ސަރުކާރުން ވިމްލާއަށް ފައިސާ ދޭން ނުޖެހޭނެ ކަމަށް ކޮމިޓީން ފާސްކޮށްފި

ސަރުކާރުން ވިމްލާ ކޮންސްޓްރަކްޝަނަށް 78 މިލިއަން ރުފިޔާ ދައްކަން ނުޖެހޭނެ ކަމަށް މާލިއްޔަތު ކޮމިޓީއިން ފާސްކޮށްފިއެވެ.

ރާއްޖެއަށް 2004 ވަނަ އަހަރު އެރި ސުނާމީގައި ގއ. އަތޮޅުގެ ތިން ރަށެއްގައި ގެދޮރު ގެއްލުނު މީހުންނަށް އެޅި 298 ގެ އަޅައިދިިނުމަށް ވިމްލާއާއި 220 މިލިއަން ރުފިޔާއަށް ކޮންޓްރެކްޓް ސަރުކާރުން ހެދީ 2008 ވަނަ އަހަރުއެވެ. އެ ކޮންޓެކްޓުގައި ވަނީ އެއް އަހަރާއި އެއްމަހާއި 25 ދުވަސް ތެރޭގައި މަސައްކަތް ނިންމުމަށެވެ. ނަމަވެސް ވިމްލާއިން އެމަސައްކަތް ނިންމާފައިވަނީ އެއްބަސްވުމާއި ޚިލާފަށް ގާތްތަގަނޑަކަށް ހަ އަހަރު ފަހުންނެވެ. އެ މަޝްރޫއުގެ ދަށުން ގއ. މާމެންދު އާއި ދާންދޫގެ އިތުރުން ނިލަންދޫ ގެތަށް އިމާރަތްކޮށްފައިވެއެވެ.

ވިމްލާއަށް ބަދަލު ދޭން 2016 ވަނަ އަހަރު ސިވިލް ކޯޓުން ހުކުމް ކޮށްފައިވަނީ އެކުންފުނިން ކުރި މަސައްކަތަށްދޭންޖެހޭ ފައިސާ ސަރުކާރުން ނުދެއްކުމުންނެވެ. ނަމަވެސް ސިވިލް ކޯޓުގެ ހުކުމާއި އެކު އޭރުގެ ސަރުކާރުން ވަނީ ހައި ކޯޓުގައި އިސްތިއުނާފު ކޮށްފައެވެ.

މި ސަރުކާރު ވެރިކަމަށް އައުމަށްފަހު އެކި ކަންކަމާ ގުޅިގެން ދައުލަތުން ފައިސާ ދޭންޖެހޭ މައްސަލަތައް ހައްލުކުރުމަށް އުފެއްދި ޚާއްސަ ކޮމިޓީގެ ފަރާތުން ވަނީ ވިމްލާއާއި ބަންޑާރަނައިބުގެ އޮފީހާއެކު އެމައްސަލައިގައި މަޝްވަރާ ކޮށްފައެވެ. މަޝްވަރާ ކޮށްފައިވަނީ އެމައްސަލައިގައި ސަރުކާރުން ފައިސާ ދޭންޖެހޭ މައްސަލަ ކޯޓުން ބޭރުގައި ހައްލު ކުރާނެ ގޮތަކާ މެދުއެވެ. ނަމަވެސް އަދި އެކަމާމެދު ވަކި ގޮތެއް ނުނިންމައެވެ.

އެމައްސަލައިގައި އޮޑިޓަރ ޖެނެރަލްގެ އޮފީހުން ވަނީ އެ އޮފީހުން ތައްޔާރުކުރި އޮޑިޓް ރިޕޯޓެއް މާލިއްޔަތު ކޮމިޓީއަށް ހުށައަޅާފައެވެ. އަދި ވިމްލާ ކޮންސްޓަކްޝަންގެ އިސް ފަރާތްތައް އެކޮމިޓީއަށް ހާޒިރުކޮށް ސުވާލުވެސް ކޮށްފައިވެއެވެ. ވިމްލާއިން ވަނީ އެމަސައްކަތުގެ ސަބަބުން އެ ކުންފުންޏަށާއި ސަރުކާރަށް ގިނަ ގެއްލުންވެފައިވާ ކަމަށާއި ގެއްލުން ވެފައިވަނީ ސަބް ކޮންސްޓްރަކްޓަރަކާއި އެމަސައްކަތް ހަވާލު ކުރުމުން ކަމަށް މާލިއްޔަތު ކޮމިޓީގައި ބުނެފައެވެ.

