ޕްރިމިއާ ލީގުގައި ލެސްޓާ ސިޓީން ޗެލްސީ ހިފަހައްޓައިފިއެވެ.

އާދީއްތަ ދުވަހުގެރޭ ލެސްޓާ އާއި ޗެލްސީ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ޗެލްސީ ދަނޑުގައި ކުޅުނު މި މެޗު ފެށިގެން ހަތްވަނަ މިނެޓުގައި އެޓީމުން ވަނީ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ މައުންޓްއެވެ.

މި ލަނޑަށްފަހުވެސް ޗެލްސީގެ ފަރާތުން ރަނގަޅު ކުޅުމެއް ފެނިގެންދިޔައިރު، ލަނޑު ޖެހުމަށް އެޓީމުން ދިޔައީ ފުރުސަތު ތަނަވަސް ކުރަމުންނެވެ.

މި ހާފްގައި ލެސްޓާއަށްވެސް ވަނީ ނަތީޖާ ހަމަހަމަ ކުރުމަށް ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

ދެވަނަ ހާފް ފެށިގެންވެސް ރަނގަޅަށް ކުޅުނީ ޗެލްސީއެވެ. އެޓީމުން ދިޔައީ ލެސްޓާގެ ހާފަށް ބާރުބޮޑުކޮށް ފުލުފުލުގައި ހަމަލާތައް އުފައްދަމުންނެވެ.

ނަމަވެސް ޗެލްސީން ރަނގަޅަށް ކުޅެމުން ދަނިކޮށް ލެސްޓާއިން ވަނީ ނަތީޖާ ހަމަހަމަކޮށްފައެވެ. މި ލަނޑު 67 ވަނަ މިނެޓުގައި އެޓީމަށް ކާމިޔާބުކޮށްދިނީ މެޑިސަންގެ އެހީތެރިކަމާއެކު އެންޑީޑީއެވެ.

މި ލަނޑާއެކު ލެސްޓާއިން އެޓީމުގެ އެޓޭކްތައް ވަރުގަދަކޮށްފައިވާއިރު، ލަނޑު ޖެހުމަށް އެޓީމަށްވެސް ގިނަ ފުރުސަތުތައް ދެވަނަ ހާފްގެ ފަހުކޮޅު ލިބި ވަނީ ބޭކާރުވެފައެވެ.

ލީގުގައި ޗެލްސީ ދެން ނިކުންނާނީ ރަށުން ބޭރުގައި ނޯވިޗް ސިޓީއާ ދެކޮޅަށެވެ. އަދި ލެސްޓާ ނިކުންނާނީ އަމިއްލަ ދަނޑުގައި ޝެފިލްޑް ޔުނައިޓެޑާ ދެކޮޅަށެވެ.