ޕާކިސްތާނުގެ ކަރާޗީގައި ޝޯ ހުށައަޅާފައިވާތީވެ އޯލް އިންޑިއާ ސައިން ވޯކާސް އެސޯސިއޭޝަން (އޭއައިސީޑަބްލިއުއޭ) އިން ބޮލީވުޑްގެ ލަވަކިޔުންތެރިޔާ މީކާ ސިންގް އިންޑިއާގެ ފިލްމު އިންޑަސްޓްރީގައި ލަވަކިޔުން މަނާކޮށްފި އެވެ.
މީކާ ޝޯ ހުށައަޅާދިނީ ޕާކިސްތާނުގެ ކުރީގެ ބޮޑު ވަޒީރު ޕަރްވޭޒް މުޝައްރަފުގެ ގާތް ރައްޓެއްސެއްގެ ހަފްލާގަ އެވެ.
ކަޝްމީރުގެ މައްސަލާގައި އިންޑީއާ އިން ޕާކިސްތާނާ ދެމެދު އޮންނަ ގުޅުންތައް ކަނޑާލާފައިވަނި ކޮށް މީކާ ޕާފޯމް ކުރަމުން ދިޔަ 30 ސިކުންތުގެ ވީޑިއޯއެއް ޕާކިސްތާނުގެ ނޫސްވެރިޔަކު ޓްވީޓްކޮށްފަ އެވެ.
އިންޑިއާގެ ސައިން ވޯކާސް އެސޯސިއޭޝަނުން ނެރެފައިވާ ބަޔާނެއްގައި ބުނީ، މި މަހުގެ 8 ވަނަ ދުވަހު ކަރާޗީގައި މީކާ ޕާފޯމް ކޮށްފައިވާތީ އޭނާ އަށް ވަކި އެއްޗެއް އަންގަންދެން އިންޑިއާ ގައި އޭނާ އަށް އެއްވެސް ގޮތަކަށް ޕާފޯމް ނުކުރެވޭނެ ކަމަށެވެ. އެކަމާއި ގުޅޭ ގޮތުން މީކާގެ ފަރާތުން އެއްވެސް އެއްޗެއް ބުނެފައެއްނުވެ އެވެ.
