އެމްއެންޔޫއެސްޔޫ އިން އިންތިޒާމުކޮށްގެން ބާއްވާ އެމްއެންޔޫއެސްޔޫ ފުޓްސަލް ފިއެސްޓާގައި ބައިވެރިވުމުގެ ފުރުސަތު ހުޅުވައިލައިފިއެވެ.

މިއީ މި މުބާރާތް މެދުކެނޑުމެއްނެތި ބާއްވާ ހަތްވަނަ ފަހަރެވެ. މި މުބާރާތް ކުޅެވޭނީ ދެ ޑިވިސަނަކަށް ބަހައިލައިގެން ކަމަށް އެމްއެންޔޫއެސްޔޫ އިން ބުނެއެވެ. އެއީ އަންހެން ޑިވިސަނާއި ފިރިހެން ޑިވިސަނެވެ. އަދި މި މުބާރާތުގައި 500 އަށް ވުރެ ގިނަ ކުޅުންތެރިން ކުޅޭނެ ކަމަށް އެމްއެންޔޫއެސްޔޫ އިން ބުނެއެވެ.

މި މުބާރާތުގައި ބައިވެރިވެވޭނީ ދިވެހިރާއްޖޭގެ ގައުމީ ޔުނިވާސިޓީގެ ފެކަލްޓީ ތަކުގެ އިތުރުން ދިވެހިރާއްޖޭގެ ޔުނިވާސިޓީތަކާއި ކޮލެޖް ތަކާއި ހައި ސްކޫލުތަކަށެވެ.

މުބާރާތުގައި ބައިވެރިވުމުގެ ސުންގަޑި އަކީ 25 އޮގަސްޓް 2019 ވާ އާދީއްތަ ދުވަހުގެރޭ 10:00 އެވެ. އަދި ޓީމު ލިސްޓު ހުށަހެޅުމުގެ ސުންގަޑި އަކީ 1 ސެޕްޓެމްބަރު 2019 ވާ އާދީއްތަ ދުވަހުގެރޭ 10:00 އެވެ.

މުބާރާތުގެ ގަވައިދުގެ އިތުރުން ރަޖިސްޓްރޭޝަން ފޯމާއި ޓީމްލިސްޓް ފޯމް އެމްއެންޔޫއެސްޔޫ ވެބްސައިޓުން ޑައުންލޯޑް ކުރެވޭނެ ކަމަށް އެމްއެންޔޫއެސްޔޫ އިން ބުނެއެވެ.

އެމްއެންޔޫއެސްޔޫގެ ރައީސް މުހައްމަދު ޝާން އާމިރު ބުނީ އެމްއެންޔޫއެސްޔޫ ފުޓްސަލް ފިއެސްޓާ އަކީ ހަޔާ އެޑިއުކޭޝަން ސެކްޓާއަށް ބާއްވާ އެންމެ ބޮޑު މުބާރާތް ކަމަށާއި މި މުބާރާތުގެ އަންހެން ޑިވިސަން ކުޅޭ މިއީ ދެވަނަ ފަހަރު ކަމަށެވެ. މީގެ އިތުރުން އޭނާ ބުނީ މި މުބާރާތް ސްޕޮންސަރ ކުރަން ބޭނުންވާ ފަރާތްތަކަށް އެފުރުސަތު އޮންނާނެ ކަމަށާއި މި މުބާރާތުގެ ޓައިޓަލް ސްޕޮންސަރ އަދި ހަމަޖެހިފައި ނުވާކަމަށެވެ. އޭނާ އިތުރަށް ބުނީ މި މުބާރާތް ސްޕޮންސަރ ކުރަން ބޭނުންވާ ފަރާތްތަކުން އެމްއެންޔޫއެސްޔޫ އަށް ގުޅުމުން ޕްރޮޕޯސަލް ހަވާލުކުރާނެ ކަމަށެވެ.

މި މުބާރާތުގެ ފިރިހެން ޑިވިސަންގެ އެންމެ ފަހުގެ ޗެމްޕިއަން ޓީމަކީ މެޕްސް ކޮލެޖެވެ. އަދި އަންހެން ޑިވިސަންގެ ޗެމްޕިއަން ޓީމަކީ އެވިޑް ކޮލެޖެވެ.