ދެ ފުލުހުން ހައްޔަރުކުރުމުގެ މަސައްކަތް ދަނީ ކުރިއަށް: ސީޕީ ހަމީދު
5 ސެޕްޓެމްބަރު 2019 | ބުރާސްފަތި 18:19އޭޖީން ސިޓީ ފޮނުވާފައިވަނީ ދެ އޮފިސަރުން ހައްޔަރު ކުރުމަށް
ޕޮލިސް ކޮމިޝަނަރު މުހައްމަދު ހަމީދު
ރަހީނު ކުރުމަށްފަހު މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާނުގެ މައްސަލާގައި ހައްޔަރު ކުރަން އެޓަރނީ ޖެނެރަލް އެދިފައިވާ ފުލުހުންގެ ދެ އިންޓެލް އޮފިސަރުން ހައްޔަރު ކުރުމުގެ މަސައްކަތް ކުރިއަށްދާ ކަމަށް ކޮމިޝަނަރަ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ރިލްވާނުގެ މައްސަލާގައި ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ވަނީ ބުރާސްފަތި ދުވަހުގެ ރޭ ފުލުހުންނާއި ބައްދަލުކޮށްފައެވެ. ދެ ގަޑިއިރަށް ދެމިގެން ދިޔަ އެ ބައްދަލުވުން ކުރިއަށް ގެންގޮސްފައިވަނީ ސިއްރު ކޮށްގެންނެވެ. ބައްދަލުވުމަށް ފަހު މަޖިލީހުގެ އިދާރާގެ ބޭރުގައި މީޑިއާ އަށް މައުލޫމާތު ދެއްވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، އެ މައްސަލާގައި ހިމެނޭ އިންޓެލްގެ ދެ ފުލުހުން ހައްޔަރު ކުރުމުގެ މަސައްކަތް ކުރަމުންދާ ކަމަށެވެ. އިތުރު މައުލޫމާތެއް ހަމީދު ހާމައެއް ނުކުރައްވައެވެ.
ހައްޔަރު ކުރަން އެޓަރނީ ޖެނެރަލް އެދިފައިވާ އިންޓެލްގެ ދެ އޮފިސަރުންނަކީ ރިލްވާން ސީރިޔާ އަށް ދިޔަކަމަށް ދައްކަން ޕާސްޕޯޓު ހައްދަން އުޅުނު ދެ ފުލުހުންނެވެ.
އެޓަރނީ ޖެނެރަލް ވަނީ ބުރާސްފަތި ދުވަހު ފުލުހުންގެ އިދާރާ އަށް ސިޓީއެއް ފޮނުވާފައެވެ. ރިލްވާން މައްސަލައިގެ ތަހުގީގަށް ހުރަސް އެޅި އިންޓެލް ދެ ފުލުހުން ކަމަށްވާ، ކޯޕްރަލް މުޙައްމަދު ޖިނާޙާއި، ކޯޕްރަލް އިބްރާހީމް ރިފްޢަތު މުޖުތަމަޢުއަށް ދޫވެފައި ތިބުމަކީ، މި މައްސަލައިގެ މިނިވަން ތަޙުޤީޤެއް ކުރިއަށް ގެންދިއުމަށް ހުރަސް އެޅިދާނެ ކަމެއް ކަމަށް ޤަބޫލުކުރެވޭތީ، ހައްޔަރުކުރުމަށް އަމުރެއް ހޯދުމަށް ކުރިމިނަލް ކޯޓުގައި އެދުމަށް ފުލުހުންގެ ކިބައިން އެޓާނީ ޖެނެރަލް އިބްރާހިމް ރިއްފަތު ވަނީ އެދިފައެވެ.