އެމައްސަލައިގައި މާލިއްޔަތު ކޮމިޓީގައި ބުދަ ދުވަހު ބޭއްވި ޖަލްސާގައި ދާންދޫ ދާއިރާގެ މެމްބަރު ޔައުގޫބު އަބްދުﷲ ހުށައެޅުއްވި ހުށައެޅުއްވުމުގައި ވިދާޅުވީ ވިމްލާއަށް 78 މިލިއަން ރުފިޔާ ސަރުކާރުން ދޭން ޖެހޭ ކަން ނުފެންނަ ކަމަށެވެ.

އެމަސައްކަތް ދިގުލައިގެން ދިއުމުން ގާތްގަނޑަކަށް 156 މިލިއަން ރުފިޔާ ސަރުކާރަށް ގެއްލުންވެ އިތުރަށް ޚަރަދު ކުރަން ޖެހުނު ކަން އޮޑިޓަރ ޖެނެރަލްގެ އޮފީހުން ވަނީ ފާހަގަ ކޮށްފައެވެ. އެހެންކަމުން އޮޑިޓަރ ޖެނެރަލްގެ އޮފީހުން ފާހަގަ ކޮށްފައިވަނީ ވިމްލާއަށް ސަރުކާރުން ދައްކަން ޖެހޭ ފައިސާއެއް ނެތްކަމަށެވެ.

ޔައުގޫބު ވިދާޅުވީ އެ ޕްރޮޖެކްޓުގެ ސަބަބުން ބޮޑު ގެއްލުމެއް ލިބިގެން ދިޔައީ ވިމްލާގެ އިހުމާލުންކަން އެންޓި ކަރަޕްޝަން ކޮމިޝަން (އޭސީސީ) އިންނާއި އޮޑިޓަރ ޖެނެރަލްގެ އޮފީހުން ތައްޔާރު ކުރި ރިޕޯޓުން ހާމަވާކަމަށެވެ. އަދި ވިމްލާއިން ސަބް ކޮންޓްރެކްޓަރަށް އެމަސައްކަތް ހަވާލުކުރުމުގެ ސަބަބުން ސަރުކާރުން 78 މިލިއަން ރުފިޔާ ދައްކަން ޖެހޭއިރު ވިމްލާއިން ސަރުކާރަށް 37 މިލިއަން ރުފިޔާ ދައްކަން ޖެހޭކަން އޮޑިޓަރ ޖެނެރަލްގެ ރިޕޯޓުން ހާމަވާކަމަށް ޔައުގޫބު ވިދާޅުވިއެވެ.

އެހެންކަމުން އޭސީސީއާއި އޮޑިޓަރ ޖެނެރަލްގެ ރިޕޯޓުން ފާހަގަވާގޮތުގައި މިކަމުގެ ސަބަބުން ދައުލަތަށް ލިބެންޖެހޭ ގިނަ ފައިސާތަކެއް ހުރިކަން ފާހަގަވާތީ ވީއެންމެ އަވަހަކަށް އެފައިސާ ހޯދުމަށް ކުރަންޖެހޭ މަސައްކަތް ކުރުމަށް ކަމާބެހޭ ފަރާތްތަކަށް މި ކޮމިޓީއިން އެންގުމަށް ހުށައަޅުއްވާކަމަށް އޭނާ ވިދާޅުވިއެވެ. ޔައުގޫބުގެ އެ ހުށައެޅުއްވުމަށް ތާއީދު ކުރެއްވީ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާއެވެ.

ސުނާމީގައި ހާލުގައި ޖެހުނު ފަރާތްތަކަށް ގެތައް އެޅުމަށް ހަވާލުކުރި މަޝްރޫއުތަކުގައި ލަސްތަކެއް އުޅުނުއިރު އެގެތަށް ނިންމާފައިވަނީ އެތަށް ދުވަހެއް ފަހުންނެވެ. އެ ގެތަކުގެ ފެންވަރު ދަށް ކަމަށް ސަރުކާރުން ކުރިން ބުނެފައިވެއެވެ.

މިމައްސަލަ މާލިއްޔަތު ކޮމިޓީއިން ފާސްވުމުން ދެން ފޮނުވާނީ މަޖިލީހުގެ ތަޅުމަށެވެ. ނަމަވެސް އެމައްސަލަ އަދިވެސް އޮތީ ކޯޓު މަރުހަލާގައި 2016 ވަނަ އަހަރު ސަރުކާރުން ހައިކޯޓުގައި އިސްތިއުނާފު ކުރި ގޮތަށެވެ.