އިންގްލެންޑުގައި ފުލުހެއްގެ މަރާ ގުޅިގެން 10 މީހަކު ހައްޔަރުކޮށްފި

އިނގިރޭސިިލާތުގެ ބަރކްޝާ ސިޓީގެ ފުލުަސް އޮފިސަރެއްގެ މަރާ ގުޅިގެން ސުވާލުކުރުމަށް ދިހަ މީހުން ހައްޔަރުކޮށްފިއެވެ.

މީގެ ހަތަރު ހަފްތާ ކުރިން އަލަތު ކައިވެނި ކުރި ޕީސީ އެންޑްރޫ ހާރޕަރ ބުރާސްފަތި ދުވަހު މަރާލާފައިވާއިރު، އޭނާގެ މަރުގެ ސަބަބުން މުޅި ޕޮލިސް ފޯސްއަށްވެސް ޝޮކެއް ލިބިފައިވާ ކަމަށް ފުލުހުންގެ ޗީފް ކޮންސްޓެބަލް ޖޯން ކެމްބެލްއާ ހަވާލާދީ ނޫސްތަކުގައި ރިޕޯރޓްކޮށްފައިވެއެވެ.

އެގޮތުން އުމުރުން 28 އަހަރުގައި މަރާލާފައިމިވާ ހާރޕަރ އަކީ ވަރަށް ހީވަގި އަދި މީހުންގެ ތެރޭގައި ބަލައިގަންނަ އޮފިސަރެއްކަމަށް ފުލުހުންގެ ޗީފް ކޮންސްޓެބަލް ވިދާޅުވެފައިވެއެވެ.

ރިޕޯރޓްތައް ބުނާ ގޮތުން އޭނާ މަރާލާފައިވަނީ ބަރގްލަރީގެ ކުށެއްގެ ރިޕޯރޓް ލިބުމާ ގުޅިގެން އެކަމަށް އެޓެންޑު ވުމުގެ ތެރޭގައެވެ.

ހާރޕަރގެ ޕޯސްޓްމޯޓަމް ހެދުމަށް ތައްޔާރު ވަމުންދާއިރު، އޭނާގެ މަރަ ގުޅިގެން ހައްޔަރު ކުރި މީހުންގެ ތެރޭގައި 13 އަހަރުގެ ކުޑަކުއްޖެއްވެސް ހިމެނޭ ކަމަށް ރިޕޯރޓްތައް ބުނެއެވެ. އެގޮތުން އެ އެންމެންވެސް މިވަގުތު ތިބީ ފުލުހުންގެ ބެލުމުގެ ދަށުގައެވެ.

އިންގްލޭންޑުގެ ފުލުހުންނަށް މިފަދަ ނުރައްކާތައް އަމާޒުވަމުންދާ ކަމުގެ ރިޕޯރޓްތައް ކުރެވެމުންދާއިރު، މި އަހަރުގެ މިހާތަނަށް ފުލުހުންނާމެދު ހިނގަފައިވާ މިފަދަ ހާދިސާތަކުގެ އަދަދު 30،000 އަށް އަރާނެ ކަމަށް ތަފާސްހިސާބުތަކުން ދައްކައެވެ. އެގޮތުން ފާއިތުވި އަހަރުތަކާ އަޅާބަލާއިރު މިއީ 27 އިންސައްތަ އިތުރު އަދަދެއް ކަމަށް ރިޕޯރޓްތައް ބުނެއެވެ.