ހޮންގްކޮންގް އެއާރޕޯޓުގައި 3 ދުވަހުގެ މުޒާހަރާއެއް ފަށައިފި
10 އޯގަސްޓު 2019 | ހޮނިހިރު 06:37އެމުޒާހަރާ ބޭއްވުމުގެ ބޭނުމަކީ އެސިޓީއަށް އަންނަ މީހުންނަށް މުޒާހަރާގެ ބޭނުން އަންގައިދިނުން
ހޮންގްކޮންގްގެ އެއާޕޯތުގައި ކުރަމުންދާ މުޒާހަރާތަކުގެ ތެރެއިން
ހޮންކޮންގްއަށް ޑިމޮކްރަސީ ގެނައުމުގެ ފިކުރަށް ތާއިދު ކުރާ އެކްޓިވިސްޓުން އެސިޓީގެ އެއާޕޯޓުގައި ތިން ދުވަހުގެ މުޒާހަރާއެއް ފަށައިފިއެވެ.
ހުކުރު ދުވަހުގެ މެންދުރުގެ ވަގުތެއްގައި ހޮންކޮންގް އިންޓަނޭޝަނަލް އެއާޕޯޓަށް ގިނަ ބަޔަކު ވަނީ މުޒާހަރާ ކުރުމަށް އެއްވެފައެވެ. އެމީހުން ތިބީ މޫނު ފޮރުވައި، ކަޅު ކުލައިގެ ހެދުން ލައިގެންނެވެ.
މުޒާހަރާގެ ބައިވެރިން ތިބީ، ލީޑަރު ކެރީ ލާމް އާއި ފުލުހުންގެ އަމަލުތައް ކުށްވެރިކޮށް ލިޔެފައިވާ ބެނާތަކުގެ އިތުރުން، ތަފާތު ކަންބޮޑުވުން ފާޅުކޮށް ލީފްލެޓުތައް ހިފައިގެންނެވެ.
މުޒާހަރާގެ ބައިވެރިން ބުނެފައިވާ ގޮތުގައި، ހޮންކޮންގް އެއާޕޯޓުގައި އެމުޒާހަރާ ބޭއްވުމުގެ ބޭނުމަކީ އެސިޓީއަށް އަންނަ މީހުންގެ ތާއިދު ހޯދުމާއި މުޒާހަރާގެ ބޭނުން އަންގައި ދިނުމެވެ. ހޮންގްކޮންގް ގެ އެއަރޕޯޓުގައި ކުރަމުންދާ މުޒާހަރާތަކާ ގުޅިގެން އެއާޕޯޓުގައި ވަނީ ސަލާމަތީ ފިޔަވަޅުތައް ވަރުގަދަކޮށްފައެވެ. އެހެންނަމަވެސް އެއާޕޯޓުގެ މަސައްކަތްތައް އާންމު އުސޫލުތަކުގެ މަތިން ކުރިއަށްދާނެ ކަމަށް އެއާޕޯޓް އޮތޯރިޓީން ވަނީ ބުނެފައެވެ.
ހޮންކޮންގް މުޒާހަރާތަކާ ގުޅިގެން އެ ސިޓީއަށް ދަތުރުކުރުމުގައި ސަމާލުވުމަށް ބުނެ 22 ގައުމަކުން ވަނީ އިންޒާރު ނެރެފައެވެ. އަދި މުޒާހަރާތަށް ކުރިއަށްދާ މި ދަނޑިވަޅުގައި ހޮންކޮންގަށް ފަތުރުވެރިން ދިޔަ މިންވަރު ވަނީ ދަށްވެފައެވެ.
ހޮންކޮންގްގައި ބޮޑެތި މުޒާހަރާތައް ކުރަން ފެށުނީ ސަރުކާރުން ގާނޫނު ހަދާ މަޖިލީހަށް މިދިޔަ އޭޕްރިލް މަހު ހުށަހެޅި ބިލަކާ ގުޅިގެންނެވެ. އެ ބިލް ފާސް ކުރި ނަމަ، ހޮންކޮންގްގައި ތިބި ކުށްވެރިންގެ ޝަރީއަތް ކުރިއަށް ގެންދިޔުމަށް އެމީހުން ޗައިނާއާ ހަވާލު ކުރެވިގެންދާނެއެވެ.
މުޒާހަރާތަކާ ގުޅިގެން ހޮންކޮންގްގެ ސަރުކާރުން ބިލް ފާސްނުކޮށް މަޑު ޖައްސާލާފައި ވީނަމަވެސް އާންމުންދަނީ ގާނޫނު ހަދާ މަޖްލީހުން ބިލް ބޭރުކުރުމަށް ގޮވާލަމުންނެވެ.
