްފައިވާ ޓްވީޓެއްގައި ބުނީ، މަޝްވަރާ ހޯދާ ބައްދަލުވުންތައް އައްޑޫގެ އިތުރުން މާލޭގައި ދިރިއުޅޭ އެ އަތޮޅު ރައްޔިތުންނަށް ހާއްސަކޮށްގެން ބޭއްވުމަށް ހަމަޖެހިފައިވާ ކަމަށެވެ.
އެގޮތުން މާލޭގައި ދިރިއުޅޭ އައްޑޫ ރައްޔިތުންނަށް ހާއްސަކޮށްގެން ބާއްވާ ބައްދަލުވުން އޮންނާނީ ބުދަ ދުވަހުގެ ރޭ 20:00 ގައި މާބުލް ހޮޓެލްގައެވެ. އައްޑޫގައި ބާއްވާ ބައްދަލުވުނުްތައް އޮންނާނީ މިމަހު 15 އިން 17 އަށެެވެ. އެގޮތުން ހުޅުދޫ އަދި މީދޫ ރައްޔިތުންނަށް ބާއްވާ ބައްދަލުވުން އޮންނާނީ މި މަހުގެ 15 ވަނަ ދުވަހު އަތޮޅު މަދަރުސާގައެވެ. މަރަދޫ، މަރަދޫ ފޭދޫ، އަދި ފޭދޫގެ ރައްޔިތުންނަށް ބާއްވާ ބަައްދަލުވުން އޮންނާނީ މި މަހުގެ 16 ވަނަ ދުވަހު ފޭދު ސްކޫލުގައެވެ. ފަހު ބައްދަލުވުން ބޭއްވުމަށް ކައުންސިލުން ހަމަޖައްސާފައިވަނީ ހިތަދޫ ރައްޔިތުންނަށް ހާއްސަކޮށްގެންނެވެ. އެ ބައްދަލުވުން އޮންނާނީ މި މަހުގެ 17 ވަނަ ދުވަހު ޝަރަފުއްދީން ސްކޫލުގައެވެ.
އައްޑޫގައި ޓޫރިޒަމްއާ ގުޅޭ މަޝްވަރާ ބައްދަލުވުންތަކެއް ބޭއްވުމަށް ހަމަޖެހިފައިވާއިރު، އައްޑޫ ސިޓީގައި ލޯކަލް ޓޫރިޒަމް ތަރައްގީ ކުރުމަށް އެސްއެމްއީ ބޭންކުން 80 މިލިއަން ހަމަޖެހިފައިވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ވިދާޅުވެފައެވެ.
