ފަނޑިޔާރުގެ އިސްލާހުނުކޮށް އެހެން ދިމާލަކަށް ދިޔުމަކީ ބުއްދިވެރިކަމެއް ނޫން: ރައީސް ނަޝީދު
23 އޯގަސްޓު 2019 | ހުކުރު 13:30ހޯމަ ދުވަހަށް މަސައްކަތް ނިންމާލާ، ސުޕްރީމް ކޯޓަށް ދެ ފަނޑިޔާރުން ލިބޭވަރުވާނެ
ރައީސް މުހައްމަދު ނަޝީދު، ނޫސްވެރިންގެ ބައްދަލުވުމެއްގައި
ފަނޑިޔާރުގެ އިސްލާހްނުކޮށް އެހެން ދިމާލަކަށް ދިޔުމަކީ ބުއްދިވެރިކަމެއް ނޫންކަމަށާއި، އެންމެ މުހިންމުކަމެއްގެ ގޮތުން މިހާރުކުރަމުންގެންދަނީ ފަނޑިޔާރުގެ އިސްލާހްކުރުމުގެ މަސައްކަތްކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ކައުންސިލަރުންގެ މަހާސިންތާގައި ސުޕްރީމް ކޯޓަށް ފަނޑިޔާރުން އައްޔަންކުރުމުގެ މަސައްކަތްކުރިއަށްދާގޮތާއި ގުޅޭގޮތުން ވާހަކަފުޅުދައްކަވަމުން ރައީސް ނަޝީދު ވިދާޅުވީ ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމުގެ ފުރުސަތު ހުޅުވާލައިފައިވާކަމަށާއި، ހޯމަ ދުވަހަށް މަސައްކަތް ނިންމާލާ، ސުޕްރީމް ކޯޓަށް ދެ ފަނޑިޔާރުން ލިބޭވަރުވާނެކަމަށެވެ.
ފަނޑިޔާރުންނާއި ގުޅޭކަންކަން އިސްލާހްކުރުމުގެ މަސައްކަތްތައް ކުރިއަށްގެންދާކަން ފާހަގަކުރަމުން ރައީސް ނަޝީދު ވިދާޅުވީ ފަނޑިޔާރުންގެ ސުލޫކާއި ގުޅޭކަންކަންވެސް އިސްލާހްކުރެވެމުންދާކަމަށެވެ. އަދި ޖޭއެސްސީގެ ޤާނޫނަށްވެސް އިސްލާހު ގެނެވިފައިވާކަން ރައީސް ނަޝީދު ފާހަގަކުރެއްވި އެވެ.
ރައީސް ނަޝީދު ވިދާޅުވީ ކަންކަން ލަސްވާކަމަށް ބައެއް ދިމާތަކުން އަޑުއިވި ވަޑައިގަންނަވާކަމަށާއި، ނަމަވެސް އެންމެ މުހިންމުކަމަކީ ޝަރުއީ ނިޒާމް އިސްލާހުކުރުމާއި، ފަނޑިޔާރުގެތައް ސާފުކުރުން ކަމަށެވެ. އަދި އެ މަސައްކަތްނުކޮށް، އެހެން މަސައްކަތަކާއި ދިމާލަށް ދިއުމަކީވެސް ބުއްދިވެރިކަމެއްކަމަށް ނޫންކަން މީގެ 6 މަސްކުރިންވެސް އަޅުގަނޑުމެން ގަބޫލުކުރިކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ކަނޑައެޅިފައިވާ ތާރީހްތަކުގައި ސަރުކާރުގެ ވައުދުތައް ފުއްދޭނެކަމަށް ގަބޫލުކުރައްވާކަމަށެވެ. އޭގެތެރޭގައި ތަރައްޤީ ޕްރޮޖެކްޓްތައްވެސް ކުރިއަށްގެންގޮސް، ރައްޔިތުންގެ އުއްމީދުތައް ހަޤީޤަތަކަށް ހަދައިދެވޭނެކަމަށް ގަބޫލުކުރައްވާކަމަށް ރައީސް ނަޝީދު ވިދާޅުވި އެވެ.
