ހުށަހެޅުނު ލިޔުމާއި މެދު ކޮމެޓީގެ މެމްބަރުންގެ މެދުގައި ބޮޑު ބަހުސެއް
ބަހުސް ކުރުމަށް ފުރުސަތު ނުދީ ކޮމެޓީ އަށް ފޮނުވާލުމުކީ ގަވާއިދާ ޚިލާފަށް ކުރެވުނު ކަމެއް ކަމުގައި މެމްބަރުން ފާހަގަ ކުރެއްވި
ބަޖެޓު ދިރާސާކުރާ ކޮމިޓީގެ ބައްދަލުވުމުގެ ތެރޭގައި
ހުށަހެޅުނު ބަޖެޓާ މެދު ކޮމެޓީގެ މެމްބަރުން މެދުގައި ބޮޑު ބަހުސެއް ފެށިއްޖެއެވެ.
ފިނޭންސް މިނިސްޓްރީއިން ދައުލަތުގެ ބަޖެޓަށް އިތުރުކުރުމަށް ބޭނުންވާ ފައިސާ ރައްޔިތުންގެ މަޖިލީހުން ފާސްކުރުމަށްޓަކައި ފޮނުވާފައިވާ މައްސަލައާއި ގުޅިގެން ދިރާސާ ކުރުމަށް އާދީއްތަ ދުވަހު ބޭއްވި ބަޖެޓު ދިރާސާކުރާ ކޮމިޓީގެ ބައްދަލުވުމުގައި ވަނީ މެމްބަރުންގެ މެދުގައި ބޮޑު ބަހުސެއް ފެށިފައެވެ.
ބަޖެޓަށް އިތުރުކުރުމަށް ބޭނުންވާ ފައިސާއާއި ގުޅިގެން މަޖިލީހުގެ ތަޅުމުގައި ބަހުސް ކުރުމަށް ފުރުސަތު ނުދީ ކޮމެޓީ އަށް ފޮނުވާލުމުން އެއީ ގަވާއިދާއި ޚިލާފަށް ކުރެވުނު ކަމެއްގޮތުގައި ބައެއް މެމްބަރުން ފާހަގަ ކުރައްވާފައިވެއެވެ.
އެގޮތުން ކުރިންވެސް ބަޖެޓު އައުމުން އަމަލު ކުރަމުންދާ އުސޫލަށް އަމަލު ކުރުމަށްޓަކާ މަޖިލީހުގެ ތަޅުމަށް ފޮނުވާލާ، މެމްބަރުންނަށް ބަހުސް ކުރުމަށް ފުރުސަތު ދިނުމަށް ކޮމެޓީ ބައްދަލުވުމުގައި މަރަދޫ ދާއިރާގެ މެމްބަރު އިބްރާހީމް ޝަރީފް ހުށަހެޅުއްވިއެވެ. މި ހުށަހެޅުއްވުމަށް ތާއީދު ކުރެއްވީ ކުޑަހުވަދޫ ދާއިރާގެ މެމްބަރު އަހްމަދު އާމިރެވެ. ނަމަވެސް މި ހުށަހެޅުމަށް ކޮމެޓީގެ މެމްބަރުންގެ ތާއީދު ނުލިބުނުކަން ފާހަގަކޮށްލެވެއެވެ.
މަޖިލީހުގެ ކައުންސެލް ޖެނެރަލް, ފާތިމަތު ފިލްޒާ ކޮމެޓީ ބައްދަލުވުމަށް ވަޑައިގެން މިކަން ސާފުކޮށްދެއްވަމުން ވިދާޅުވީ، ހުށަހެޅިފައިވަނީ ބަޖެޓަށް އިތުރަށް ބޭނުންވާ ފައިސާ އާއި ގުޅިގެން ކަމަށެވެ. ސަޕްލިމެންޓްރީ ބަޖެޓާއި އިތުރަށް ފައިސާ ބޭނުންވާ ކަމުގެ ލިޔުމަކީ މުޅިން ތަފާތު ދެ ފާސްކުރުމެއް ކަމަށް ވެސް ވިދާޅުވިއެވެ. ފިލްޒާ ވިދާޅުވީ މަޖިލީހުގެ ތަޅުމުގައި ބަހުސް ކުރުމަށް ފުރުސަތު ނުދީ ކޮމެޓީ އަށް ފޮނުވާލި ނަމަވެސް މަޖިލީހުގެ ގަވާއިދަށް ފުށުނާރާ ކަމަށެވެ. އަދި މަޖިލީހުގެ ރައީސް، ރައީސް މުހައްމަދު ނަޝީދު އިޚްތިޔާރު ކުރެއްވީ މަސައްކަތް އަވަސް ކުރުމަށްޓަކައި ފައިސާ އިތުރުކުރުމާއި ގުޅޭ ލިޔުން މަޖިލީހަށް ހުށަހެޅުމަށް ފަހު ކޮމެޓީއަށް ފޮނުވާ، ދިރާސާ ކުރުމަށް ވަގުތު ދިނުމަށް ފަހު އެކުލަވާލާ ރިޕޯޓުގެ މައްޗަށް މެމްބަރުންނަށް ބަހުސް ކުރުމަށް ފުރުސަތު ދިނުމަށް ކަމަށް ވެސް ފިލްޒާ ވިދާޅުވިއެވެ.
މީގެ އިތުރުން މެމްބަރުންނަށް މިލިޔުމާއި ގުޅިގެން މައުލޫމާތު ސާފު ކޮށްދެއްވުމަށް ފިނޭންސް މިނިސްޓަރ ބަޖެޓު ކޮމެޓީގެ ބައްދަލުވުމަކަށް ހާޒިރުވުމަށް ވެސް ހުށަހަޅުއްވާފައިވެއެވެ. އެގޮތުން ކޮމެޓީ އަށް ވަޑައިގެން ތިއްބެވި ހުރިހާ މެމްބަރުންގެ އިއްތިފާގުން ވަނީ މިހުށަހެޅުން ފާސްކޮށްފައެވެ. މި ހުށަހެޅުއްވުން ހުށަހެޅުއްވީ ހުޅުދޫ ދާއިރާގެ މެމްބަރު އިލްޔާސް ލަބީބުއެވެ. މި ހުށަހެޅުމަށް ތާއީދު ކުރެއްވީ، ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާއެވެ. އެގޮތުން ފިނޭންސް މިނިސްޓަރ އިބްރާހިމް އަމީރު ކޮމެޓީ ބައްދަލުމަށް ހާޒިރު ވުމަށް ހަމަޖެހިފައިވަނީ އާދީއްތަ ދުވަހުގެ 14:45 ގައެވެ.
