ޕަދްމާވަތު: ފިލްމު އަޅުވަން ހުއްދަ ދިނުމުން ހަމަނުޖެހުން ހިންގައިފި

ބޮލީވުޑްގެ ފިލްމް "ޕަދްމާވަތު" ދެއްކުން މަނާކުރެވިފައި އޮތް އޮތުން އިންޑިއާގެ ސުޕްރީމް ކޯޓުން ނިމުމަކަށް ގެނައުމާ އެކު ގުޖުރާތުގައި މުޒާހަރާކޮށް މަގުތަށް ބަންދުކޮށް ބަސްދަތުރުތައް ހުއްޓުމަކަށް ގެނެސްފިއެވެ.

ހައްދު ފަހަނައަޅާފައިވާ ހިންދޫ ގްރޫޕްތަކުން އާދީއްތަ ދުވަހު ވަނީ ބަސްތަކުގައި ހުޅުޖަހައި ހުޅަނގުގެ ސްޓޭޓެއް ކަމަށްވާ ގުޖުރާތުގެ ތިއޭޓަރެއް ސުންނާފަތިކޮށްލާފައެވެ.

ކޯޓުގެ އަމުރު ލިބި އަދި ސަލާމަތީ ފިޔަވަޅުތައް ވަރުގަދަކުރި ނަމަވެސް އިތުރު ހަމަނުޖެހުންތަކެއް އަތުވެދާނެކަމުގެ ބިރަށް އެސްޓޭޓުގެ ތިއޭޓަރުތަކުގެ ވެރިން ވަނީ ފިލްމް ނޭޅުވުމަށް ނިންމާފައެވެ.

"ޕަދްމާވަތު" ރިލީސް ކުރުމަށް ނިންމާފައި ވަނީ ޖެނުއަރީމަހުގެ 25 ވަނަ ދުވަހުއެވެ.

މި ފިލްމުގައި ދައްކައިދެނީ 14 ވަނަ ގަރުނުގައި އުޅުނު ހިންދޫ ރާނީއަކާއި މުސްލިމް ވެރިއެއް ކަމަށްވާ އަލާއުއްދީން ޚިލްޖީގެ ވާހަކައެވެ. ފިލްމުގެ ލީޑްރޯލް ކުޅެފައި ވަނީ ބޮލީވުޑްގެ ތަރި ދީޕިކާ ޕަދުކޮނޭ އަދި ޝާހިދު ކަޕޫރު އަދި ރަންވީރު ސިންގހެވެ.

ހިންދޫ ގްރޫޕްތަކާއި ރާޖްޕުތު ކާސްޓް އޯގަނައިޒޭޝަންތަކުން ތުހުމަތުކުރާ ގޮތުގައި، ސަންޖޭ ލީލާ ބަންސާލީ ޑައިރެކްޓްކޮށްފައިވާ މި ފިލްމުގައި މައި ދެ ކެރެކްޓަރގެ މެދުގައި ފެނިގެންދާ ލޯބީގެ އިޝްގީ މަންޒަރުތަކަކީ ހިންދޫ ރާނީއަށް އިހުތިރާމް ކުޑަކުރުމެވެ. ފިލްމުގެ ޕްރޮޑިއުސަރު އެކަން ދޮގުކުރެއެވެ.

މިދިޔަ ހަފްތާގައި ކޯޓުން ވަނީ ފިލްމް ރިލީޒް ކުރުމަށް ހުއްދަދީފައެވެ. އަދި ހަތަރު ސްޓޭޓަކުން ފިލްމު މަނާކުރުމަށް ނިންމާފައިވާ ނިންމުން ކޯޓުން ވަނީ ބާތިލްކޮށްފައެވެ.