ސްޕްރީމް ކޯޓުގެ ފަނޑިޔާރުކަމަށް ޝުޖޫން އަދި އަޒްމިރަލްދާ އައްޔަން ކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ލަފާދެއްވައިފިއެވެ.

ޖޭއެސްސީއިން ސްޕްރީމް ކޯޓުގެ ފަނޑިޔާރުކަމަށް ޝުޖޫން އަދި އަޒްމިރަލްދާ އައްޔަން ކުރުމަށް ރައީސުލްޖުމްހޫރިއްޔާ އަށް ލަފާދެއްވަން ނިންމެވީ ހޯމަ ދުވަހު ބޭއްވުނު އެ ކޮމެޓީގެ ބައްދަލުވުމުގައެވެ.

ޖޭއެސްއީއިން މިގޮތަށް ނިންމެވީ ސްޕްރީމް ކޯޓުގެ ފަނޑިޔާރު ކަމަށް ކުރިމަތި ލެއްވި ހުރިހާ ބޭފުޅުންނާއި އިންޓަރވިއު ކުރެއްވުމަށް ފަހުގައެވެ. އެ ކޮމެޓީން ނެރުނު ބަޔާނުގައި ވަނީ އެ ކޮމެޓީއިން އައިޝާ ޝުޖޫން މުހައްމަދާއި ޑރ. އަޒްމިރަލްދާ ޒާހިރު ސްޕްރީމް ކޯޓުގެ ފަނޑިޔާރު ކަމަށް އައްޔަން ކުރުމަށް ފެންނަ ކަމަށެވެ.

ގާނޫނު އަސާސީގެ 148 ވަނަ މާއްދާގެ (ހ) ގައި ބުނެފައިވާ ގޮތުން ސުޕްރީމް ކޯޓުގެ އެންމެހާ ފަނޑިޔާރުން އައްޔަންކުރާނީ ދައުލަތުގެ އެންމެ އިސްވެރިޔާގެ ހައިސިއްޔަތުން ރައީސުލްޖުމްހޫރިއްޔާ ކަމަށެވެ. މިގޮތުން ސުޕްރީމް ކޯޓުގެ ފަނޑިޔާރު ކަމުގެ މަގާމަށް އައްޔަންކުރާ މީހުން ކަނޑައަޅާނީ ޖުޑީޝަލް ސަރވިސް ކޮމިޝަންގެ މަޝްވަރާގެ މަތިން ރައްޔިތުންގެ މަޖިލީހަށް ހުށަހެޅުމަށް ފަހު ޖަލްސާއަށް ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން އެ ނަންތަކެއް ފާސްވުމުން ކަމަށެވެ. މަޖިލީހުގެ ރުހުން ހޯދުމަށް ފޮނުވާ ބޭފުޅުންނަށް މަޖިލީހުން ރުހުން ދިނުމުން އެބޭފުޅުން ހަތް ދުވަހުގެ ތެރޭގައި ސުޕްރީމް ކޯޓުގެ ފަނޑިޔާރު ކަމަށް އައްޔަންކުރަން ޖެހެ އެވެ.

އައިޝާ ޝުޖޫންއަކީ ބާރ ކައުންސިލްގެ މެމްބަރެކެވެ. އަދި ޝުޖޫން ވަނީ ސިވިލް ކޯޓުގެ ފަނޑިޔާރުކަން ވެސް ކުރައްވާފަ އެވެ. ޝުޖޫން ސިވިލް ކޯޓުގެ ފަނޑިޔާރުކަމުން އިސްތިއުފާދެއްވީ 2014 ވަނަ އަހަރުގެ ތެރޭގަ އެވެ.

ޑރ އަޒްމިރަލްދާ ޒާހިރަކީ ހައި ކޯޓުގެ ފަނޑިޔާރުކަން ގިނަ ދުވަސްތަކެއްވަންދެން ކުރެއްވި ފަރާތެކެވެ. ހައި ކޯޓުގެ ދެކުނު ގޮފީގެ ފަނޑިޔާރުކަމުގެ މަޤާމުގައި ހުންނެވުމަށް ފަހު އިސްތިއުފާދެއްވީ މަޖުބޫރީ ހާލަތްތަކެއް ކުރިމަތިވެވަޑައިގެން ކަމަށް ވިދާޅުވުމަށް ފަހު 2016 ވަނަ އަހަރުގެ މެއި މަހުގެ ތެރޭގައެވެ.

މި ދެބޭފުޅުން ސުޕްރީމް ކޯޓުގެ ފަނޑިޔާރު ކަމަށް އައްޔަންކުރުމާއެކު ވެވަޑައިގަންނަވާނީ ދިވެހިރާއްޖޭގެ ސުޕްރީމް ކޯޓަށް އައްޔަން ކުރެވޭ ފުރަތަމަ ދެ އަންހެން ފަނޑިޔާރުންނަށެވެ.