އޭޖީ ލަފާދެއްވުމުން ފުލުހުންނަށް ސުވާލެއް ނުކުރެވޭނެ :ޝަމީމް
7 ސެޕްޓެމްބަރު 2019 | ހޮނިހިރު 12:04ފުލުހުންގެ އިންޓެލް ދެ އޮފިސަރުން ހައްޔަރު ކޮށްދިނުމަށް އޭޖީ އެދުނު
ޝަމީމް އަދި އެޓަރނީ ޖެނެރަލް އިބްރާހިމް ރިއްފަތު
މަރާލާފައިވާ މިނިވަން ނޫހުގެ ނޫސްވެރިޔާ އަހުމަރު ރިލްވާން ސީރިއާ އަށް ދިޔަކަން ދެއްކުމުގެ ގޮތުން އޭނާގެ ޕާސްޕޯޓް ހަދަން މަސައްކަތް ކުރި ދެ އިންޓެލް އޮފިސަރުން ހައްޔަރު ކުރުމަށް އޭޖީ އެދުމުން ފުލުހުންނަށް އެކަމަށް އިތުރު ސުވާލެއް ނުކުރެވޭނެ ކަމަށް ކުރީގެ ޑެޕިއުޓީ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ރިލްވާން މައްސަލައިގެ ތަހުގީގަށް ހުރަސް އެޅި އިންޓެލް ދެ ފުލުހުން ކަމަށްވާ، ކޯޕްރަލް މުޙައްމަދު ޖިނާޙާއި، ކޯޕްރަލް އިބްރާހީމް ރިފްޢަތު ހައްޔަރުކުރުމުގެ އަމުރެއް ހޯދުމަށް ކުރިމިނަލް ކޯޓުގައި އެދުމަށް އެޓަރނި ޖެނެރަލް ވަނީ ފުލުހުންގެ ކިބައިން އެދިފައެވެ. އެހެން ނަމަވެސް އެ ދެ އޮފިސަރުން ހައްޔަރު ކުރަން ޖެހޭ ސަބަބެއް އޮތް ކަމަށް ނުދެކޭ ކަމަށް ފުލުހުން ވަނީ ބުނެފައެވެ.
އެކަމާއި ގުޅޭ ގޮތުން ޝަމީމް ކުރެއްވި ޓްވީޓެއްގައި ވިދާޅުވީ، ފޭކް ޕާސްޕޯޓް ހައްދަން އުޅުނު ދެ ފުލުހުންނާއި މެދު ޕީނަލް ކޯޑުގެ 310 މާއްދާގެ ދަށުން ތަހުގީގު ކުރެވެން ޖެހޭ ކަމަށާއި، ފިޔަވަޅު އެޅުމަށް އެކަށީގެންވާ ވަރަށް ހެކި އެބަހުރި ކަމަށެވެ.
ޝަމީމް ވިދާޅުވީ، އެޓަރނި ޖެނެރަލް ކަމަކަށް އެދުމުން ކޮމިޝަނަރ އޮފް ޕޮލިސް އަށް އިތުުރު ސުވާލެއް ނުއުފެއްދޭނެ ކަމަށެވެ.
