ސްޕެނިޝް ލަލީގާ: އޮސަސޫނާއިން ބާސާ ހިފަހައްޓައިފި

ސްޕެނިޝް ލަލީގާގައި އޮސަސޫނާއިން ބާސެލޯނާ ހިފަހައްޓައިފިއެވެ.

ހޮނިހިރު ދުވަހުގެ ރޭ ކުޅުނު މެޗުން ބާސާ އާއި އޮސަސޫނާ އެއްވަރުވީ 2-2 ގެ ނަތީޖާއަކުންނެވެ.

އޮސަސޫނާ ދަނޑުގައި ކުޅުނު މި މެޗު ފެށިގެން ހަތް ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު ބްރެންޑޮންގެ އެހީތެރިކަމާއެކު ކާމިޔާބުކުރީ ރޮޓާޓޯ ޓޮރޭޒްއެވެ.

މި ލަނޑާއެކު ބާސާއިން ވަނީ އެޓީމުގެ ކުޅުން ރަނގަޅު ކޮށްފައެވެ. އެގޮތުން އެޓޭކްތައް ވަރުގަދަކޮށް، އެޓީމުން ވަނީ އޮސަސޫނާގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ.

ދެވަނަ ހާފް ފެށިގެން ބާސާއިން ވަނީ ނަތީޖާ ހަމަހަމަ ކޮށްފައެވެ. މި ލަނޑު 53 ވަނަ މިނެޓުގައި ކާލްސް ޕެރޭޒްގެ އެހީތެރިކަމާއެކު ކާމިޔާބުކުރީ އަންސުމާނޭ ފަޓީއެވެ.

މި ލަނޑާއެކު އޮސަސޫނާއިން ވަނީ ލީޑު އަނބުރާ ހޯދުމަށް މަސައްކަތް ކޮށްފައެވެ. ނަމަވެސް 64 ވަނަ މިނެޓުގައި ބާސާއިން ވަނީ އާރތާގެ ލަނޑުން މެޗުގެ ލީޑު ނަގާފައެވެ.

ނަމަވެސް އޮސަސޫނާއިން ވަނީ 82 ވަނަ މިނެޓުގައި ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކުރީ ރޮބާޓޯ ޓޮރޭޒްއެވެ.

މި ނަތީޖާއާއެކު ބާސާ އޮތީ ކުޅުނު ތިން މެޗުން ލިބުނު ހަތަރު ޕޮއިންޓާއެކު ޕޮއިންޓް ތާވަލުގެ ހަތްވަނައިގައެވެ. އޮސަސޫނާ އޮތީ ކުޅުނު ތިން މެޗުން ލިބުނު ފަސް ޕޮއިންޓާއެކު ޕޮއިންޓް ތާވަލުގެ ފަސް ވަނައިގައެވެ.