މެނިފެސްޓޯ ތަންފީޒު ކުރުމަށް ބޭނުންވާ ޕްރޮގްރާމްތައް ބަޖެޓުގައި ރަނގަޅަށް ނުހިމެނޭ: ވަހީދު
25 އޯގަސްޓު 2019 | އާދީއްތަ 02:53ފާޑު ކިޔަނީ ސަރުކާރަށް އުންމީދު އޮންނާތީ
މުހައްމަދު ވަހީދު
މި ސަރުކާރުގެ މެނިފެސްޓޯ ތަންފީޒު ކުރުމަށް ބޭނުންވާ ޕްރޮގްރާމްތައް މި އަހަރަށް ލަފާކުރާ ބަޖެޓުގައި ރަނގަޅަށް ހިމެނިފައިނުވާ ކަމަށް އުނގޫފާރު ދާއިރާގެ މެމްބަރ މުހައްމަދު ވަހީދު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ވަހީދު ވިދާޅުވީ، މި ސަރުކާރުގެ މެނިފެސްޓޯ ތަންފީޒު ކުރުމަށް ބޭނުންވާ ޕްރޮގްރާމްތައް މި އަހަރަށް ލަފާކުރާ ސަރުކާރުގެ ބަޖެޓުގައި އެންމެ ރަނގަޅަށް ހިމެނިފައިނުވާ ކަމަށާއި، އެއީ ސަރުކާރުގެ ކަންކަން ލަސްވަމުންދާ އެއް ސަބަބު ކަމަށެވެ.
ވަހީދު ވިދާޅުވީ، ސަރުކާރަށް ފާޑުކިޔާ މީހުން ފާޑު ކިޔަނީ ބަދަލުތަކެއް ގެންނާނެ ސަރުކާރަކަށް މި ސަރުކާރު ވާތީ ކަމަށާއި، އުންމީދުތަކެއް އޮންނާތީ ކަމަށެވެ. އަދި އެކަން އެގޮތަށް ކުރަނީ ކެތްތެރިކަން ކުޑަވުމުން ކަމަށްވެސް އޭނާ ވިދާޅުވިއެވެ.
މިދިޔަ ސަރުކާރުގައި ވައްކަން ކުރި ފަރާތްތަކުން ކުރި ވައްކަންތައް ބަލައި ތަހުގީގުކޮށް އަދަބު ދިނުމާއި، ދައުލަތުން ގެއްލުނު ފައިސާތައް އަނބުރާ ހޯދުމާއި، ގާނޫނާ ހިލާފަށް ވަޒީފާ ގެއްލުނު ފަރާތްތަކަށް އިންސާފު ހޯދައިދިނުމަކީ މި ސަރުކާރުގެ ވައުދެއް ކަމަށާއި، އެކަންތައްތައް ކުރިޔަށްދާ ކަމަށް ވަހީދު ވިދާޅުވިއެވެ.
ނަމަވެސް ވަހީދު ވިދާޅުވީ، އެ ހުރިހާ ކަމެއްވެސް ސަރުކާރުން ކުރަނީ އޮންނަ އުސޫލުގެ ތެރެއިން ކަމަށާއި، ކުރީގެ ސަރުކާރުން މަސައްކަތްކުރެއްވިހެން މަޖިލީހުގެ ތެރެއިން ގާނޫނަށް ބަދަލު ގެނެސްގެން ނޫން ކަމަށެވެ.
އެގޮތުން ވަހީދު ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވާ ފަދައިން ސަރުކާރު ކުރާ ކޮންމެ ކަމެއް ކުރާނީ ވިސްނުންތެރިކަމާއި، ރޭވުންތެރިކަމާއި، އަދި ތެދުވެރިކަމާއި، އަމާނާތްތެރިކަމާ އެކީގައި ކަމަށެވެ. އަދި ހުރިހާ ވައުދެއް ފުއްދޭނެ ކަމަށްވެސް ވަހީދު ވިދާޅުވިއެވެ.
ސަރުކާރުގެ ސްޕީޑާމެދު ބައެއް ފަރާތްތަކުން ސުވާލުކުރަމުން އަންނައިރު، ސްޕީޑާމެދު ގިނަ ބަޔަކު ހިތްހަމަޖެހެއެވެ. އަދި ސަރުކާރުން ގިނަ ވައުދުތަކެއް މިހާތަނަށް ވަނީ ފުއްދާފައެވެ.
