މޯދީ ޗުއްޓީއެއް ނެންގެވީ 18 އަހަރު ފަހުން
13 އޯގަސްޓު 2019 | އަންގާރަ 03:47މޯދީ ޗުއްޓީއެއް ނެންގެވީ ޑޮކިއުމެންޓްރީއެއްގައި ބައިވެރިވުމަށް
ބޮޑުވަޒީރު ނަރެންދްރަ މޯދީ އާއި ޓީވީ ޕްރެޒެންޓަރ ބެއަރ ގްރިލްސް
ފާއިތުވި 18 އަހަރުގެ ތެރޭގައި، އިންޑިއާގެ ބޮޑުވަޒީރު ނަރެންދްރަ މޯދީ ޗުއްޓީއެއް ނަންގެވި މިއީ ފުރަތަމަ ފަހަރު ކަމަށް އޭނާ ވިދާޅުވެއްޖެއެވެ.
މޯދީ ޗުއްޓީއެއް ނެންގެވީ، މަޝްހޫރު ޓީވީ ޕްރެޒެންޓަރ އެޑްވާޑް މައިކަލް ގްރިލްސް އަދި އާންމު ނަމުން ނަމަ ބެއަރ ގްރިލްސް ގެ ކާމިޔާބު ޑިސްކަވަރީ ޝޯ މޭން ވަރސަސް ވައިލްޑްގެ އެޕިސޯޑަކަށް ބޭނުންވާ ޑޮކިއުމެންޓްރީއެއް ތައްޔާރު ކުރުމަށެވެ.
އެ ޕްރޮގްރާމަށް ބޭނުންވާ ޑޮކިއުމެންޓްރީގެ ވީޑިއޯތައް ނަގާފައިވަނީ އުއްތަރަކަންދްގައި ހުންނަ ހިމް ކޯރބެޓް ނެޝަނަލް ޕާކްގައި ފެބްރުއަރީ މަހުއެވެ.
ބެއަރ ގްރިލްސްއާ މުހާތަބުކުރައްވަމުން މޯދީ ވިދާޅުވީ ވޭތުވެ ދިޔަ ފަސް އަހަރުވެސް މަސައްކަތް ކުރެއްވީ އެއްވެސް ޗުއްޓީއެއް ނުނަންގަވާ، ތަރައްގީ ގެނައުމަށްޓަކައި ކަމަށެވެ.
ދުނިޔޭގެ ވެރިކަން ކޮށްފައިވާ އަދި ކުރަމުންދާ ބޭފުޅުންގެ ތެރެއިން މޭން ވަރސަސް ވައިލްޑްގައި ފެނިގެންދިޔަ ދެވަނަ ވެރިއަކަށް ވެގެން ގޮސްފައި މިވަނީވެސް ބޮޑުވަޒީރު މޯދީއެވެ. ފުރަތަމަ ފަހަރަށް އެ ޝޯގައި ފެނިގެންދިޔައީ އެމެރިކާގެ ކުރީގެ ރައީސް ބަރަކް އޮބާމާއެވެ.
މޯދީ ވަނީ މިކަމާ ގުޅިގެން ޓްވީޓެއްވެސް ކުރައްވާފައެވެ. ތިމާވެއްޓާ ބެހޭގޮތުން ވާހަކަ ދެއްކުމަށް އިންޑިއާގެ ފެހި ޖަންގަލިތަކަށްވުރެ ވަކި ރަނގަޅުތަނެއް ކޮބާތޯ ސުވާލުކުރައްވާފައެވެ.
