ކޮމިޝަނުގެ ތަހުޤީޤަށް ބިނާކޮށް ފުލުހުން އަޅަންޖެހޭ ފިޔަވަޅު އަޅާނެކަން ކަށަވަރު ކުރާނަން: މިނިސްޓަރ
ދައުލަތުގެ މުއައްސަސާތައް މެދުވެރިކޮށް އަޅަންޖެހޭ ފިޔަވަޅުތައް ރައީސް އަޅުއްވާނެ
ހޯމް މިނިސްޓަރ ޝެއިޙް އިމްރާން އަބްދުﷲ
ރަހީނުކޮށް މަރާލާފައިވާ ނޫސްވެރިޔާ އަހުމަދު ރިލްވާނުގެ މައްސަލައިގައި ރިޔާސީ ކޮމިޝަނުން ކޮށްފައިވަ ތަހުޤީޤުގެ މައްޗަށް ބިނާކޮށް ފުލުހުންގެ ފަރާތުން އަޅަންޖެހޭ ފިޔަވަޅު އަޅާނެކަން ކަށަވަރު ކުރައްވާނެ ކަމަށް ހޯމް މިިނިސްޓަރ ޝެއިޙް އިމްރާން އަބްދުﷲ ވިދާޅުވެއްޖެއެވެ.
ރިލްވާނުގެ މައްސަލައިގައި އިތުބާރު ގެއްލޭ ގޮތަށް ފުލުހުންގެ މަދު ބަޔަކު ވާހަކަ ދައްކަވާތީ ހިތާމަކުރައްވާކަމަށް ރައީސް ނަޝީދު ވިދާޅުވެފައިވަނިކޮށް، ހޮނިހިރު ދުވަހު މިނިސްޓަރ ކުރެއްވި ޓްވީޓެއްގައި ވިދާޅުވީ، ރިލްވާނުގެ މައްސަލަ ތަހުޤީޤު ކުރަނީ ރައީސް އިބްރާހިމް މުހައްމަދު ސޯލިހު އުފައްދަވާފައިވާ ރިޔާސީ ކޮމިޝަނުން ކަމަށާއި، އެ ތަހުޤީޤުތަކަށް ބިނާކޮށް ދައުލަތުގެ މުއައްސަސާތައް މެދުވެރިކޮށް އަޅަންޖެހޭ ފިޔަވަޅުތައް ރައީސް ސޯލިހު އަޅުއްވާނެކަން ޔަޤީން ކަމަށެވެ.
އެގޮތުން އެ ތަހުޤީޤުތަކަށް ބިނާކޮށް ފުލުހުންގެ ފަރާތުން އަޅަންޖެހޭ އެންމެހައި ފިޔަވަޅެއް އަޅާނެކަން ކަށަވަރު ކުރައްވާނެ ކަަމަށް ވެސް މިނިސްޓަރ ވަނީ ވިދާޅުވެފައެވެ.
މިނިސްޓަރ އެހެން ވިދާޅުވެފައިވާއިރު، ރިލްވާނުގެ ފޯނު އަޑުއެހުމަށާއި، ރިލްވާނަށް ފާރަލުމަށް އޮޅުވާލައިގެން ކޯޓު އަމުރު ހޯދުމަކީ ކުށެއް ނޫންތޯ ސުވާލު އުފައްދަވަމުން ރައީސް ނަޝީދު ވަނީ ފުލުހުންގެ މައްޗަށް އޮންނަ އިތުބާރު ގެއްލޭފަދަ ވާހަކަތައް އެ އިދާރާގެ މަދު ބަޔަކު ދައްކަވާތީ ހިތާމަކުރައްވާ ކަމަށް ވިދާޅުވެ ޓްވީޓް ކުރައްވާފައެވެ.
އޭގެ އިތުރުން، ރިލްވާން އަބްދުﷲ މަރާލި މައްސަލާގައި ޝާމިލްވާ 2 ފުލުހުން ހައްޔަރުކުރަންޖެހޭފަދަ ގާނޫނީ ސަބަބެއް އޮތްކަމަށް ނުދެކޭކަމަށް މަރާލަފައިވާ މީހުންނާއި ގެއްލުވާލައިފައިވާ މީހުންގެ މައްސަލަތައް ތަހުގީގުކުރުމަށް އެކުލަވާފައިވާ ރިޔާސީ ކޮމިޝަނުން ބުނެފައިވާ ކަމަށް މޯލްޑިވިސް ޕޮލިސް ސާރވިސްއިން ވަނީ ބުނެފައެވެ.
