ޤަވާއިދާ ޚިލާފުވެގެން އަނެއްކާވެސް 15 ޓެކްސީ ޑްރައިވަރުން ޖޫރިމަނާކޮށްފި
13 އޯގަސްޓު 2019 | އަންގާރަ 04:336 ޓެކްސީ ޑްރައިވަރަކު މީގެ ކުރިންވެސް ޖޫރިމަނާ ކޮށްފައިވޭ
ޓްރެފިކް ފުލުހުން މަގުމަތި ބަލަހައްޓަނީ
މިދިޔަ ހަފްތާ ތެރޭގައި ޤަވާއިދާ ޚިލާފުވެގެން 15 ޓެކްސީ ޑްރައިވަރަކު ޖޫރިމަނާކޮށްފިއެވެ.
ފުލުހުންގެ ޓްރެފިކް މެނޭޖްމަންޓް ޑިޕާޓްމަންޓުން އާންމުކުރި ތަފާސްހިސާބުތައް ދައްކާގޮތުން ޤަވާއިދާ ޚިލާފުވެގެން އޯގަސްޓް މަހުގެ 3 ވަނަ ދުވަހުން ފެށިގެން އޯގަސްޓް 9 އާ ހަމައަށް 15 ޓެކްސީއެއް ވަނީ ޖޫރިމަނާކޮށްފައެވެ.
ޓްރާންސްޕޯޓް އޮތޯރިޓީން ކަނޑައަޅާފައިވާ އަގުތަކަށްވުރެ ބޮޑުއަގުގައި ޓެކްސީއަށް ފައިސާ ނަގައިގެން 6 ޓެކްސީ ޑްރައިވަރަކު މީގެ ކުރިންވެސް ޖޫރިމަނާ ކޮށްފައިވާއިރު، ޓްރާންސްޕޯރޓް އޮތޯރިޓީން ކަނޑައަޅާފައިވާ މިންގަނޑަށްވުރެ ގިނައިން ފައިސާ ނަގާ ޓެކްސީތަކާމެދު ފިޔަވަޅު އެޅުމަށް އޯގަސްޓް 7 ވީ ބުދަ ދުވަހު ފުލުހުން ވަނީ ޚާއްސަ އޮޕަރޭޝަނެއްވެސް ފަށާފައެވެ.
އެގުތުން ޓެކްސީ ކުރާ ފަރާތްތަކުން ބޮޑު އަގު ނަގާނަމަ 750 ރުފިޔާ އިން ޖޫރިމަނާ ކުރާނެ ކަމަށާއި، އޭގެ އިތުރުން ޓެކްސީގެ ޑިކީއަށް އަރުވާ ދާގީނާއަކުން އިތުރު އަގެއް ނެގުމަކީ މަނާކަމެއް ކަމަށް ޓްރާންސްޕޯރޓް އޮތޯރިޓީން ބުނެފައިވާއިރު، ޓްރެފިކް ފުލުހުން ދަނީ އެކަންކަން ބަލަހައްޓަމުންނެވެ.
އޭގެ އިތުރުންވެސް، ޓްރެފިކް ޤަވާއިދާ ޚިލާފުވި ފަރާތްތައް ޖޫރިމަނާ ކޮށްފައިވާއިރު، މިދިޔަ ހަފްތާގައި ހިނގާ ދިޔަ އެކްސިޑެންޓްތަކުގެ ސަބަބުން 8 ފަރާތެއްގެ ލައިސެންސް ވަނީ ހިފަހައްޓާފައެވެ. އަދި 28 ފަރާތެއް ޓްރެފިކް ގަވާއިދާއި ޚިލާފުވުމުން ޖޫރިމަނާ ކޮށްފައިވާއިރު، 41 މީހަކު ސްޕީޑް ލިމިޓުން މަތިން ދުއްވުމުން ޖޫރިމަނާ ކޮށްފައިވެއެވެ.
