އަޟްހާ އީދު ދުވަހު ހުޅުމާލޭގައިވެސް އިންޖީނުލީ އެއްގަމު އުޅަނދު ދުއްވުން މަނާކޮށްފި

އަޟްހާ އީދު ދުވަހާއި ދިމާކޮށް ހުޅުމާލޭގައިވެސް އެއްގަމު އުޅަނދު ދުއްވުން މަނާކޮށްފިއެވެ.

އެކަމާ ގުޅޭގޮތުން މޯލްޑިވްސް ޓްރާންސްޕޯރޓް އޮތޯރިޓީން ނެރުނު އިއުލާނެއްގައި ބުނީ، އޯގަސްޓް މަހުގެ 11 ވަނަ ދުވަހުގެ ހަވީރު 04:30 އިން ފެށިގެން 06:30 އަށް ހުޅުމާލޭގައި އިންޖީނުލީ އެއްގަމު އުޅަނދު ދުއްވުމަކީ މަނާ ކަމެއް ކަމަށާއި، އެންގުމާ ޚިލާފުވާ ފަރާތްތަކާމެދު "އެއްގަމު ދަތުރު ފަތުރުގެ ޤާނޫނު" ގެ ދަށުން ފިޔަވަޅުއަޅާނެ ކަމަށެވެ.

އޭގެ އިތުރުން، ސަލާމަތީ ބާރުތަކުން ބޭނުންކުރާ އިންޖީނުލީ އެއްގަމު އުޅަނދާއި، އެމްބިއުލެންސްއާއި، ފުރާ މީހުން ބޭނުންކުރުމަށް ހުއްދަ ދެވޭ އުޅަނދާއި، ހާއްސަ އެހީއަށް ބޭނުންވާ މީހުން ދުއްވުމަށް ހާއްސަ ކުރެވިފައިވާ އުޅަނދުތަކާއި، ޕަބްލިކް ޓްރާންސްޕޯޓުގެ ގޮތުގައި ދެމުން ގެންދާ ބަހުގެ ހިދުމަތް މި އެންގުމުން އިސްތިސްނާވާ ކަމަށްވެސް ޓްރާންސްޕޯރޓް އޮތޯރިޓީން ބުނެފައިވެއެވެ.

ޓްރާންސްޕޯރޓް އޮތޯރިޓީން އެހެން ބުނެފައިވާއިރު، އަޟްހާ އީދު ދުވަހު މާލެސިޓީ އަދި ވިލިމާލޭގައި އިންޖީނުލީ އެއްގަމު އުޅަނދު ދުއްވުން މާލޭ ސިޓީ ކައުންސިލުންވެސް ވަނީ މަނާކޮށްފައެވެ. އެގޮތުން ސިޓީ ކައުންސިލުން ބުނީ އެގޮތަށް ހަމަޖެއްސީ ރައްޔިތުން އުފާފާޅުކުރުމުގެ ގޮތުން މަގުމައްޗަށް ނިކުމެ ހިނގާބިގާވެ އުޅުމަށް ފުރުސަތު ދިނުމަށް ކަމަށެވެ.