އެމްއެމްޕީއާރްސީގެ ފައިސާ ނެންގެވި މީހުންނާއި މުއާމަލާތު ކޮށްފައިވޭ
ސުޕްރީމް ކޯޓުގެ ފަނޑިޔާރު އަބްދުﷲ ދީދީ
ސުޕްރީމް ކޯޓުގެ ފަނޑިޔާރުކަމުން އަބްދުﷲ ދީދީ ވަކިކުރަން ރައްޔިތުންގެ މަޖިލީހުން ފާސްކޮށްފިއެވެ.
ދީދީ ވަކިކުރަން ފެންނަ ކަމަށް ވޯޓު ދެއްވީ 72 މެމްބަރުންނެވެ. ވަކި ކޮޅަކަށް ވޯޓު ދޭން ނުފެންނަ ކަމަށް އެއް މެމްބަރަކު ވަނީ ވޯޓު ދެއްވާފައެވެ.
ދީދީ މަގާމުން ވަކިކުރަން ފެންނަ ކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން މަޖިލީހަށް ފޮނުވި ރިޕޯޓް މަޖިލީހުގެ ޖުޑިޝަރީ ކޮމިޓީން ދިރާސާކޮށް ނިންމި ގޮތް ވަނީ ތަޅުމަށް ހުށައަޅާފައެވެ. އޭނާ ވަކި ކުރަން ފެންނަ ކަމަށް ކޮމިޓީން ފާސްކޮށްފައިވަނި އަންގާރަ ދުވަހު ބޭއްވި ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި އަށްމެމްބަރުންގެ އިއްތިފާގުންނެވެ. ފަނޑިޔާރު ދީދީ ވަކިކުރަން ޖޭއެސްސީން ނިންމާފައިވަނީ އެ ކޮމިޝަންގެ އިޖުރާއާތުތަކާއި އެއްގޮތްވާ ގޮތުގެ މަތިން ކަމަށް ކޮމިޓީގެ ރިޕޯޓްގައި ވަނީ ބުނެފައެވެ.
ޖޭއެސްސީގެ ރިޕޯޓުގައި ފާހަގަކޮށްފައިވާ ކަންތައްތައް
އާއްމުކޮށް ހުޅުވާލައިގެން ދަރުބާރުގޭގައި ބޭއްވި ޝަރިއްޔަތަށް ފަހު ދީދީ ވަނީ މެލޭޝިޔާ އަށް ވަޑައިގެންފައެވެ. އޭނާ އަދިވެސް ހުންނެވީ މެލޭޝިޔާގައެވެ. ދީދީ ފަނޑިޔާރު ކަމުން ސަސްޕެންޑް ކުރުމުން އެ މައްސަލަ ވަނީ ސުޕްރީމް ކޯޓަށް ހުށައަޅާފައެވެ. އެ މައްސަލާއިގެ ފުރަތަމަ އަޑު އެހުމުގައި ދީދީގެ ވަކީލް ވިދާޅުވެފައިވަނީ، ދީދީއާ ގުޅޭ ގޮތުން ޖޭއެސްސީގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހަޅައިގެން، ފަނޑިޔާރުކަމުގެ މަގާމުން ދީދީ ސަސްޕެންޑް ކޮށްފައިވަނީ އަމިއްލަ މަގްސަދެއް ހާސިލުކުރުމުގެ ގޮތުންކަމަށެވެ. އެގޮތުން ރައީސް ނަޝީދު 13 އަހަރަށް ޖަލަށްލާން ހުކުމް ކުރިއިރު ފަނޑިޔާރުންގެ ބެންޗުގައި ދީދީ ހިމެނިވަޑައިގެންފައިވާތީ އެއީ ޒާތީ ގޮތުން ނަޝީދު ހުށައެޅި މައްސަލަ އެއް ކަމަށް ދީދީގެ ވަކީލް ސަލީމް ވިދާޅުވިއެވެ.
