ނޭމާ ހޯދުމަށް ރެއާލުން ވަރުގަދަ ބިޑެއްކުރަނީ!

ބްރެޒިލްގެ ތަރި ނޭމާ ހޯދުމަށް ސްޕެއިންގެ ގަދަ ބާރު ރެއާލް މެޑްރިޑުން ވަރުގަދަ ބިޑެއް ކުރަން ނިންމައިފި ކަމަށް މީޑިއާ ރިޕޯޓްތައް ބުނެފިއެވެ.

ޕީއެސްޖީ ދޫކޮށްލުމަށް ނޭމާ ބޭނުންވާކަމަށް މީޑިއާ ރިޕޯޓްތައް ބުނެއެވެ. ޕީއެސްޖީއިން ބުނީ ރަނގަޅު އޮފާއެއް ލިބިއްޖެނަމަ ނޭމާ ދޫކޮށްލާނެކަމަށެވެ. ނޭމާގެ ކުރީގެ ކްލަބް ބާސެލޯނާއިންވެސް ވަނީ އޭނާ ހޯދުމަށް ބިޑް ކޮށްފައެވެ. ނަމަވެސް ބާސެލޯނާއިން ކުރި ބިޑްތަށް ޕީއެސްޖީއިން ވަނީ ރިޖެކްޓްކޮށްލައިފައެވެ.

މީޑިއާ ރިޕޯޓްތައް ބުނާ ގޮތުން ޓްރާންސްފަރ މާރކެޓް ނިމުމުގެ ކުރިން ނޭމާއަށް ރެއާލުން ބޮޑު ބިޑެއް ހުށަހަޅާނެ އެވެ. އެގޮތުން ރެއާލުގެ ހަމޭސް އަދި އިސްކޯގެ އިތުރުން ނޭމާ ގަތުމަށް 100 މިލިއަން ޕައުންޑްގެ ބޮޑު ބިޑެއް ހުށަހަޅާނެއެވެ.

ޔޫރަޕްގެ ބޮޑެތި ކްލަބްތަކުން ނޭމާ ގަތުމަށް ބިޑް ކުރުމަށް ތައްޔާރުވަމުންދާއިރު އޭގެތެރޭގައި ސްޕެއިންގެ ޗެމްޕިއަން ބާސެލޯނާ އާއި އިޓަލީގެ ޗެމްޕިއަން ޔުވެންޓަސްގެ އިތުރުން ނޭމާ ގަތުމުގެ ރޭހުގައި ރެއާލް އަދި ޔުނައިޓެޑް ހިމެނެއެވެ.

ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ނޭމާ ބާސެލޯނާ ދޫކޮށް ޕީއެސްޖީއަށް ބަދަލުވީ 222 މިލިއަން ޔޫރޯއަށެވެ. ނަމަވެސް ޕީއެސްޖީގައި އޭނާއަށް އެންމެ މޮޅު ކުޅުން ދެއްކިފައިނުވާއިރު އޭނާ އަށް ވަނީ އަނިޔާގެ ގިނަ މައްސަލަތަކަކާއި ކުރިމަތިލާން ޖެހިފައެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް، އެޓީމާއެކު ސްޕެނިޝް ލީގު ދެ ފަހަރު، ކޮޕާ ޑެލްރޭ ދެ ފަހަރު، ސްޕެނިޝް ސުޕަރކަޕް ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕްވެސް ކާމިޔާބު ކޮށްފައެވެ.

ޕީއެސްޖީއަށް ބަދަލުވެ ނޭމާ ވަނީ އެ ކްލަބަށް މިހާތަނަށް ކުޅުނު 58 މެޗުގައި 51 ލަނޑު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 97 މެޗުގައި 60 ލަނޑު ކާމިޔާބު ކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު ކާމިޔާބު ކޮށްފައެވެ.