އަންނަ އަހަރުގެ ޖެނުއަރީ މަހު، މޯލްޑިވްސް ކޮރަލް އިންސްޓިޓުއުޓްގެ މުރަކަ ރައްކާތެރިކޮށް އާލާ ކުރުމުގެ މަސައްކަތް ފެށިގެންދާނެ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައި ވަނީ ސްކީމާ ކޮންފަރެންސްގައި ބައިވެރިވެވަޑައިގެން ކޮންފަރެންސްގައި ވާހަކަފުޅު ދައްކަވަމުންނެވެ.
މި ވާހަކަފުޅުގައި ރައީސް ނަޝީދު ވަނީ ރާއްޖޭގެ ފަރުތަކަކީ ހުރިހާ ގޮތަކުންވެސް ރާއްޖެއަށް ހިމާޔަތްދޭ ތަންތަން ކަމުގައި ވިދާޅުވެ، މި ފަރުތައް ހަލާކުވެ ދިއުމަށް ނުދޭނޭކަމަށް ބުނެފައެވެ. އަދި އެންމެ ފަހުގެ ސައިންސް އާއި ޓެކްނޮލޮޖީގެ ވަސީލަތްތައް ބޭނުން ކުރައްވައިގެން ރާއްޖޭގެ ފަރުތަކުގެ މުރަކަތަކަކީ ހޫނުވަމުން އަންނަ ކަނޑުތަކުގައި ދިރި ތިބެވޭނެ ފެންވަރުގެ މުރަކަތަކަކަށް ހެދުމައްޓަކާ ކުރަންޖެހޭ މަސައްކަތް ކުރުމަށް މަޝްވަރާކޮށް މި މަސައްކަތް ޖެނުއަރީ މަހު ފެށިގެން ދާނެ ކަމަށެވެ.
އެމަނިކުފާނުގެ ކޮރަލް އިންސްޓިޓިއުޓްގެ ފަރާތުން ފަށާ މި މަސައްކަތުގައި ކަންކަން ނިންމާނީ ބައިނަލް އަގްވާމީ ފެންވަރު ހުރި މުރަކައިގެ ސައިންސްވެރިން ކަމުގައި ރައީސް ނަޝީދު ވިދާޅުވިއެވެ. މި މަސައްކަތް ކުރަން ބޭނުންވާ އެންމެ ފަހުގެ ޓެކްނޮލޮޖީގެ ވަސީލަތްތައް ވެސް ކަނޑައަޅާނީ މި ސައިންސްވެރިން ކަމުގައި އެމަނިކުފާނު ވިދާޅުވިއެވެ.
ކޮރަލް އިންސްޓިޓިއުޓްގެ ބޯޑަށް މެންބަރުން ހޮވުމާ އެޑްވައިޒަރީ ޕެނަލެއް ވެސް ވަރަށް އަވަހަށް އެކުލަވާލެވިގެން ދާނެ ކަމަށް ވެސް އެމަނިކުފާނު ވިދާޅުވިއެވެ. އިންސްޓިޓިއުޓްގެ ފުރަތަމަ ޕްރޮޖެކްޓް ރާއްޖޭގައި ފެށުނު ކަމުގައި ވިޔަސް، ރާއްޖޭގެ ރައްޔިތުން މިކަމަށް ހޭލުންތެރި ކުރުވުމަށް މަސައްކަތް ކުރާ ފަދައިން، ދުނިޔޭގެ ކަންކޮޅުތަކުގެ މީހުން ހޭލުންތެރިކުރުވުމަށް މަސައްކަތް ކުރައްވާނެ ކަމަށް ވެސް ރައީސް ނަޝީދު ވިދާޅުވިއެވެ.
މުރަކައާއި ފަރުތަކުގެ މުހިންމުކަން އަންގައިދީ ރައްޔިތުން މިކަމަށް ހޭލުންތެރި ކުރުމުގެ ގޮތުން ކުރިއަށް ގެންދަން ރާވާފައިވާ ހޭލުންތެރި ކުރުމުގެ ޕްރޮގްރާމްތަކުގެ އިތުރުން ގައުމުގެ ތައުލީމީ ނިޒާމާ، ސަރުކާރު އަދި ދައުލަތުގެ ބަޖެޓުގެ އެއްބާރުލުން މިކަމަށް ހޯދުމުގެ މަސައްކަތްވެސް ކުރައްވާނެ ކަމަށް ރައީސް ނަޝީދު ވިދާޅުވިއެވެ.
އެމަނިކުފާނު އިތުރަށް ވިދާޅުވީ ރަށްރަށުގެ ބިން ހިއްކުމާ ބަނދަރު ހެދުން އަދި އެއަރޕޯޓް އިމާރަތް ކުރުން ފަދަ ކަންތައް ކުރާއިރު މި މަސައްކަތުގެ ޑިޒައިނަކީ ފަރުތަކަށް އޭގެ ސަބަބުން ފައިދާނެ ކުރާނެ ގޮތަކަށް ޑިޒައިން ކުރެވޭ ތަންތަނަށް ހެދުމުގެ މަސައްކަތްވެސް ކޮރަލް އިންސްޓިޓިއުޓް އިން ކުރައްވާނެ ކަމުގައެވެ.
ސިޔާސީ ޕާޓީ ތަކުންވެސް އެ ޕާޓީ ތަކުގެ މެނިފެސްޓޯ ތައްޔާރު ކުރާ އިރު އޭގެ ސަބަބުން ތިމާވެއްޓާ ފަރުތަކަށް ފައިދާކުރާނެ މެނިފެސްޓޯއެއް އެކުލަވާލުމަށް އެމަނިކުފާނު އެދިވަޑައިގަތެވެ.
