ޓެރަރިސްޓް ހަމަލާގެ އިންޒާރަށް ކެރެލާ އާއި ޓެމިލްނާޑު އެލާޓަށް!
އެތެރެވި ކަމަށް ވަނީ ހަ މީހުން
އިންޑިއާ ފުލުހުން ކާރެއް ބަލާފާސްކުރަނީ
ޕާކިސްތާނުގެ ޓެރަރިސްޓް ޖަމާއަތެއް ކަމަށްވާ ލަޝްކަރީ ތައިބާ ޖަމާއަތުގެ ހަ ޓެރަރިސްޓުން އިންޑިއާ އަށް އެތެރެވިކަމުގެ ރިޕޯޓް ލިބުމާއި އެކު ޓެމިލްނާޑުގެ ފުލުހުން އެލާޓަށް ގެނެސްފިއެވެ.
އެ ހަ މީހުންގެ ތެރެއިން އެކަކީ ޕާކިސްތާނު މީހެއް ކަމަށާއި، ލަފާކުރެވޭ ގޮތުން ބާކީ ތިބި ފަސް މީހުންނަކީ ސްރިލަންކާ މީހުން ކަމަށް އިންޑިއާގެ ފުލުހުންނަށް ވަނީ މައުލޫމާތު ލިބިފައެވެ. ޓެމިލްނާޑުގެ އިތުރުން އެ ސްޓޭޓާ ޖެހިގެން އޮންނަ ކެރެލާގެ ފުލުހުން އެލާޓަށް ގެނެސް ސަލަމާތި ކަންތައްތައް ވަނީ މިހާރު ވަރުގަދަ ކޮށްފައެވެ.
ޓެމިލްނާޑުގެ ވެރިރަށް ޗެންނާއިގެ އިތުރުން ކޮއިމްބަތޫރުގެ ސަލާމަތީ ފިޔަވަޅުތައް ވަރުގަދަކޮށް ހޮޓާ ތަކާއި، އެއާޕޯޓާ، ރޭލް ސްޓޭޝަން އަދި އަޅުކަން ކުރާ ތަންތަނުގެ އިތުރުން މޯލްތަކުގައި ފުލުހުން ދަނީ ފޯރިމަރަމުންނެވެ.
ރިޕޯޓްތައް ބުނާގޮތުން ޓެރަރިސްޓުން ފިލައިގެން އުޅެނީ ކޮއިމްބަތޫރްގައެވެ. ޝައްކު ކުރެވޭފަދަކަމެއް ފެނިއްޖެނަމަ ރިޕޯޓް ކުރުމަށް ފުލުހުން ވަނީ އިލްތިމާސްކޮށްފައެވެ.
