ގދ. ތިނަދޫގައި ކުނި މެނޭޖްކުރާ މަރުކަޒު ގާއިމުކުރުމަށް ބަޔަކާ ހަވާލުކޮށްފި
29 އޯގަސްޓު 2019 | ބުރާސްފަތި 13:55މި މަސައްކަތުގެ ޖުމްލަ އަގަކީ 1,395,788.10 ރުފިޔާ
ކުނި މެނޭޖްކުރާ މަރުކަޒު ގާއިމުކުރުމަށް އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
ގދ. ތިނަދޫގައި ކުނި މެނޭޖްކުރާ މަރުކަޒު ގާއިމުކުރުމަށް ބަޔަކާ ހަވާލުކޮށްފި އެވެ.
ބުރާސްފަތި ދުވަހު މިނިސްޓްރީ އޮފް އެންވަޔަރަންމަންޓްގައި ބޭއްވި ރަސްމިއްޔާތުގައި މި މަސައްކަތް ހަވާލުކޮށްފައިވަނީ އެކުއާމެރިން ހޮލިޑޭސް ކުންފުންޏާއެވެ.
މިއެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ އަޖުވަދު މުސްތަފާއެވެ. އަދި އެކުއާމެރިން ހޮލިޑޭސް ކުންފުނީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޢަބްދުލް ރަހުމާން މުޖުތަބާ އާދަމެވެ.
އެންވަޔަރަންމަންޓް މިނިސްޓްރީން ބުނީ ދިވެހި ސަރުކާރުގެ ޕަބްލިކް ސެކްޓަރ އިންވެސްޓެމަންޓް (ޕީއެސްއައިޕީ)ގެ ދަށުން ކުރިއަށްގެންދާ މި މަސައްކަތުގެ ޖުމްލަ އަގަކީ 1,395,788.10 (އެއްމިލިއަން ތިންލައްކަ ނުވަދިހަ ފަސްހާސް ހަތްސަތޭކަ އަށްޑިހަ އަށެއް ޕޮއެންޓް ދިހަ ލާރި) އެވެ. އަދި މި މަސައްކަތް ނިންމުމަށް ހަމަޖެހިފައިވަނީ 120 ދުވަހުގެ ތެރޭގައެވެ.
