ލާމަރުކަޒީ ޤާނޫނަށް އީސީން ހުށައަޅަން ބޭނުންވާ އިސްލާހުތައް މަޖިލީހާ ހިއްސާކޮށްފި
5 ސެޕްޓެމްބަރު 2019 | ބުރާސްފަތި 08:46ކައުންސިލު މެމްބަރަކު ވަކިވެއްޖެނަމަ 90 ދުވަސް ދިނުމަށް ހުށައެޅި
އީސީގެ ފަރާތުން ލާމަރުކަޒީ ޤާނޫނަށް އިސްލާހުތައް ހުށައެޅުއްވުން
ލާމަރުކަޒީ ޤާނޫނަށް އިލެކްޝަންސް ކޮމިޝަނުން ހުށައަޅަން ބޭނުންވާ އިސްލާހުތައް ރައްޔިތުންގެ މަޖިލީހުގެ ލާމަރުކަޒީ ކޮމިޓީއާއި ހިއްސާކޮށްފިއެވެ.
ބުރާސްފަތި ދުވަހު އިލެކްޝަންސް ކޮމިޝަނުގެ މެމްބަރުން މަޖިލީހުގެ ލާމަރުކަޒީ ކޮމިޓީއަށް ހާޒިރުވެފައިވާއިރު، އެ ކޮމިޝަނުން ހުށައަޅަން ބޭނުންވާ އިސްލާހުތައް ކޮމިޓީގެ ރައީސް އަހުމަދު ޝަރީފް ވަނީ މަޖިލީހާ ހިއްސާކުރައްވާފައެވެ. އެގޮތުން ޝަރީފް ވިދާޅުވީ، އަންހެނުންގެ ކޮމިޓީ އިންތިހާބު ކުރުމުގައި ޤާނޫނީ ގޮތުން ބާރުވެރި ކުރެވޭނެ ގޮތަކަށް އިންތިޒާމުތައް ކުރަންޖެހޭ ކަމަށާއި، އެގޮތުން ކޮމިޓީގެ ރައީސް ރަށު ކައުންސިލުގެ މެމްބަރަކަށް އިންތިހާބުވާގޮތަށް ޤާނޫނަށް އިސްލާހު ގެންނަންޖެހޭ ކަމަށެވެ.
އޭގެ އިތުރުން، އެ ޤާނޫނުގައި އަތޮޅު/ސިޓީ ކައުންސިލު މެމްބަރު ކަމުގެ މަޤާމު ހުސްވުމާގުޅޭ މާއްދާތަކުގައި ކައުންސިލު މެމްބަރަކު ވަކިވެއްޖެނަމަ ލަސްވެގެން 45 ދުވަހުގެ މުއްދަތެއްގެ ތެރޭގައި އެ މަޤާމަށް މެމްބަރަކު އިންތިހާބުކުރަންޖެހޭނެ ކަމަށް ބަޔާންކޮށްފައިވާއިރު، ޝަރީފް ވިދާޅުވީ، އިންތިހާބުތަކާގުޅޭ ކަންކަން ފަސޭހަ އިންތިޒާމެއްގެ ތެރެއިން ގެންދިއުމަށްޓަކައި އެ މުއްދަތު އިތުރުކޮށް، ގިނަވެގެން 90 ދުވަހުގެ މުއްދަތެއް ދިނުމަށް ފެނިވަޑައިިގަންނަ ކަމަށެވެ.
ޝަރީފް އިތުރަށް ވިދާޅުވީ، ކައުންސިލުގެ ބައްދަލުވުމެއް ބޭއްވުމަށް ބޭނުންވާ ޤާނޫނީ އަދަދު ހަމަވާ ވަރަށް ކައުންސިލުގައި މެމްބަރުން ނެތް ހާލަތެއްގައި، ހުސްވި ގޮނޑިއަކަށް މެމްބަރުން އިންތިހާބު ކުރަންޖެހޭނެ ކަމަށް ޤާނޫނުގައި ބަޔާންކޮށްފައިވީ ނަމަވެސް، ޤާނޫނީ އަދަދު (ކޯރަމް) ބަޔާންކޮށްފައި ނުވާ ކަމަށާއި، އޭގެ ސަބަބުން އެކި ފަރާތްތަކުން އެކި ގޮތަށް އަމަލުކުރަމުންދާ ކަމަށެވެ. އެގޮތުން ޖަލްސާތަކުގެ ކޯރަމްގެ ޤާނޫނީ އަދަދު މި ޤާނޫނުގައި ބަޔާން ކުރުމަށްވެސް އީސީން ހުށައަޅުއްވާފައިވެއެވެ.
އޭގެ އިތުރުންވެސް ގިނަ އިސްލާހުތަކެއް ހުށައަޅުއްވާފައިވާއިރު، ޝަރީފް ވިދާޅުވީ، އިންތިހާބުތައް ރޭވުމުގައި ދައުލަތަށް ވީހާވެސް ލުއިވާނެ ގޮތަށް ވިސްނަންޖެހޭ ކަމަށާއި، އެގޮތުން ލޯކަލް ކައުންސިލު އިންތިހާބާއި، މަޖިލިސް އިންތިހާބު އެއް ދުވަސްވަރަކަށް ހަމަޖެއްސޭނެ ނިޒާމެއް ބައްޓަންކުރުމަކީ މުހިއްމު ކަމެއް ކަމަށެވެ. އަދި ލާމަރުކަޒީ ނިޒާމުގައި އަދިވެސް ރައްޔިތުންގެ ބައިވެރިވުން ކުޑަ ކަމަށާއި، ރަށުގެ ހިންގުމާއި ތަރައްޤީއާ ގުޅުންހުރި ކަންކަމުގައި ރައްޔިތުންގެ ބައިވެރިވުން އިތުރުކުރާނެ ގޮތްތަކާމެދު ވިސްނުމަށްވެސް އީސީން އެދިލައްވާފައިވެއެވެ.
އެލްޖީއޭ ޤާނޫނަށް ހުށައަޅާފައިވާ އިސްލާހުތަކާއެކު މި ބިލް މަޖިލީހަށް ހުށައެޅުމަށް ތައްޔާރު ވަމުންދާއިރު، ކުރިއަށް އޮތް ލޯކަލް ކައުންސިލު އިންތިހާބުގެ ކުރިން މި ޤާނޫނުގެ މަސައްކަތް ނިންމުމަށް މަސައްކަތް ކުރައްވާނެ ކަމަށް ކޮމިޓީގެ މެމްބަރުން ވަނީ ފާހަގަ ކުރައްވާފައެވެ.
