މިވަގުތު އަޅުގަނޑު އަތުގައި އޮތީ 2 ޑްރާފްޓް ރިޕޯޓު، ދެ ރިޕޯޓު އޮތީ ދެގޮތައް: ރައީސް ސޯލިހް
ފައިނަލް ޑްރާފްޓް ވިހާވެސް އަވަހަކަށް އެރުވުމަށް އެންގިން
ރައީސް ސޯލިހު ހަފްލާއެއްގައި ވާހަކަދައްކަވަނީ
ގެއްލުވާލައިފައިވާ މީހުންނާއި މަރާލާފައިވާ މީހުންގެ މައްސަލަތައް ތަހުގީގުކުރުމަށް އެކުލަވާލައިފައިވާ ރިޔާސީ ކޮމިޝަނުން މިހާތަނަށް ހުށަހަޅާފައިވަނީ 2 ޑްރާފްޓް ރިޕޯޓުކަމަށާއި، ދެ ރިޕޯޓުގައި ވެސް ފުށުއެރުންތެރިކަން އެބަހުރިކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރިލްވާންގެ މައްސަލާގައި ރިޔާސީ ކޮމިޝަނުން ހާމަކުރި މައުލޫމާތާއިއެކު އާންމުންގެ ކަންބޮޑުވުންތަކާއި ގުޅިގެން ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް ސޯލިހު ވިދާޅުވީ ރިލްވާން މައްސަލައިގެ ދެ ވަނަ ޑްރާފްޓް އާންމުކުރުމުގެ ކުރިން ކޮމިޝަނުން އެ ރިޕޯޓު ހިއްސާކޮށްފައިވާކަމަށެވެ. ރިޕޯޓާއި ގުޅިގެން ރިލްވާންގެ އާއިލާއިންނާއި ރައްޓެހިންގެ އިތުރުން އާންމުންގެ ފަރާތުން ކަންބޮޑުވުންފާޅުކޮށް އަވަސް ފިޔަވަޅު އެޅުމަށް ގޮވާލަމުން ދާކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ އާދިއްތަ ދުވަހު ކަމާބެހޭ ހުރިހާ ވުޒާރާތަކާއެކުގައި ބޭއްވި ބައްދަލުވުމުގައި މިހާރަށް އެޅޭނެ ފިޔަވަޅަކީ ކޮބައިތޯ ދެނެގަނެ އަޅަންޖެހޭ ފިޔަވަޅުތައް ހުރިހާ މުއައްސަސާތައް ގުޅިގެން ވީހާ ވެސް އަވަހަކަށް އެޅުމަށް އެއްބަސްވެވުނުކަމަށެވެ. އަދި ވިދާޅުވީ ދެ ޑްރާފްޓް ލިބިފައިއޮތް އިރުގައި ފުރަތަމަ ޑްރާފްޓާއި ދެވަނަ ޑްރާފްޓްގައި ތަހުގީގުކުރަމުންދާ ކަމަކަށް ވާތީ އަންނަންޖެހޭ ބަދަލުތަކެއް އެބަހުރިކަމަށާއި ވީހާވެސް އަވަހަށް ފައިނަލް ޑްރާފްޓެއް އެރުވުމަށް އެދިފައިވާނެކަމަށެވެ.
ރައީސް ސޯލިހު ވިދާޅުވީ މި މައްސަލަޔާއި ގުޅިގެން އެއްވެސް ބަޔަކު ހައްޔަރު ކުރަން ޖެހޭނަމަ، އަދި ތަހުގީގަށް ހާޒިރުކުރަން ޖެހޭނަމަ އެކަން ކުރާނެކަމަށާއި ހައްޔަރުކުރަންޖެހޭ މީހެއް ހައްޔަރުކުރުމަށް ފަސްނުޖެހޭނެކަމަށެވެ.
